Өглөө 06:30 цаг, Нисэх, Яармагийнхан хотын шинэ захиргааны орчмоос эхлээд л төв рүүгээ түгжрээд зогсчихож байна. Тэрнээс нааш Хүннү молл, Яармагийн гүүр, Мишээл экспо, Таванбогд гэж цаг гаруй гэлдэрсээр сая нэг Нарны гүүр давж, дугаарын хязгаарлалтай бүс рүү нэвтэртэл Баруун дөрвөн замын уулзвар дөрвөн тал руугаа л таг байх аж. Төв замын, Төрийн ордон “гороолсон” түгжрэлийн тухайд яриад ч хэрэггүй биз. Түгжрэлийн сайдын “халаасанд” байсан “төгс” төлөвлөгөө буюу тэгш, сондгойгоор хязгаарлах шийдлийг 12 хоног туршсан ч үр дүн өчүүхэн төдий гарсангүй.
Тайлбар: 2023.09.06, 07:01 цаг, Яармаг
Хатуухан хэлэхэд, Ж.Сүхбаатар хавар хүүхдүүдийн хичээл амармагц л хамт “алга болсон”. Зуны саруудад түгжрэл сийрэг байх учраас тэр өөрөө өөртөө “амралт” өгсөн гэлтэй. Зургадугаар сарын 20-нд “Түгжрэл бууруулах үндэсний хорооны хуралдаан” гэх хэдэн зураг нийтэлсэн. Долдугаар сарын 8-нд тойргийнхоо иргэдийг төрийн одон, медалиар шагнаж, 9-нд нь Төрийн ордонд болсон Эдийн засгийн форум дээр, 12-нд нь Хүй долоон худагт хальт харагдсан. Түүнээс хойш сураг нь тасарч, Нийслэл хот үерт нэрвэгдэж, түгжирч явсан автомашинууд тэр аяараа урсаж байхад ч Ж.Сүхбаатар сайд гарч ирээгүй. Хүй долоон худагт харагдсанаасаа сар гаруйн дараа буюу наймдугаар сарын 18-нд нэгдүгээр хорооллын араар тавигдаж авто зам дээр нэг үзэгдсэн. Ингээд хамгийн сүүлд, найм хоногийн өмнө буюу хичээл эхлэхтэй зэрэгцээд хэвлэлийн хурал хийгээд гараад ирж байгаа юм. Ард түмэнтэйгээ хамт амарч, зуны саруудыг зугаалж өнгөрүүлэх биш намар нийслэлийг “0” зогсохоос яаж аврах тухайд чилж суух ёстой байсан.
Ийнхүү зунжин “зугаалсан” Ж.Сүхбаатар найм хоногийн өмнө гарч ирж, хэвлэлийн хурал хийхдээ “Бид аль болох хувийн автомашиныг хязгаарлаж, автобусаар зорчуулах бодлого барьж байгаа” гэж мэдэгдсэн. “Хувийн машиныг хязгаарлана” гэдэг нь хэт коммунист бодлого боловч “түгжрэлгүй л байвал” гэж хэн хүнгүй л хүлцэж, тэгш, сондгойгоор хязгаарлуулаад 10 гаруй хоносон ч үр дүнгүй гэдэг нь батлагдлаа. Одоо Ж.Сүхбаатар жолооч нарыг эр, эм хүйсээр нь хязгаарладаггүй л юм бол түүнд өөр шийдэл байгаа гэдэгт нь ард түмэн эргэлзэж байна.
Өнгөрсөн оны яг өдийд Ж.Сүхбаатар Түгжрэл буруулах үндэсний хорооны дарга буюу Түгжрэлийн сайдын сэтэр зүүж байв. Нарийвчилбал, яг нэг жил, долоо хоног өнгөрч байна. Түгжрэлийг бууруулах ажлыг Хотын дарга дангаараа дөнгөхгүй юм байна гэж үзэж Засгийн газраас хамтрагч томилсон нь Түгжрэлийн сайд Ж.Сүхбаатар. Тэгээд болоогүй, Засгийн газраас түгжрэл бууруулахад зориулж 420 тэрбум төгрөгийн төсөв ч гаргаж өгсөн. Харамсалтай нь, Түгжрэлийн сайдтай, түгжрэл бууруулах тусгайлсан төсөвтэй болоод бүтэн жил өнгөрч буй атал тэгш, сондгойгоор хязгаарлахаас өөр гаргасан шийдэлгүй, төв замын нэгдүгээр эгнээнд төмөр хашлага тавьснаар өөр хийсэн ажилгүй, түгжирсэн хэвээрээ л сууцгааж байна. Уг нь, Ж.Сүхбаатар сайдад түгжрэлийг бууруулах зорилготой, зоригтой ажил хийж эхлэх хугацаа ч байлаа, төсөв нь ч байлаа.
ЭР, ЭМ ХҮЙСЭЭР НЬ ХЯЗГААРЛАХААС ӨӨР ЭЦСИЙН ШИЙДЭЛ БАЙНА УУ, Ж.СҮХБААТАР САЙД АА |
|