Допингийн шахааны асуудал хурцдаж, илүү олон бөхийг хамрахаар болоод байна. Тухайлбал, Допингийн эсрэг үндэсний төвийн захирал Ж.Хатанбаатар АТГ-т шалгагдаж, гэр болон албан өрөөнөөс нь сэргээшийн төрлийн бодис олноор илэрч, түмний нүдийг орой дээр нь гаргалаа. Олон жил үндэсний бөхөд бугшсан допингийн асуудлаас болж олон бөх хохирсон нь мэдээж хэрэг. Бөхчүүдийг сэргээш хэрэглэсэн хэрэглээгүйг нь шалгах ёстой байгууллагын удирдлагууд өөрсдөө бөхдөө допинг шахчихаад сууж байдаг юм биш биз. Ж.Хатанбаатар, М.Булган нар нь бөхчүүдэд “Манайхаас допинг аваарай. Зах зээлийн үнээс хамаагүй хямд. Мөн шинжилгээгээр ямар нэг зөрчил гарахгүй. Найдвартай бүтээгдэхүүн байгаа шүү” хэмээн допинг шахдаг болохыг бөхчүүд дуу нэгтэй ярьж байна.

Нэгэнт хэрэглэчихсэн бөхчүүд нэхсэн мөнгийг нь өгөхөөс өөр арга байхгүй. Ийм л авлигын сүлжээ явагдаад олон жил болж байна

            Үндэсний бахархал, өв соёлыг тээж яваа бөхчүүдэд допинг шахдаг Ж.Хатанбаатар тэргүүтэй допингийн бүлэглэл баригдсан нь сайн хэрэг. Гэхдээ бөхчүүдэд допингийг сурталчилж, шахдаг, гол зуучилдаг хүн нь М.Булган гэгч хэмээн албаныхан эд мөрийн баримтуудаар тогтоогоод байгаа гэх. Шалгалтаар М.Булганы гэрээс мөн олон төрлийн сэргээшийн бодис олдсон тухай бид өмнө нь мэдээлсэн билээ. Тэрбээр бөхчүүдэд зуучилж, допинг зарах, шинжилгээний хариуг нь допинггүй гаргаж өгөх зэрэгт гаршсан гэдгээрээ спортынхондоо танил. Өөрөөр хэлбэл, их хэмжээний мөнгө авч, бөхчүүдэд допинг зардаг гэсэн үг. Тэгээд явцын болон баяр наадмаар өгөх шинжилгээний хариуг нь сөрөг болгож дардаг. Нэгэнт хэрэглэчихсэн бөхчүүд нэхсэн мөнгийг нь өгөхөөс өөр арга байхгүй. Ийм л авлигын сүлжээ явагдаад олон жил болж байна. Хууль хяналтын байгууллагынхан ноцтой сэжүүрээс атгаад авсан учраас хэн хэн гэх бөхийн шинжилгээний хариуг дарж, допинггүй болгосон гэдэг нь тодорхой болно биз.

-ДОПИНГИЙН ТӨРЛИЙН ЭМ, БЭЛДМЭЛҮҮД БА СӨРӨГ НӨЛӨӨЛӨЛ-

                Дэлхийн спортын хорооноос хүний биед хүч тамир өгдөг эм, бэлдмэлүүдийг тамирчид хэрэглэхийг хориглосон байдаг. Тэр дундаа хүний биед хамгийн ихээр станазолол, мелдониум, гидрохлортиазид, хлориазид гэх дөрвөн төрлийн бодис хэрэглэсэн нь шинжилгээгээр ихэвчлэн тогтоогддог байна. Тухайлбал, станазолол нь гаднаас авч буй гормоны бодис бөгөөд хүчний төрлийн спортын тамирчид түлхүү хэрэглэдэг байна. Бодибилдинг, хүндийг өргөлт, бөхийн төрлийн тамирчид булчингийн массаа нэмэх зорилгоор хэрэглэдэг бүтээгдэхүүн аж. Мөн энгийн үедээ 200 килограммыг өргөдөг хүн станазолол хэрэглэвэл 350 килограммын ачааллыг ажрахгүй өргөдөг байна. Энэхүү бэлдмэлийг Чөлөөт бөхийн насанд хүрэгчдийн дэлхийн болон Ази тивийн аварга, Монгол Улсын гавьяат тамирчин П.Орхон 2018 онд Индонез Улсад болсон Азийн наадмын үеэр хэрэглэсэн нь тогтоогдож, тэмцээнд оролцох эрхээ дөрвөн жилээр хасуулж байсан юм. Мөн Монголын чөлөөт бөхийн холбоог 20 мянган ам.долларын мөнгөн торгуулиар торгохоор болж байв. Үүнээс гадна тус төрлийн бэлдмэл 2019 оны улсын баяр наадамд түрүүлсэн Э.Оюунболд арслангаас илэрч байсан юм.

Допингийн хамгийн ноцтой нь эр бэлгийн эс хэвийн бус болж, удмын санд өөрчлөлт орж, үр тогтоох боломжгүй болдог байна.

            Станазолол бэлдмэлийн сөрөг нөлөө нь хүний биеийн эрхтэн системд гаж нөлөө үзүүлж, дотоод эрхтэн системийн үйл ажиллагааг алдагдуулдаг байна. Мөн зүрхний шигдээс, хорт хавдрын эрсдэлийг нэмдэг муу талтай аж. Тухайн бодисыг хэрэглэсэн даруйд булчин томордог ч, хэрэглээгээ зогсооход бие огцом жижгэрдэг байна. Хамгийн ноцтой нь эр бэлгийн эс хэвийн бус болж, удмын санд өөрчлөлт орж, үр тогтоох боломжгүй болдог байна.

              Мөн хүний биеийн хүчийг нэмэгдүүлдэг допингийн төрлийн бэлдмэлүүд нь үнэтэй, хямдхан байхдаа гол биш байдаг аж. Тухайлбал, үнэ хямд ч гэсэн хүний биеийн судсыг өргөсгөж, цусны эргэлтийг сайжруулснаар бие хүч ойролцоо өрсөлдөгчөөсөө хэдэн илүү бяр тэнхээ гардаг байна.

СӨРӨГ НӨЛӨӨ

• LDL холестерины хэмжээ ихсэх
• Цусны даралт ихсэх
• Тромбоз
• хэм алдагдал
• Зүрхний булчинг гэмтээх
• Зүрхний шигдээс
• Зүрхний гэнэтийн үхэл
• Үргүй болох

            Энэ мэт сөрөг нөлөө ихтэй байна. Хүний биед хэчнээн хортой, эрдэнэт хүний үр удмыг нь ч таслан зогсоох аюултайг нь мэдсээр байж, Ж.Хатанбаатар тэргүүтэй хүмүүс допинг худалдаж байгаа нь харамсалтай. “Өнөөдрийн өөхнөөс маргаашийн уушги” гэдэг шиг өнөөдөр л халаас түнтгэр байвал тэнд үндэсний өв соёл хамаагүй бололтой. Допинг зарж буй Ж.Хатанбаатар, М.Булган нараас болж бөхчүүд эрүүл мэнд, амь нас, үр удамгүй болоод үлдэж байгаа юм биш үү.