Сэлбэ, Дунд гол орчмын эрэг үерлэж, далан задарснаас ойролцоох барилга, байгууламжуудын гарааш, нэг давхраар ус туулж, олон хүн эд хөрөнгөөрөө хохирч, орох оронгүй, амьдрах боломжгүй болоод байлаа. Тэгвэл хэдхэн өдрийн бороо гамшгийн хэмжээнд хүрэхэд нөлөөлж, усны далан, суваг, шуудуу хааж, барилга барьсан “S.Outlet” дэлгүүр, “Авлига хороолол”-ын эздээр иргэдийн хохирлыг барагдуулах ажил идэвхтэй яригдаж эхэлжээ.

-ЗАСГИЙН ГАЗАР “S.OUTLET” ДЭЛГҮҮР, “АВЛИГА ХОРООЛОЛ”-ЫГ НУРААНА ГЭВ-

Өнгөрсөн лхагва гарагт болсон Засгийн газрын ээлжит хуралдааны үеэр үер, усны нөхцөл байдал, иргэдийн хохирлыг хэрхэн барагдуулах, усны даланг хааж барилга барьсан “S.Outlet” дэлгүүр, “Авлига хороолол”-ын талаар ярьж байна. Ингэхдээ хотын хогтойгоо, ялгадастайгаа урсахад хүргэж, үерийн даланг хааж барилга барьсан “S.Outlet” дэлгүүр, “Авлига хороолол”-ыг нурааж, үерийн усанд эд хөрөнгөөрөө хохирсон иргэдийн хохирлыг төлүүлэх асуудал яригдлаа.

ТАЙЛБАР: Үерийн ус барилгуудын гарааш, нэг давхар руу орсон байдал. 2023.07.14

                    Долдугаар сарын эхээр Сэлбэ, Дунд гол үерлээд, өндөржүүлсэн байдал зарлаж байхад Ерөнхий сайд УОК-той хамт үерийн газарт очиж, нөхцөл байдалтай танилцсан. Тэгэхдээ үерийн даланг хааж барьсан “Aqua Garden” хорооллыг “Авлига” гэдгийг нь ч зарлаад, нийтэд хэлээд өгсөн. Улмаар “Aqua Garden” хороолол болон “S.Outlet” дэлгүүрийн эздэд хариуцлага ногдуулж, иргэдийн хохирлыг барагдуулах талаар цухас дурдаад өнгөрч байсан нь одоо ийнхүү хэрэгжиж, идэвхтэй яригдаж байна.

-“ТҮР БАРИЛГА БАРИХ” ЗӨВШӨӨРӨЛТЭЙ “S.OUTLET” ДЭЛГҮҮР ГАЗРАА ХОЁР ДАХИН ТОМСГОЖЭЭ-

“S.Outlet” дэлгүүрийг талбайг анх 2009 онд Х.Батзориг гэгч автомашины  засвар, үйлчилгээ эрхлэх зориулалтаар түр барилга барих зөвшөөрлөөр авчээ. Улмаар 1665 ам метр талбайг таван жилийн хугацаанд эзэмших зөвшөөрөл авснаасаа удалгүй дэлгүүрийн барилгын ажлыг эхэлсэн юм байна. Гэсэн ч дараагийн зургаан жилд буюу 2015 он хүртэл барилгын ажлаа зөвшөөрсөн талбайгаас хэтрүүлж, нэмэлт 3470 ам метр талбай буюу нийт 5135 ам метр талбайг ашиглаж, хашаа татжээ. Энэ талбайд үерийн үеэр ноцтой яригдаад байсан усны шугам, үерийн далан хаагдсан аж.

ТАЙЛБАР: "S.Outlet" дэлгүүрийн хажуу тал. 2023.07.06

                 Тухайн үед “S.Outlet” дэлгүүрийг зөвшөөрлөө буруу зориулалтаар ашиглаж, хашаа татаж, барилга барьсан, нийтийн эзэмшлийн талбайг ашигласан, усны сан бүхий газарт зөвшөөрөгдөх хэмжээнээс илүү үйл ажиллагаа явуулсан зэрэг зөрчлөөр нийслэлийн Мэргэжлийн хяналтын газар, цагдаагийн байгууллагаас шалгаж байсан ч хэрэг нь замхарч алга болсон юм байна.

-ЗАХИРГААНЫ ХЭРГИЙН ШҮҮХ ДЭЭР ГАЦААНД ОРСОН “АВЛИГА ХОРООЛОЛ”-ЫН ХЭРЭГ-

“Авлига хороолол” буюу “Aqua Garden” хороолол газарт одоогоор зургаан жилийн өмнө буюу 2017 онд “Эм Энд Жи Констаркшн” ХХК, “Бүти” ХХК гэх хоёр компани компани Хан-Уул дүүргийн XV хороо, Энхтайваны гүүрний зүүн талд Дунд голын эрэг дагуух 11.8 га газар дээр “Дэлхийн стандартад нийцсэн, жилийн дөрвөн улиралд ажилладаг усан парк барина” гэж хашаа хатжээ. Гэсэн ч нийслэл хот усан парк ч үгүй болж, оронд нь газар дээр нь 24 давхар, долоон блок барилга бүхий 1200 айлын “Aqua Garden” хороолол баригдсан юм. “Aqua Garden” гэхийн оронд “Авлига хороолол” болсонд  ч учир бий.

ТАЙЛБАР: "Эм Энд Жи Констракшн" ХХК-ийн Дунд голын эрэг дагуу эзэмшдэг газар

                     Нийслэлийн Засаг даргын Тамгын газар, Байгаль орчин, аялал, жуулчлалын яамнаас “Эм Энд Жи Констракшн” ХХК, “Бүти” ХХК-ийн газар эзэмших эрхийг цуцлах шаардлага хүргүүлж, захирамж гаргаж, БОАЖЯ-ны харьяа Туул голын сав газрын захиргаа, МХЕГ-аас ч барилгын ажлынх нь талбайд шалгалт хийгээд байсан ч ажлыг нь зогсоож, эрхийг нь цуцалж чадаагүй, дийлээгүй учраас “Авлига хороолол” гэх болсон. Өдгөө “Авлига хороолол”-д холбогдох хэрэг Захиргааны хэргийн шүүх дээр гацаанд орчихоод байгаа аж.