Үндэсний бөхийн ёс жудаг зарим нэг овлигогүй бөхөөс болоод алдагдаж, нэр хүнд нь тартаа унасныг хэн хүнгүй л мэднэ. Тэр дундаа допинг хэрэглэж, ард түмний уур бухимдлыг хүргэж байгаа хэдэн бөхөөс болж монголчууд жилийн дөрвөн улиралд бухимддаг болоод удаж байна. Гэтэл “Дайны хажуугаар дажин” гэгчээр бусдад үлгэр дуурайлал үзүүлэх ёстой улсын том цолтой бөхчүүд хэрээс хэтэрсэн үйлдэл гаргадаг нь нууц биш. Өрсөлдөгч бөхөө санаатайгаар ёврох, тохойлдох, цохих гээд хөөдөг жудаггүй бөхчүүдийг дурдаад байвал дуусахгүй. “Гарьд магнай” уран сайхны кино дээр молиго Очир “Монгол бөхийн зүлэг ногоон дэвжээ ёс бус зүйлээр сэвтэх ёсгүй” хэмээдэг. Гэтэл өнөө цагийн үндэсний бөхийн зүлэг ногоон дэвшээ ёс бус үйлдлээр сэвдэж дууслаа. Энэ цаг үеийн хүчит арслан Ц.Содномдорж олон түмний хайр хүндлэлийг хүлээсэн бөх мөнөөс мөн. Гэтэл ёс зүйгүй үйлдэл гаргаж олны дургүйцлийг хүргээд багагүй хугацаа өнгөрлөө.

2022 онд улсын арслан Ц.Содномдорж дөрвөн бөхөөс шинжилгээ авахыг шаардаж, Допингийн үндэсний төвд хүсэлт  гаргасан гэх мэдээлэл хэвлэл мэдээллийн хэрэгслээр цацагдсан

           Эр бяр нь цээжиндээ багтахаа болиод овлигогүй зан гаргаад байдаг юм уу, эсвэл ард түмний хүндлэлд хахаж, цацсандаа аархаад байдаг юм уу. 2023 оны улсын баяр наадмын Үндэсний бөхийн барилдааны зургаагийн даваанд Г.Бадрах харцагыг өвдөг шороодуулаад хоёр гараа нүүр рүү нь чиглүүлээд зангидсан. Хальтхан харсан хүнд бол бараг л салаавч гаргаж байгаа мэт харагдаж байлаа. Мөн улсын даян аварга Н.Батсуурьтай барилдаж, оноосон хугацаанд давалцаагүйн улмаас дүрмийн дагуу элэг бүс тайлсан. Гэхдээ тухайн үед Н.Батсуурь аваргад хандан “Би чамайг амьдрал дээр янзална” хэмээсэн нь олны дунд шуугиан тарьсан. Үнэхээр Ц.Содномдорж дургүй бөхчүүдээ амьдрал дээр янзалчихдаг нэгэн мөн үү. Олны дунд ам дамжсан нэгэн яриа бий. Тухайлбал, “Ц.Содномдоржийн эгч Допингийн эсрэг үндэсний төвд ажилладаг. Тиймээс Ц.Содномдорж дургүй бөхчүүдээсээ допингийн шинжилгээ авахуулах хүсэлт гаргадаг. Үүнийг нь Допингийн төв ёсоор болгодог” гэх яриа гараад багагүй хугацаа өнгөрч байна. Үнэхээр Ц.Содномдоржийн эгч Допингийн эсрэг үндэсний төвд ажилладаг учраас тэр аархуу байна уу.

2021 онд Монгол Улсад залуучуудын байгууллага үүсэж хөгжсөний 100 жил, Монголын үндэсний бөхийн холбооны 30 жил, Монгол бөхийг дэлхийн дээд амжилт Гиннест бүртгүүлсний 10 жилийн ойд зориулсан хүчит бөхийн барилдаан болсон. Тус барилдааны гурвын даваанд Ц.Содномдорж, Э.Оюунболд нар учраа таарч, Э.Оюунболд арслан давсан. Гэтэл тавын давааны үеэр Ц.Содномдорж арслан Э.Оюунболд дээр очин допингийн шинжилгээ өгөхийг шаардсан. Шаардлагын дагуу шинжилгээ өгсөн Э.Оюунболдоос тун удалгүй допинг илэрсэн удаатай. Үүнээс  гадна тухайн жилийн есдүгээр сард 512 бөхийн шинжилгээний хариу БНСУ-аас ирсэн. Допинг илэрсэн бөхчүүдийн нэрс дунд Ц.Содномдорж арслангийн нэр дуулдаж байлаа. Гэтэл хэсэг хугацааны дараа албаны хүмүүс “Ц.Содномдорж байгаагүй, өөр дөрвөн хүнээс допинг илэрсэн” хэмээн зарласан. Тухайн үед шинжилгээ өгсөн бөхчүүд өөрсдийн хариугаа цахим ертөнцөд тавьж, допинг илрээгүй гэдгээ зарласан. Харин улсын арслан Ц.Содномдорж цахим нүүр хуудастаа шинжилгээний хариугаа нийтлэх нь байтугай ганц ч үг ганхийхгүй байсаар энэ үйл явдал мартагдсан.

         Хөвсгөл аймгийн баяр наадмыг будилаантуулж, нударга зөрүүлээд амжсан нэгэн

          Үүнээс гадна 2022 онд улсын арслан Ц.Содномдорж дөрвөн бөхөөс шинжилгээ авахыг шаардаж, Допингийн үндэсний төвд хүсэлт гаргасан гэх мэдээлэл хэвлэл мэдээллийн хэрэгслээр цацагдсан. Ингэхдээ улсын аварга Н.Батсуурь, гарди М.Бадарч, харцага Н.Золбоо, аймгийн арслан Ц.Бямба-Отгон нарын дөрвөн бөхөөс допингийн шинжилгээ авах хүсэлт гаргаж, шинжилгээний төлбөрийг хувиасаа гаргах хүсэлтэй байгаагаа илэрхийлсэн гэх мэдээлэл нэг хэсэг шуугиан тарьсан. Энэ мэт улсын арслан Ц.Содномдорж овлигогүй хүн гэдгээ батлан харуулж ирсэн. Мөн Хөвсгөл аймгийн баяр наадмыг будилаантуулж, нударга зөрүүлээд амжсан нэгэн. Үүнийхээ дараа өөрийн нүүр хуудсаар цахим ертөнцөд шууд бичлэг хийж, ард түмнээр аргадуулчихдаг зальжин нэгэн гэгддэг билээ.

           Энэ мэт ёс зүйгүй бөхчүүд ард түмний хайр хүндлэлийг далимдуулан зүлэг ногоон дэвжээнд удаа дараа ёс зүйгүй үйлдлээ гаргасаар байгаа нь харамсалтай. Угтаа бол Монгол бөхийн дэвжээ хамгаас ариун байх ёстой гэдэг.