Цар тахалгүй жилийн баяр наадмаараа дэнж хотойтол сайхан наадаж байна даа, монгол түмэн минь. Гэсэн ч наадмын дуулианд эдийн засаг, инфляцийн муу үзүүлэлт, үнийн өсөлт замхарч, нэг өдрийн бороонд нийслэлээрээ урсчих гээд цагийн нөхцөл ороо бусгаа хэвээрээ л байна. Харин “хар толгой”-гоороо улс, эх орноо хариуцах хариуцлагатай ажилд сонгогдсон төрийн түшээд аймаг, сумдын наадамд хэсээд, улсын нөхцөл байдал, улс төрд хэлэлцэх асуудлаа ч тоож байгаа юм алга. Найрын ширээ тэнэж, хойморт нь сууж даналзах “дон” нь хөдөлчихөөд тогтож сууж чадахгүй байгаа бололтой.

                2024 оны ээлжит УИХ-ын сонгууль болоход жил хүрэхгүй хугацаа үлджээ. Хэзээнээс л жил хүрэхгүйн өмнө эхэлдэг байсан сонгуулийн ажил эхэлдгээрээ эхэлж, хаврын чуулган дууссан сургаар УИХ-ын гишүүд тойргоо услахаар данхан данхар жийпээ хангинуулж яваад, бүр сураггүй боллоо. Сураг нь дуулдаж байгаа хэд нь найрын ширээний хойморт эсвэл нум татаж, сум харваад, зарим нь бүр шагай ч харваж байгаа үзэгдэх. Тэгээд юун УИХ-ын намрын чуулганаар хэлэлцэх хуулийн төслүүдийг бодож, санах манатай “Тэрийг тэгэвэл наадам сайхан болно”, “Ингэж хийгээд байвал бөх, хурдан морь, сур харваа сайжирна” гээд цэцэрхээд сууж байх. Ямар ухаандаа л төсөв нь хаанаа ч хүрэхгүй болоод хандив нэрээр нутгийнхаа иргэдээс мөнгө “саасан” наадам дээр очоод “Би ингэж ажиллаж байна. Ирэх жилүүдэд ингэнээ хө, дэмжээрэй. Нээрээ тэр замыг чинь би бариулсан шүү дээ” гээд сууж байх вэ дээ.

Бас ч гэж төрийн шагнал төмөр болчихсоныг хэлэх нь зүй болов уу. Орон нутгийн тэгш ой, баяр наадмыг муулж байгаа юм биш. Гэхдээ тойргоо услах гэсэн хэдэн гишүүн данхар жийпээрээ дүүрэн “төмөр” ачиж очоод, оролцсон наадам болгондоо хамаа замбараагүй тарааж, төрийн дээд одон, шагналыг төмрөөс өөрцгүй болгож байгаа нь ч дуулдах юм.  Тэгээд л сум, орон нутгийн хурга дарга нар, энгэрээ цоолуулж байвал эх орон нь яасан ч мартаж чадах шагнал горилогсод төрийн түшээдээ бүчээд “Дэмжинээ” гээд л сүйд болж байна гэнэ. Хаа явсан газраа хий бардаж, хийгээгүй атлаа сүржигнэж байдаг төрийн түшээдээс ажил бүү хэл, сэтгэл горьдоод ч нэмэргүй юм байна.

-ТӨРИЙН ТҮШЭЭДИЙН "МАРТСАН" НАМРЫН ЧУУЛГАНААР ХЭЛЭЛЦЭХ ГОЛ ХУУЛИУД-

Найр наадам тэнээд бодсон, санаснаа хамагхийг нь идээ, ундаатайгаа “залгилсан” МАН-ынханд ирэх намрын чуулганаар хэлэлцэх ёстой гол хуулиудыг нь эргэн сануулъя. УИХ-ын хаврын чуулган энэ сарын 7-нд өндөрлөж, ирэх намрын чуулганаар хэлэлцэх хуулийн төслүүдээ тодотгосон. Ирэх намрын чуулганд хэлэлцүүлэхээр Засгийн газар, УИХ-ын гишүүн, МАН-ын бүлэг, АН-ын бүлэг, Байнгын хорооноос 200 гаруй хуулийн төсөл ирснээс шүүж, 62-ийг нь ирэх намрын чуулганаар хэлэлцэхээр тогтоолын төсөл оруулж, баталсан. Үүнээс онцолбол,

• Ашигт малтмалын тухай хуулийн төсөл
• Үндэсний баялгийн сангийн тухай хуулийн төсөл,
• Өрсөлдөөний тухай хуулийн,
• Танхимын тухай хуулийн шинэчилсэн найруулгыг хэлэлцэнэ.

​

Мөн УИХ-ын намрын нэгдсэн чуулганаар Үндсэн хуулийн Цэцийн гурван гишүүнийг шинээр томилохоор төлөвлөснөөрөө онцлог болж байгаа. Үүгээр ч зогсохгүй ард түмнийг босгож, төв талбайд жагсахад хүргээд байсан “Нүүрсний хулгай”-н хэргийн сонсголыг ирэх намар зарласан. Сонгуулийн жил ч ойртоод, төрийн ажил ар араасаа ундарч байх. Найр наадам ингээд л өнгөрөхөд хэцүүхэн намар Монголыг хүлээж байна даа, төрийн түшээд ээ.