Өмнө нь Ардын намынхан хэчнээн хэрүүл, зодоонтой байсан ч түүнийгээ гадагш нь гаргахгүй, асуудлыг хүндрүүлэлгүй дарж чаддаг хэмээн өөрсдийгөө дөвийлгөж, Ардчилсан намынхныг тохуурхдаг байлаа. "Олон хавар нэгэндээ" гэж өнөөдөр Ардын намынхны эрх мэдлийн төлөөх зодоон “хайрцаг”-наасаа хальж, багтаж, шингэх аргагүй болчихоод хаа сайгүй хальж, асгарч эхэлж байна. Жишээ нь дотоод, гадаадын хэвлэлүүдэд төлбөртэй мэдээ тавиулах гэх мэт.

      Сөрөг хүчингүй ганцхан нам олон жил үнэмлэхүй олонхоороо засагласны хар гайгаар  эрх баригчид эрх мэдлийн төлөө их адаггүй зүтгэж, тэр чинээгээрээ Монгол Улс хоморгонд нь өртөх хүртлээ хол явчихлаа. Түүнийг хамгийн тод жишээ нь, ирэх өвөл нийслэлчүүд ямар ч сонголтгүйгээр хугацаа нь дууссан, хөлдүү автобусандаа дахиад л зорчих нь.

     МАН-ын одоогийн “гал тогоо”-г баригчид хэн нь илүү хүчтэйгээ үзэх гэж хэрэндээ л толхилцож байна. Саяхнаас энэ байдал улам хурцдаж, нэг нэг рүүгээ том “чулуу” нүүлгэж эхэллээ. МАН-ынхны хамгийн эмзэг сэдэв нүүрсний хулгайч болох. Өөрөөр хэлбэл, тэд урьд нь ЖДҮ  болон бусад асуудалд оролцож байсан нь ямар ч хамаагүй. Одоо л нүүрсний хулгайч гэдэг нэр зүүх вий гэдгээс үхтэлээ айж байгаа. Үүн дээр нь дөрөөлж, нэгнээ нүүрсний хулгайч гэдгийг нь ард түмэнд итгүүлэх тактик ч өрнөж байгаа нь илт байна.

    Д.АМАРБАЯСГАЛАНГ НҮҮРСНИЙ ХУЛГАЙЧ ГЭСНИЙ ХАРИУД НОГООН АВТОБУСНЫ АСУУДАЛ СӨХӨГДСӨН ҮҮ 

    Өөрөөр хэлбэл, саяхан ЗГХЭГ-ын дарга Д.Амарбаясгаланг нүүрсний хулгайч хэмээх нийтлэл гаднын сайтад нийтлэгдсэн. Үндсэндээ түүнийг ХБНГУ руу хэсэг гишүүдийн хамт яваад ирэх зуурт ийм мэдээлэл цацагдсан. Тодруулбал, Yahoo Finance, News Direct гэх сайтад түүнийг “Админерал” компаниар дамжуулан нүүрсний хулгайн хэрэгт нэр холбогдсон хэмээн нийтэлсэн. Ингэхдээ “Д.Амарбаясгалан Тавантолгойгоос 47 мянган тонн нүүрсийг “Админерал” компаниар дамжуулж, ашиг хонжоо олсон гэгдэж буй. Энэ хэргийг шалгах явц үргэлжилж байгаа. Тус мөрдөн байцаах явцад Амарбаясгалан эрх мэдлээ ашиглан хөндлөнгөөс оролцох гэж оролдож байна” гэх агуулгыг гаргасан. Энэ асуудал түүнийг эзгүй хооронд сөхөгдсөн нь нам дотроосоо ийм мэдээлэл  гаргасан байх магадлалтай гэх хардлага дагуулж байгаа юм. Харин энэ асуудлыг ЗГХЭГ-ын дарга Д.Амарбаясгалан эрс эсэргүүцэж, өөрийн цахим хаягаараа мэдэгдэл гаргаж, саяхан болсон Засгийн газрын хуралдааны үеэр ч хатуухан сануулга өгч харагдсан. Тэрбээр “Намайг нүүрсний компанитай холбож их ярьж, бичиж байна. Алгын чинээ цаасан дээр ч баримт байхгүй байхад удаа дараа гүтгэж байгаа тул би нэг зүйл хэлье. Та нар битгий горьд. Би та нарын хүссэн шиг нүүрсчин болохгүй” хэмээн мэдэгдээд буй.

      Гэтэл  ЗГХЭГ-ын дарга Д.Амарбаясгаланг ногоон автобусны дуулианыг дэгдээсэн гэх хардлага энэ өдрүүдэд эримтэй яригдаж байна.  Өөрөөр хэлбэл, түүний МАН-ын нэр бүхий хүнд буцааж барьсан хариу нь өндрөө авч, Хотын сайд, Хотын дарга нарыг зэрэг суудлаасаа буухад хүргэв. Энэ мэтээр эрх баригчдын толхилцоон дундаас“но”-той асуудлууд цөөнгүй илрэх нь тодорхой байна. МАН-ын хагарал өнгөрсөн өвлөөс эхэлж, Ерөнхий сайд Л.Оюун-Эрдэнэ “ах” нараасаа өрх тусгаарлаж, өөрийн гэсэн фракц бүрдүүлснээр эхэлсэн гэх яриа ч бий. Өөрөөр хэлбэл, нүүрсний хулгайн асуудлаар анх “шүгэл” үлээж эхлэхдээ л намын хуучин даргатайгаа муудаж, удаа дараа сануулга авсан гэдэг.

    "Нүүрсний хулгайчдыг зарлах" жагсаал эд хүчээ авч,  дуулиан дэгдээж байх үеэр ҮАБЗ хуралдаж, Төрийн ордны зүүн жигүүрт халуун уулзалт өрнөсөн гэх яриа ч бий. Тодруубал, Ерөнхийлөгчийн зүгээс УИХ-ыг тарааж, Засгийн газрыг огцруулах хүртлээ хилэгнэж, хариуд нь Ерөнхий сайд “Ковидын төсөв, нүүрсний бүлэглэлийн цаад сүлжээг би илрүүлнэ шүү” гэснээр тэдний хагарал улам гүнзгийрсэн гэгддэг. Энэ үйл явдлаас хойш тэдний харилцаа сайнгүй байгаа гэдэг.

    Тэдний дараа хотын шинэ хуучин удирдлагууд хоорондоо муудаж,  нэлээд маргаантай байсан. Өөрөөр хэлбэл, хотын дарга асан Д.Сумъяабазар УИХ-ын гишүүн С.Амарсайханд хандаж, “Явж явж би чиний баасыг цэвэрлэж байна. Чи хотын даргаар ажиллаж байхдаа чухам юу хийсэн юм бэ. Чиний тарьсан балаг өнөөдөр энэ хотыг муухай харагдуулж байна. Гэтэл нэг их нэр цэвэр хүн. Чиний хийсэн булхайг дэлгэж дөнгөнө” шүү хэмээн давшилж  байсан удаатай. Харин хариуд нь Д.Амарсайхан “Номхон морийг ноолоход амар гэдэг шиг над руу дайрч байна. Намайг гүтгэсэн хүмүүсийг хуулийн байгууллагад өгсөн. Ажлаа хийж чадахгүй, ам, ажил нь зөрж байгаа Хотын Тамгын газар, хотын удирдлагуудтай наад асуудлаа яр” хэмээж байлаа.

      Мэдээж энэ маргааны ард МАН-ын томчууд байсан гэх нь ч бий. Өөрөөр хэлбэл, Ерөнхий сайд Л.Оюун-Эрдэнэ Д.Сумъяабазарын ард, ЗГХЭГ-ын дарга Д.Амарбаясгалан С.Амарсайханы ард байсан. Харин одоо МАН-ынхан нийслэлийн МАН-ын төлөөх өрсөлдөөнд хүч сорьцгоож эхэллээ. Хууль зүй, дотоод хэргийн сайд асан одоогийн хотын мээр Х.Нямбаатар, ЗГХЭГ-ын дарга Д.Амарбаясгалан нарын хооронд өрнөж эхэлж байгаа бололтой.

     Хэдийгээр хотын дарга асан Д.Сумъяабазар "Нийслэлийн МАН-ыг хэнд ч өгөхгүй" хэмээн мэдэгдээд байгаа ч Х.Нямбаатар Д.Сумъяабазар нар хэзээний найзууд. Нэг тойргийн хамтрагчид. Тиймдээ ч Ерөнхий сайдын нийслэлийн МАН-ыг сахиулах бодлого төвөггүй биелэхээр харагдаж байгаа ч ЗГХЭГ-ын даргад Нийслэлийн МАН-ыг Ерөнхий сайд Л.Оюун-Эрдэнэд тийм амархан өгөгхгүй бөайх хүсэл бий. Учир нь Д.Амарбаясгалангийн ард Ерөнхийлөгч У.Хүрэлсүх бий шүү дээ.

Эндээс харахад Ардын намын фракцын зодоон “хайрцаг”-наасаа гарч, нийслэлийн МАН-ыг авах өрсөлдөөнөөр үргэлжлэх нь тодорхой боллоо.