-БАТЛАН ХАМГААЛАХ ЯАМНЫ ХАРЬЯА АЛДАР СПОРТ ХОРООНЫ ТАМИРЧИД ДУНД СЭРГЭЭШНИЙ НАЙМАА ИЛ ЦАГААНДАА ГАРСАН ГЭНЭ-

         Алдар спорт хорооны тамирчдаас допинг салахаа болилоо. Хаана ямар тамирчнаас допинг илрэв гээд сураг тавихад Алдар спорт хороогоор овоглодог, тус хорооны нэрийн өмнөөс барилдаг тамирчин байх. Тухайлбал, Үндэсний баяр наадамд ес даван түрүүлсэн М.Бадарч Алдар спорт хорооны тамирчин. Допингийн хэрүүл, маргаан дуусаагүй байтал саяхан мөн л нэг тамирчнаас нь допинг илэрчихлээ. Үүнээс гадна Батлан хамгаалах яамны харьяа Алдар спорт хороонд допингийн наймаа ил цагаандаа гарсан тухай албан бус эх сурвалжууд мэдээллэж байна. Үүнээс гадна, Олон улсын допингийн эсрэг агентлаг буюу ВАДА манай улсад хатуухан хариуцлага хүлээлгэсэн. Тухайлбал, ирэх оны нэгдүгээр сар гэхэд зургаан зөрчил арилгах үүрэг өгсөн.  Хэрэв энэхүү зөрчлүүдээ арилгахгүй бол Парисын олимпод цагаан туг дор жагсах хүндхэн нөхцөл  үүсэж болзошгүй байна. Мөн энэ жилийн хувьд манай улсад допингийн эсрэг дүрмийн зөрчлийн гурван том тохиолдол бүртгэгдээд буй.

Парисын олимпод цагаан туг дор жагсах хүндхэн нөхцөл  үүсэж болзошгүй байна

                Монгол Улсад допингийн асуудлууд ар араасаа гарч, толгой эргүүлсэн олон үйл явдал гардаг. Тухайлбал Допингийн эсрэг үндэсний төвөөс нь сэргээшийн төрлийн бодис олноор илэрч, удирдах албан тушаалтууд нь үргэлж нэр холбогдох жишээтэй. Үүнээс гадна, допингийн шинжилгээний хариуг хувийн мэйл хаягаар авдаг, допингоор тамирчдыг барьцаалж авлига авдаг байж болзошгүй байгааг хууль хяналтын байгууллагаас мэдээлсэн. Мөн улсын арслан Э.Оюунболд, Д.Цэрэнтогтох начин нарын допингийн шинжилгээний хариуг сольсон гэх мэдээлэл цахим орчинд шуугиан тариад байгаа билээ. Дээрх шиг байдал Алдар спорт хороонд үүссэн биш биз.

Б. Чинзоригийн аравдугаар сарын 4-нд өгсөн шинжилгээний дээжид s1 бүлгийн анаболик стериод болох метандионы метаболит илэрсэн

                  "ХАНЖОУ-2023" азийн 19 дэх удаагийн наадмын боксын төрөлд алтан медаль хүртсэн, боксын үндэсний шигшээ багийн тамирчин Б. Чинзоригийн аравдугаар сарын 4-нд өгсөн шинжилгээний дээжид s1 бүлгийн анаболик стериод болох метандионы метаболит илэрсэн болохыг олон улсын шинжилгээний агентлагаас мэдээлсэн. Тиймээс бид Алдар Спорт хорооны тамирчин Б.Чинзоригийн ээж дараах тодруулахад “Миний хүү допингийн эсрэг үзэл бодолтой байдаг. Хүү минь допинг хэрэглэх байсан бол спортоор хичээллэхгүй байх байсан. Олон нийтийн сүлжээнд гарсан мэдээллийг хараад сэтгэл маш ихээр хямарч байна. Өчигдөр хүүгээсээ энэ талаар асуухад “Ээж ээ, та хүүдээ итгэж байгаа биз дээ. Та хүүдээ итгээрэй. Би допинг хэрэглээгүй шүү” гэсэн. Хүүгийн минь сэтгэл санаа хямарчихсан, тогтворгүй байна лээ. Хүү минь яагаад допингийн хэрэгт холбогдчихов гэдэгт маш их гайхаж байна. Орой хүүтэйгээ уулзаж, тухтай асууж, тодруулна” гэсэн юм. Монгол Улсаа төлөөлөн олон улсын тэмцээнд оролцож буй тамирчнаас допинг илэрнэ гэдэг харамсалтай. Тэр дундаа Монгол Улсын Батлан хамгаалах яамны харьяа Алдар спорт хорооны тамирчнаас. Үнэхээр энэ байгууллагат допингийн наймаа ил цагаандаа гарч, тамирчиндаа хэрэглэхийг зөвлөдөг үү. Тамирчныхаа амжилтаар тухайн улс бахархдаг. Гэтэл бахархал болсон тамирчдаас нь допинг илрээд байхаар ард түмэн ундууцна. Олон улсад допинг хэрэглэсэн тамирчин биш Монгол Улс муу хэлэгдэнэ. Гэтэл үүнийг мэдсээр байж тус хороо тамирчдадаа допинг хэрэглэх, допингийн наймааг ил цагаан болгоод байна уу.

Тэр дундаа Монгол Улсын Батлан хамгаалах яамны харьяа Алдар спорт хорооны тамирчнаас. Үнэхээр энэ байгууллагат допингийн наймаа ил цагаандаа гарч, тамирчиндаа хэрэглэхийг зөвлөдөг үү

           Энэ жилийн хувьд Алдар спорт хорооны гурван тамирчин допингийн шинжилгээний хариунд бүдрээд байна. Тухайлбал, Үндэсний их баяр наадмын түрүү бөх, Зэвсэгт хүчний “Алдар” спорт хорооны тамирчин, М.Бадарчаас метенолон гэх бүх цаг үед хориотой допингийн төрлийн бодис илэрсэн.  “ Ханжоу- 2023 Азийн 19 дэх удаагийн наадмын үеэр хүндийн өргөлтийн төрөлд шигшээ багийн төлөөлөл болж явсан Б.Эрдэнэзул мөн л  шинжилгээ хариунд бүдэрсэн. 2016 оноос хойш Допингийн эсрэг дүрэм зөрчсөн “АЛДАР” спорт хорооны тамирчид

2016 он: Б.Ганзориг /Цэргийн арслан/ “Алдар” спорт хороо

2017 он П.Орхон / чөлөөт бөх / -“Алдар” спорт хороо

2017 он: Э.Даш /Улсын начин/ “Алдар” спорт хороо

2020 он: Пүрэвдавга /Улсын арслан/ “Алдар” спорт хороо

2022 он: Б.Лхагвадорж /Аймгийн арслан/ “Алдар” спорт хороо

2022 он: Т.Бэгзсүрэн /Улсын харцага/ “Алдар” спорт хороо

2023 он: М.Бадарч /Улсын гарди/ “Алдар” спорт хороо

2023 он Б.Чинзориг / Бокс/ - “Алдар” спорт хороо

2023 Б.Эрдэнэзул / Хүндийн өргөлт / -“Алдар” спорт хороо

Дээрх асуудал ямар нэг арга хэмжээ авахгүй бол Алдар спорт хорооноос допингтой тамирчин бэлтгэгдсэн гарсаар л байх бололт