“Монголын Үндэсний Допингийн эсрэг төв төрийн наадамд амжилт гаргаж, дээгүүр барилдсан бөхчүүдийн амжилтаар бизнес хийдэг юм биш биз” гэх хардлага ард иргэдийн дунд түгээд багагүй хугацаа өнгөрч байна. Жил бүр л олныг хоёр талд гарган талцуулдаг асуудал бол допинг.  Үүнээс болж уул, ус, нутаг, жалгаараа хуваагдан байлдахад ч бэлэн байдаг гэхэд хилсдэхгүй. Эцэс сүүлд нь хөлс хөдөлмөрөө зарцуулан байж амжилтад хүрсэн тамирчин хохирдог эмгэнэлтэй дүр зураг л үлддэг. Үүнд хэн ч хариуцлага хүлээдэггүй бөгөөд тамирчин хүн л цол гуншин, барилдах эрхээ хасуулснаар урд хугацаанд хэрүүл тэмцэл хийсэн жүжиг төгсдөг гэж хэлж болно. Жүжгийн төгсгөлд хариуцлага хүлээх ёстой эрх бүхий байгууллага биш жирийн нэгэн тамирчин эсрэг дүрийн баатар болоод үлдэж буй нь инээдэмтэй. Улсын баяр наадамд дээгүүр барилдаж цол, чимэг нэмсэн бөхчүүд үнэхээр допинг хэрэглээд байна уу, эсвэл тэднийг допинг хэрэглэсэн мэтээр харагдуулаад байна уу. Үүнийг шалгах ёстой хууль хяналтын байгууллага олигтой тайлбар хийж, асуудлыг нэг талд нь гаргахгүй байгаагийн шалтгаан юу вэ. Шалтгаан нь ердөө л мөнгө биш биз. Тухайлбал 2018 онд Монголын үндэсний бөхийн холбооноос дараах мэдээллийг хийж байв. Тухайн мэдээлэлд “Монголын үндэсний бөхийн нэр хүндийг олон жилийн турш унагаж байгаа УИХ-ын гишүүн, дархан аварга Б.Бат-Эрдэнийн “Аварга” Дээд Сургуулийн захирал, багш, ажилчид, ах дүү, эхнэр нөхрөөс бүрдсэн допингийн хууль бус бизнес, шантааж, начны найраа буюу мөнгө авч зориудаар унаж өгөх зэрэгтэй тууштай тэмцэж байгаа ч дээрх бүлэглэл нь шүүх, прокурор, цагдаа, АТГ, ХЗДХЯ-нд өөрийн гэсэн гар хөлтэй сүлжээ болчихсон байгаа тул олон бэрхшээлтэй нүүр тулж байна. "УИХ-ын гишүүн, дархан аварга Б.Бат-Эрдэнэ болон улсын наадмыг найраа хийж мөнгө босгодог ахмад бөхчүүд нийлж өөрийн хамаарал бүхий “Допингийн Эсрэг Төв” ТББ гэгчээрээ өөрийнх нь фракцийн биш, үгэнд нь ордоггүй, найраанд ордоггүй, ид барилдах насан дээрээ яваа бөхчүүдийг допинг илэрсэн гэсэн худал дүгнэлт гаргуулж, нэр хүндэд нь халдаж, айлгаж, дарамталдаг” гэсэн байгаа юм. Цаашилбал “БНСУ руу явуулсан бөхчүүдийн шээс нь өөр хүний шээс болж, тэндээс ирсэн хариу энд зарласан хариу зөрөх тохиолдол гарах боллоо” гэх мэдээллийг олон нийтийн сүлжээгээр удаа дараа мэдэгдэж байв. Гэвч энэ асуудал “Шинэ юм од болж, хуучин юм ул болно”  гэгчээр тэгс хийгээд намжиж байсныг хэн хүнгүй мэднэ.

Улсын баяр наадамд дээгүүр барилдаж цол, чимэг нэмсэн бөхчүүд үнэхээр допинг хэрэглээд байна уу, эсвэл тэднийг допинг хэрэглэсэн мэтээр харагдуулаад байна уу. Үүнийг шалгах ёстой хууль хяналтын байгууллага олигтой тайлбар хийж, асуудлыг нэг талд нь гаргахгүй байгаагийн шалтгаан юу вэ.

                Жил бүрийн наадмын дараа хоёроос гурван бөх допингийн асуудалд хутгалддаг жишиг тогтсон гэж хэлж болохоор боллоо. Допинг хэрэглэсэн бөхчүүд харилцан адилгүй хариуцлага хүлээдэг нь ч инээдэмтэй. Үүнээс гадна шинжилгээний хариундаа бүдэрсэн бөх гайхаад Допингийн эсрэг төвөөс асуухад “МҮБХ-оос асуу” гэдэг байна. МҮБХ нь “Допингийн эсрэг төвөөс асуу, Б сорьцын шинжилгээгээ дахин өгөх үү” гэдэг байна. Удаж, удаж нэг юм ирсэн шинжилгээний хариунаас болж бүхэл бүтэн нэг улирал хэрүүл тэмцэл хийдэг. Эцэст нь тамирчин хохироод үлддэг. Энэ бүхний ард яг юу байна вэ. “14 хоногийн дотор шинжилгээний хариу бүрэн гарах ёстой” хэмээн заасан байдаг. Гэвч бараг сарын дараачаас л допингийн шинжилгээний хариу увж цувсаар ирдэг. Энэ нь олны дунд хардалт, асар их хэрүүл маргааныг дагуулдаг. Шинжилгээний хариу нь ирээгүй бөхийн эрэлд бүгдээрээ гарч, цахим орчинд бусдыг гүтгэх доромжлох байдал газар авдаг нь нууц биш.

Допинг хэрэглэсэн бөхчүүд харилцан адилгүй хариуцлага хүлээдэг нь ч инээдэмтэй. Үүнээс гадна шинжилгээний хариундаа бүдэрсэн бөх гайхаад Допингийн эсрэг төвөөс асуухад “МҮБХ-оос асуу” гэдэг байна. МҮБХ нь “Допингийн эсрэг төвөөс асуу, Б сорьцын шинжилгээгээ дахин өгөх үү” гэдэг байна.

Тиймээс Монголын үндэсний допингийн эсрэг төвийн удирдах албан тушаалтнуудыг ажлаас нь чөлөөлж, оронд нь ажлаа хийж чаддаг хүн томилбол яасан юм бэ. Олон жил хөлс, хөдөлмөрөө зарцуулсан тамирчны алдар нэрээр мөнгө хийдэггүй, дургүй бөхөөсөө допинг илрүүлдэггүй, ажлаасаа хийж чаддаг хүн энэ салбарт дутагдаад байгаа юм биш үү.