Нийслэл хотын түгжрэлийг буруулахын тулд 450 тэрбум төгрөг төсөвлөөд ердөө л хашлага барих, автомашиныг улсын дугаарын тэгш сондгойгоор явуулах арга хэмжээг авч ажиллаа. “Ядаж байхад яр” гэгчээр өнөөдөр дугаарын тэгш, сондгойгоор явах хугацаа дуусаж байна. Нэг үгээр бол Улаанбаатар хотын зам автомашины ачаалал, хөдөлгөөнөө дийлэхгүй “тэг зогсолт” хийх нь ээ. Хот хариуцсан сайд Ж.Сүхбаатар “Нийслэлийн түгжрэлд сургууль, цэцэрлэгийн бөөгнөрөл хамгийн их хамааралтай. Энэ намар түгжрэлийн эсрэг байж болох бүх арга хэрэгслээ ашиглана. Эсэргүүцэл шүүмжлэл ирсэн ч хамаа байхгүй. Хуулийн төслөө УИХ-д өргөн мэдүүлнэ. Түгжрэлийн бүсүүдийг санал болгоно. Амьдралын нөхцөл байдалтай уялдуулан хуулийн төсөл оруулна" гэж хэлсэн нь сонгууль хүлээж байгааг төвөггүй илтгэнэ. Хэрэв тэр түгжрэлийг бууруулах гэж өдөр, шөнөгүй бодсон, төлөвлөгөө гаргаж, судалгаа хийсэн бол нэг жилийн хугацаанд нэг алхам хийчих байсан. Сайдын суудалд заларсан өдрөөсөө тэр ажиллах байлаа. Угтаа ажиллаад л, ажиллаад л байсан чинь 14 хоног тэгш, сондгойгоор явуулах зохицуулалттай л байна. Эцэс сүүлд нь, ирэх жил түгжрэлийн эсрэг авч болох бүх арга хэрэгслээ ашиглах аман амлалт өгчихөөд сууж байна. Энэ нь, энэ амлалтын хугацаа болоход сонгууль болчихсон байна шүү л гэсэн үг. Түгжрэлийн асуудлаар бодлого тодорхойлж ажилласан ажлын үр дүн нь энэ намар ч, ирэх намар ч харагдахгүй бололтой.

Хотын төвөөс Нисэх орох зам багадаа 3-5 түгжрэх жишээтэй байлаа. Харин өнөөдрөөс эхлээд энэ ачаалал хоёр дахин нэмэгдэж “тэг зогсолттой” өдрүүдийг арай ядан давах нь ээ.

            Сургууль, цэцэрлэгийн үйл ажиллагаа эхэлсэнтэй холбоотойгоор хэрэгжүүлсэн автомашины улсын дугаарын тэгш, сондгойгоор зорчуулсан эдгээр өдрүүдэд түгжрэл ямар байсныг хэн хүнгүй мэднэ. Цагдаа нар дугаарын тэгш, сондгойг ялган зорчуулах нэрийдлээр зам голлож зогсоод түгжрэл үүсгэнэ. Хотын төвөөс Нисэх орох зам багадаа 3-5 түгжрэх жишээтэй байлаа. Харин өнөөдрөөс эхлээд энэ ачаалал хоёр дахин нэмэгдэж “тэг зогсолттой” өдрүүдийг арай ядан давах нь ээ. Түгжрэлээс үүдэн хүмүүс ажилдаа хоцорч, хүүхдүүд сургууль, цэцэрлэгээсээ хоцрох болоод байна. Түгжрэлээс болж төлөвлөсөн ажил нурж, уур бухимдалтай жолоочын тоо өдөр бүр олширсоор. Хувь хүн, гэр бүлийн байдлаас үл хамааран нийгэмд тулгарч буй түгжрэлийн асуудал хэрээс хэтэрлээ. Ажилдаа явж, ирэхэд нэгээс хоёр цаг зарцуулдаг байсан бол одоо 3-4 цагийг түгжрэлд өнгөрөөх болжээ. Үндсэндээ Улаанбаатар хот тэг зогсолт руу шилжлээ.

Улаанбаатар хот тэг зогсолт руу шилжлээ

Нийслэлийн Замын хөдөлгөөний төлөвлөлт, зохицуулалт, инженерчлэлийн газраас түгжрэлийг бууруулах хэд хэдэн шийдэл гаргасан ч өнөөдрийг хүртэл хэрэгжүүлээгүй, дорвитой арга хэмжээ огт авсангүй. Хэрэгжүүлнэ гэж хэлээд хэрэгжүүлж байгаагүй зарим ажлуудыг нь дахин нэг сануулъя.

·         Авто зогсоолуудын нэгдсэн системийг бий болгох.

·         Нийтийн тээврийг боловсронгуй болгох.

·         Нийтийн тээврийн тоог нэмэхээс гадна, дүүжин тээврийг нэвтрүүлэх, ажилчид, сургуулийн автобус явуулах.

·         Сургуулийн автобусны тоог 200-гаар нэмнэ.

·         CAR SHARE нэвтрүүлэх. Жишээлбэл, ажлын газар нь ойролцоо байдаг хөрш айлууд ажил руугаа нэг машинаар зорчих байдлаар түгжрэлд стресстэхгүй зорчих уриалга гаргах.

·         Түгээлтийн машинуудыг шөнийн цагаар явах

·         Зах, худалдааны газруудыг оройн цагаар ажиллуулах Хил, гаалиар буруу талдаа жолооны хүрдтэй авто машин оруулж ирэхийг үе шаттайгаар хориглох

·         Их сургуулиудыг хотын төвөөс аймаг, алслагдсан дүүрэг рүү нүүлгэх

·          Метроотой болох

            Энэ мэтчилэн асар олон ажлуудыг хийхээр төлөвлөж улсын төсвөөс хонхойтол мөнгө авдаг. Гэвч эцэст нь сургууль, цэцэрлэгийн үйл ажиллагаа эхлэхтэй зэрэгцээд автомашины дугаарын тэгш, сондгойгоор зорчуулах шийдэл олж хэрэгжүүлээд дуусдаг нь нууц биш. Цаашдаа энэ л аргаараа иргэдийн толгойг сэнхрүүлж, төсвийн мөнгөнөөс үе, үеийн дарга нар халаасаа зузаалсаар байх уу. Ж.Сүхбаатар түгжрэл бууруулахад зарцуулсан мөнгөнийхөө үр дүнг тайлагнаж чадахгүй мунгинах аж. Үүнээс харвал Улаанбаатарын түгжрэл дарга нарын мөнгө идэх арга болсон гэсэн үг. Чухамдаа, Ж.Сүхбаатар нь иддэг юм уу, Хотын дарга нь иддэг юм уу, мэдэхгүй. Ямартай ч энэ намар их, дээд сургуулийг хотоос нүүлгэн шилжүүлэх үлгэрийн бодлоготой, тэгш, сондгойгоор нь зорчуулах “супер” төлөвлөгөөтэй л түгжрэлийн эсрэг үзэж, тарж байна. Тэгсэн ч тэг зогсолт хийсээр байна. Цаашдаа ч тэг зогсолт хийсээр л байх уу.