- Т.МӨНХСАЙХАН САЙД АА, ИРГЭД БИШ, ЭМЧ, ЭМНЭЛГИЙН АЖИЛЧИД ЧИНЬ ХАЛДВАР ТЭЭГЧ, ТАРААГЧ БОЛЧИХЛОО. ТА ЮУ ХИЙЖ БАЙНА ВЭ-

      Монгол Улс дотооддоо коронавирусийн халдвар алдлаа. Энэ бол 2020 оны арваннэгдүгээр сарын 7-ны өдөр. Коронавирусийн халдвартай иргэдийг эмчлэх хариуцлагатай албанд ажиллаж байсан ХӨСҮТ-ийн сувилагч халдвар авсан нь тогтоогдож, дотоодын анхны халдвар тээгч эмнэлгийн салбараас “төрсөн”. Өндөр халдвар хамгаалалт, нарийн дэг журам, эрсдэлтэй галын шугаманд ажиллаж байгаа гэдгээ иргэдээс хэд дахин илүү мэдэж байсан эмнэлгийн ажилтан яагаад, хаанаас халдвар авсан бэ. Тэгээд бүүр нэг багт хамт ажиллаж байсан эмч, сувилагчдадаа халдвар тараасан. Энэ явдал даамжирсаар хот, хөдөөгөөс эмнэлгийн 40 гаруй ажилтан коронавирусийн тээгч болчихоод байна.

      Хэчнээн “Өвчин тусъя” гэж дуртайдаа халдвар аваагүй нь ойлгомжтой” хэмээн бодовч эмнэлгийн салбарт халдвар хамгааллын дэглэм барих дэг, хариуцлага хэр байгаа вэ гэдэг эргэлзэхээс аргагүй болж байна. Өөрөөр хэлбэл, тэднийг хэнэггүй зан нь “Халдвар тээгч болгож орхив уу” гэх хардлага төрж буй. Хамгийн наад захын жишээ нь, сувилагч бүсгүй халдвар авсан гэдгээ мэдэхгүй, халдварын голомтод хамт ажиллаж байсан багийнхантайгаа хамгаалалтын хувцасгүй уулзсан гэсэн үг шүү дээ.

Тэгэхээр нөгөө хамгаалалтын дэг журам ХӨСҮТ-д алдагдсан нь тодорхой байгаа юм.

Ганцхан ХӨСҮТ-ийн эмч, сувилагчаар зогсохгүй Цэргийн төв эмнэлэг, Баянзүрх дүүргийн эмнэлэг, Сэлэнгэ аймгийн Нэгдсэн эмнэлгийн эмч, эмнэлгийн ажилтнууд шил шилээ даран яагаад халдвар тээгч болоод байна вэ. Өөрсдийгөө хамгийн сайн хамгаалж, цар тахал гэдгийг дээд зэргээр мэдэж байгаа тэд халдвар авч байгаа нь үнэхээр давагдашгүй хүчин зүйл үү, давтаж болохгүй алдаа байсан уу гэдэг сонин.

Бүтэн арван сарын турш хамгаалж болсон эмнэлгийнхэн нэг л өдөр улсынхаа доторх “аюултай бүс” болж хувирлаа

Иргэдээ өдөр, шөнөгүй “хорьж”, цагдаж байгаа Монгол Улсын Засгийн газар, Эрүүл мэндийн яам, ХӨСҮТ коронавирусээр өвчлөөд байгаа эмч, эмнэлгийн ажилтнуудыг “Яаж, хэрхэн ажиллаад, өвчтнүүдээсээ халдвар авсан бэ” гэдгийг хяналтын камерын бичлэгийг шүүгээд ч болтугай олж чадахгүй гэж үү. Эсвэл үнэхээр хариуцлагагүй ажилласан гэдгийг нь хэлэхэд халуун байгаа юм уу.

Эмнэлгийн байгууллагаар ч зогсохгүй, халдваргүй иргэдийг тусгаарласан тусгаарлалтын хоёр ч байр коронавирусийн голомт болчихоод буй. Тодруулбал, нэг нь алдарт “Энхсаран” сувилал бол нөгөөх нь дотоодын халдварыг тараасан гэх иргэн Д-гийн ойр хавьтлуудыг тусгаарласан “Алтай” зочид буудал. Өрөөнөөсөө 21 хоног хамраа ч цухуйлгаагүй иргэд “Энхсаран” сувиллаас халдвар авч, түүгээр ч зогсохгүй тус сувиллын үйлчлэгч, хоол, хүнсний ажилтан хүртэл халдвар тээгч болсныг зарласан цаг саяхан. УОК тэргүүтэй албаныхан “Бид холбогдох албан тушаалтнуудыг шалгаж байгаа” гэхээс өөр мэдээлэл өгөхгүй, дээрх сувилал, зочид буудлын хариуцлагагүй эздийг ёстой л цээжээрээ хамгаалсаар байгаа.

Иргэд мянга сайн хамгаалаад ч, эмнэлгийн салбарт, тусгаарлах байранд коронавирусийн халдвар хэдийн тархчихсан байсан нь эмнэлгийнхэн хийгээд тусгаарлах байрныхны байгаа байдлаас харагдана. Шуудхан хэлэхэд, коронавирусийн халдварын хамгийн том голомт нь ХӨСҮТ тэргүүтэй эмнэлэг, тусгаарлах байрны эмч, ажилтнууд болсон гэсэн үг.

Албаныхан “Ажиллах хүчний нөөц хангалттай бий” гэж байгаа ч олон хоног нойр хоолгүй, амрах чөлөөгүй ажиллаж байгаа хүмүүс нь эмч эмнэлгийн ажилчид. Магадгүй хэт их ачаалалтай ажиллаж байгаа тэдний дархлаа унаж, халдвар авсан байхыг ч үгүйсгэхгүй. Гэхдээ хамгийн гол нь эмч, эмнэлгийн ажилчдаас халдвар илэрсээр байвал цаашид хэрхэх вэ, энэ салбар. Хэрэв халдварыг энэ мэт хайхрамжгүй, байдлаасаа алдсаар байвал Монгол Улсад иргэдээ эмчлэх эмч үлдэх нь үү. Эмнэлгийн салбараасаа халдвар авсаар байвал эрүүл иргэн үлдэх үү.

Эмнэлгийн ажилчид халдвар авчихсан байгаа нь нөхцөл байдлыг улам эрсдэлтэй болгож байна шүү дээ. Тэртээ тэргүй л галын шугаманд нээлттэй ажиллаж байгаа эмнэлгийн салбар нь “түймэр” алдаж байхад иргэд мянга хамгаалаад нэмэргүй болчихов уу гэх айдас, хардлага нийтийн дунд төрж байна. Аюул доторх аюултай бүсээ аюулгүй, эрсдэлгүй, хариуцлагатай болгоё, Эрүүл мэндийн сайд аа.

Дэлхий нийтэд хэдэн мянган эмч, сувилагч, эмнэлгийн ажилтан коронавирусийн халдвар авч, зарим нь амиа алдаж байгаагийн гол шалтгаан нь хамгаалалтын хувцас хомстсоноос болсон гэдгийг мэргэжилтнүүд нь хэлсээр буй. Гэтэл манай улсад сайд таны хэлснээр хамгаалалтын хувцас, хэрэглэл хангалттай байсаар байгаа юм бол “Эмнэлгийн ажилчид ийм олноороо яагаад халдвар аваад байна вэ” гэх асуултад нэн даруй хариулж өгнө үү.