Төрийн томчууд ээлж дараалан БНСУ-ыг зорих болов. Тэд Солонгост ажиллаж, хөдөлмөрлөж, сурч байгаа иргэдэд чухам хайртай болж, ийн ээлж дараалан зорих болсон нь учиртай. Үндсэн хуулийн өөрчлөлтөөр сонгуулийг холимог тогтолцоогоор явуулахаар хуульчилж, гадаад улсад оршин суугаа Монгол Улсын иргэд сонгууль өгөх бүрэн боломжтой болсон.

   Угтаа бол гадаад улсад оршин суугаа нийт иргэдийн талаас илүү хувь нь БНСУ-д ажиллаж, амьдарч байгаа гэх судалгаа бий. Тодруулбал, тус улсад нийт 36 мянга гаруй иргэн оршин сууж байгаагаас 18 мянга нь хууль бусаар оршин суудаг гэх албан бус мэдээлэл байдаг. Тэгэхээр гаднын улсад суугаа иргэдийн санал сонгуулийг холимог тогтолцоогоор орхигдуулж болохгүй санал болчихоод байгаа нь яалт ч үгүй төрийн томчуудын айлчлалаас тодорхой харагдаж байна.

    Тиймдээ ч БНСУ-д төрийн гурван өндөрлөгөөс хоёр нь жил алгасалгүй айлчилж, энэ үеэрээ Солонгост визгүй зорчуулах асуудлыг ээлж дараалан хөндөж, тэдний өмнө бөхөлзөж байгаад  ирлээ. Өнгөрсөн хоёрдугаар сард Ерөнхий сайд Л.Оюун-Эрдэнэ тус улсад айлчлал хийх үеэрээ БНСУ-ын Ерөнхий сайд Хан Дог Сүтэй албан ёсны уулзалт хийж, хэд хэдэн асуудлын ярилцсаны нэг нь визний хөнгөлөлтийн асуудал байв. Энэ талаар “Хоёр улсын хамтын ажиллагааг өргөжүүлэх чухал нөхцөлүүдийн нэг нь иргэд харилцан чөлөөтэй зорчих явдал гээд хоёр улсын иргэд харилцан адил байх зарчмын үүднээс Монгол Улсын иргэдийг ирэх гурван жилийн хугацаанд визийн шаардлагаас чөлөөлөх, эрүүл мэндийн шугамаар зорчих монголчуудын визний нөхцөлийг хөнгөвчлөх, хэтдээ харилцан визгүй зорчдог болох чиглэлд БНСУ-ын Засгийн газраас онцгойлон анхаарахыг хүсэж байна” гэсэн удаатай.

     Тэгвэл өнгөрсөн амралтын өдрүүдэд УИХ-ын дарга Г.Занданшатар мөн л БНСУ-д албан ёсны айлчлал хийх үеэрээ хоёр улсын визний хөнгөлөлтийн асуудлыг хөндөж ярьсан байна. Улмаар энэ удаагийн айлчлалаар “Солонгос Улсад амьдарч байгаа иргэдийн болон хүүхдийн эрхийг хамгаалах чиглэлээр арга хэмжээ авч ажиллахаар болсон байна. Мөн хөгжлийн зээл тусламжийг дэмжиж, ажиллах хүчийг нэмэгдүүлэх чиглэлд анхаарах, гуравдугаарт, хөгжлийн бэрхшээлтэй, иргэд, спортын анагаах ухаан, сэргээх засах чиглэлээр үе мөчний өвчнийг эмчлэхэд дэмжлэг үзүүлж, тус улсын зээл тусламжаар Монгол Улсад эмнэлэг барих асуудлыг ярилцсан” хэмээн УИХ-ын дарга Г.Занданшатар онцолсон.

     БНСУ-аас хууль бусаар оршин суугаа иргэдийг дайлчлан гаргах ажлыг сүүлийн жилүүдэд улам бүр эрчимжүүлж эхэлсэн. Улмаар Монгол Улсаас хууль бусаар оршин суугчдын тоо жилээс жилд нэмэгдэж байгаа энэ үед тус улсад иргэдийг визгүй зорчуулах нь битгий хөнгөлттэй зорчуулах асуудалд ч хойрго хандах нь тодорхой. Ийм цаг үед эрх баригчид ирэх сонгуульд гал унтраах төдий арга хэмжээ авч, “Солонгос Улс руу визгүй зорчих асуудлыг ярилцаж байгаа, нааштай байгаа” гэх маягаар оноо авах ажлууд хийж байгаа нь ч нууц биш юм.

     Нэг ёсондоо төрийн бодлого алдагдаж, сонгууль угтсан шийдвэр гаргадгийн бодит жишээ энэ болох нь. Дөнгөж их сургуулиа төгссөн идэр залуухан ажиллах хүчнүүд эх орон, элгэн саднаа орхин харийн оронд ажиллахаар хэдэн мянгаараа явж байгаа. Тэр байтугай визэнд орох гэж өдөр, шөнөгүй дугаарлаж зогсох нь хүртэл залуучуудын хувьд мөрөөдөл болчихсон. Ийм цаг үед энэ урсгал хөдөлгөөнөө хязгаарлах арга хэмжээ авах нэн тэргүүний ажил баймаар. Бодит байдал дээрээ дээд боловсрол эзэмшсэн иргэний хөдөлмөрийн үнэмэлж, гаднын улс тэр тусмаа Солонгос Улсад аяга угааж, ачаа зөөж байгаа иргэдээс хямд байгаад учир байгаа юм. Хэрэв ээ эх орондоо эрүүл аюулгүй, хөдөлмөрийн хөлс нь үнэлэгддэг, авсан цалин нь амьдрал ахуйд нь хангалттай хүрэлцдэг байсан бол Солонгосын визийг үнэгүй болгож, хэдэн мянгаараа тус улсад хараар ажиллах ямар ч шаардлага байхгүй гэдгийг захын хүн хэлээд өгнө.

     Солонгос Улсад ажиллаж амьдарч байгаа залуус, иргэдийн эрхийг асуудлыг ч хөндөж, анхаарах цаг болсон гэдгийг тус улсад эрх нь болсон олон сэртхийлгэм хэргүүдээс харж болно. 

Өнгөрсөн зургадугаар сард гэхэд л гурван настай монгол хүүг аавынх нь хамт түр саатуулах байранд хорьж, хүүхдийн эрхийг зөрчсөн асуудал олон нийтийг цочроосон. Мөн 2021 онд Монгол Улсын иргэн БНСУ-д гэрээтээр ажиллаж, хугацаа нь дууссан ч үргэлжүүлэн ажиллах 22 настай залуу цалингаа авч чадалгүй зодуулж, амиа алдсан. Улмаар олон хоногийн дараа гэрээс нь цогцсыг нь олсон талаар ар гэрийнхэн нь мэдээлэл хийж байлаа.

     Мөн 2022 онд солонгос үйлдвэрийн захирал нь монгол эмэгтэйд гар хүрч, хүч хэрэглэж байгаа бичлэг цахим орчинд дэлгэгдэж байв. Энэ мэтээр гаднын улсад амьдарч байгаа иргэдийн эрх зөрчигдөж буй асуудалд анхаарал хандуулах, эрх зөрчигдсөн иргэдийнхээ эрх ашгийг хамгаалах асуудлыг хөндөж ярих байтал төрийн томчууд биелшгүй мөрөөдөл болсон визгүй зорчих асуудлаа ээлж дараалан гуйж, солонгосчуудын өмнө бөхөлзөж байгаад ирдгээ зогсоомоор байна. Хэдэн арван жилээр улсаараа хууртлаа. 

Яг үнэндээ төрийн бодлого шийдвэр улам бүр харалган болж, хөрсөн дээр буусан шийдэлд хүрч чадахгүй байгаагийн тод жишээ энэ болж байна.