Халдварт өвчин биш, хариуцлагагүй дарга нар ҮХЛИЙН АЮУЛ боллоо

Б. Цогтбаяр:
Улс төр- Тэрслүү үг

2020-12-10, 1059

-Хоржоонтой нь, Иргэн О-г хотын баруун захын товчоон дээр нас бардаг өглөө Ерөнхий сайд У.Хүрэлсүх дагалдан баясагч сайд, дарга нараа дагуулаад “Сайжруулсан түлш”-ний үйлдвэрийн нээлтэд оролцохоор хотын зүүн захын товчоогоор гарч байсан. Ардад хатуу, даргад зөөлөн байх нь жинхэнэ хөл хорио юм уу-

Халдварт өвчин, хатуу хөл хорио, хариуцлагагүй дарга гурвын аль нь үхлийн аюултай вэ. Одоогоор халдварт тахал буюу коронавирусээр 893 хүн халдварлаад байгаад ч нас барсан хүн үгүй. Харин хатуу, харгис хөл хориог зохион байгуулагч хариуцлагагүй, хэнээтэй дарга нарын буруугаас хэд хэдэн хүн харамсалтайгаар амиа алдаад байна. Тэгэхээр яг одоо бол Монголд халдварт өвчин биш хатуу хариуцлагагүй, нинжин сэтгэлгүй дарга нар л үхлийн аюултай болоод байна даа.

Ардчилсан улсын хүлцэнгүй ард түмэн бид хатуу хөл хорионд 29 хонож байна. Бараг л нэг сар. Эхний арав хоногт бид өөрсдийгөө төрийн хайр, халамжинд жаргаж байна гэж төсөөлцгөөсөн. “Цар тахлаас биднийгээ цаг алдалгүй хамгаалж байгаа манай дарга нар мундаг” гэж үгсийн сайнаар магтаж, урамшуулаад л. У.Хүрэлсүх, Я.Содбаатар, Д.Сумъяабазар нар баатрын дүртэй ч харагдах шиг болж байлаа. Хоёр дахь арав хоногт аяга хоолны мах, гурилгүй өрхүүд олширч, амны хаалт хогноос түүж зүүхдээ тулж эхлэхэд төр биднийг хайрлаж, халамжлаагүй юм байна гэдгийг сэхээрч эхэлсэн. Гурав дахь арав хоногт харин бид төрийн хайр, халамжинд анхнаасаа байгаагүй, хөл хорио нэртэй харгис дэглэмд байгаагаа сая нэг ухаарч байна.

Ингэж хэлэхийн учир нь, ердөө хоёрхон хоногийн өмнө хөл хорио нэртэй харгис дэглэмээс болж нэг эмэгтэй харамсалтайгаар амиа алдлаа. Улаанбаатар хотод ирж, эмнэлгийн тусламж авах гэж Архангай аймгаас 400 гаруй километр автомашинаар явж ирсэн 58 настай эмэгтэй О “Эмээлт” шалган нэвтрүүлэх товчоон дээр “гацаж”, хот руу орж чадахгүй, тэнд хамгаалалтад гарч байсан албаныхныг царайчилсаар амьсгал хураасан. Хот руу нэвтэрч, эмнэлгийн тусламж авахад түүнд 10 гаруйхан километр л дутуу байсан. Харамсалтай нь, Архангай аймгийн хэмжээнд ч байхгүй PCR аппаратны шинжилгээний бичгийг түүнээс нэхэж, өвлийн хүйтэн шөнө 10 гаруй цаг машинд нь суулгаж, хүлээлгэснээс болж өвчин нь хүндэрч, тэгээд тэр үүрд явчихсан. Тэр шөнө иргэн О дотроо хариуцлагагүй, хэнээтэй дарга нараас хэчнээн удаа аврал эрсэн бол. Халдварт цар тахлын эсрэг хөл хорио тогтоох нь улс орнуудын хамгийн зөв шийдэл болоод буй. Тиймдээ ч хөл хориог тогтоож, дагаж мөрдүүлэх нь зөв. Гэхдээ хэчнээн хатуу хөл хорио байлаа ч өвчин зовлон, үхэл хагацлыг ойлгох, энэрэнгүй бодлого бага боловч байж болдоггүй хэрэг үү.

Хоржоонтой нь, Иргэн О-г хотын баруун захын товчоон дээр нас бардаг өглөө Ерөнхий сайд У.Хүрэлсүх дагалдан баясагч сайд, дарга нараа дагуулаад “Сайжруулсан түлш”-ний үйлдвэрийн нээлтэд оролцохоор хотын зүүн захын товчоогоор гарч байсан.

Улсын онцгой комиссын дарга Я.Содбаатар сайд, дарга нарыг хотоос чөлөөтэй орж, гархад нь юм хэлдэггүй хэрнээ эмнэлгийн тусламж авах гэсэн жирийн иргэнийг хот руу орохыг нь зөвшөөрдөггүй нь ямар гээчийн ялгавартай хандлагатай хэрэг вэ. Ардад хатуу, даргад зөөлөн байх нь жинхэнэ хөл хорио юм уу.

Үүнээс гадна Сэлэнгэ аймгийн Баруун хараагаас хотод эмнэлгийн тусламж авахаар ирсэн 10 настай охин ЭХЭМҮТ-д эмчлүүлж байгаад нас барсан хэрэг өчигдөр оройжин чих дэлсэж, нойр хулжаав. Зарим эх сурвалжийн хэлж байгаагаар олон хоног дараалж өвдсөн 10 настай охиноо тэвэрсэн хосыг Улаанбаатар хот руу ирэхэд нь л товчоон дээр элдэв шинжилгээний хариу нэхэж, удаан саатуулсан, эмнэлэгт ирмэгц нь охиноос PSR шинжилгээ авч, хариуг нь гарах хүртэл эмчилгээ хийхгүй гэж цаг алдсан гэнэ. ЭХЭМҮТ-өөс тухайн охиныг тархиндаа харвалттай, биеийн байдал нь хүнд ирсэн, анхаасаа хот руу машинаар тээвэрлэх ёсгүй байсан. Тиймээс ч бүх талын эмчилгээ хийсэн ч нэмэр болоогүй тухай мэдэгдсэн. Гэхдээ алдсан хүн арван тамтай. Ядаж товчоон дээр удаан саатахгүйгээр, PCR шинжилгээний хариу хүлээж цаг алдахгүйгээр хоёр, гурван цагийн өмнө ч болов шаардлагатай эмчилгээгээ хийлгэж эхэлсэн бол өдийд амьд байх байсан ч юм бил үү гэж ар гэрийнхэн нь төдийгүй, нийт ээжүүд, эмэгтэйчүүд харамсан сууна.

Амьдардаг аймаг нь халдварын голомт байлаа гээд, хатуу хөл хориотой байлаа гээд 10-хан настай охин халдвартай хэмээн сэжиглэгдэж, шаардлагатай эмчилгээгээ хийлгэхгүй байсаар амьсгал хураах нь жинхэнэ хөл хорио гэж үү. Эмгэнэлтэй нь, PCR-ийн шинжилгээгээр охины хариу сөрөг гарч, Мандал сумын түргэний эмч өөрөө ЭХЭМҮТ-д охиныг авчирч, бүр үүрч оруулсан гэж байгаа.

Дээрээс нь УОК-ийг “Бүх нийтийн бэлэн байдлыг зэрэг” гэж сүржигнэж байх зуур бичил уурхайд ажиллаж байсан долоон иргэн техникийн спирт ууж, дөрөв нь хорвоогоос одлоо. Ахуй амьдралаа өөд татах гэж, хэдэн бор төгрөг олох гэж хөл хориог ч үл ажран хөлдүү шороо малтаж байсан тэднийг адгийн архичин байсан учраас архи зарахгүй үед дур хүслээ барьж, дийлэхгүй техникийн спирт ууж нас барсан мэтээр олон нийтэд ойлгуулаад, энэ асуудлыг нам жим болгочихлоо.

Энэ мэт өвчин зовлон, өнчрөл, үхэл хагацлын асуудалд УОК, НОК, ЭМЯ-ныхны аль нь ч хүн ёсны, энэрэнгүй, нигүүлсэнгүй сэтгэл гаргахгүй байна. Хөл хорио гэж хэтэрхий муйхар шаардлага тавьж, харгис бодлого явуулаад байна.

Шадар сайд, Улсын онцгой комиссын дарга Я.Содбаатарыг огцруулах санал асуулга ард нийтийн дунд өчигдрөөс эхлэн явагдаад эхэлжээ. Энэ нь аль нэг нам, улс төрийн бүлэглэлийн ашиг сонирхлын явуулга, эрх баригч намыг харлуулах гэсэн оролдлого, хий хоосон улстөржилт биш аж. Бас сар шахам ажилгүй, орлогогүй гэртээ хоригдсон ард түмэн түүнд өс зангидсандаа огцруулах гээд байгаа асуудал ч биш. Мөн банкны зээлээр арай ядан өндийж, хөл дээрээ зогсож эхэлж байсан бизнес нь хөл хорионоос болж дампуурсанд хорлохсон бизнес эрхлэгчид ч үүнд холбоогүй.

Харин хөл хорионы үед өвчин зовлон, өнчрөл, үхэл хагацал, үгүйрэн хоосролын алинд ч нигүүлсэнгүй бус, хэтэрхий хатуу, харгис хандлага гаргаж, хүн ёсны шийдвэрийг шаардлагатай үед нь гаргаж, удирдлага, зохион байгуулалтаар хангаж чадахгүй байгаад нь ард түмэн ууртай байгаа юм. Тиймдээ ч түүнийг буруутгаж, хариуцлагаа хүлээж огцрохыг шаардаж байгаа хэрэг юм. Түүнээс биш төрийн тогтвортой байдал, эв эеийг хэзээд эрхэмлэдэг ард түмэн билээ.

Ард түмний зэвүү, дургүйг зэрэг хүргэж, уур бухимдлын сумных нь бай болоод байгаа хүн ганц Я.Содбаатар ч биш. Хотын дарга, Нийслэлийн онцгой комиссын дарга Д.Сумъяабазарыг болдог бол өнөөдөр ч зөөлөн сэнтийгээс нь зайлуулахад ард түмэн бэлэн байгаа харагдана. Гэхдээ зөвхөн хотын даргын зөөлөн сэнтийгээс ч биш, улс төрөөс бүр мөсөн зайлуулж, бөхийн өргөөний зүг “өшиглөхөд” бэлэн байгаа бололтой юм. Архи зарахгүй байгаад нь ард түмэн түүнд уурлаж, араа шүдэндээ зуугаад байгаа юм биш. Амины автомашиныг хориглосон хэрнээ автобусаар явж болно, болохгүй гэж тоглоом тохуу хийж, төөрөгдүүлсэнд нь ч уурлаагүй. Харин Улаанбаатар хот руу орох гэж 10 цаг хүлээсэн эмэгтэй нас бараад байхад хотын даргын хувиар ганц ч үг ам ангайхгүй байгаад нь ундууцаад байгаа юм.

Бас ард иргэд нь аяга хоолны мах, гурилгүй, өлсгөлөн ходоодтой ч чимээгүй сууж байхад нь “Ядарч байна, өлсөж байна” гэж урвагнасан, талхны мөнгө яаж олох вэ гэж шаналж суухад нь таван сая төгрөгөөр өрөөнийхээ үүдэнд халуун хэмжигч аппарат авчихаад “Өөрийнхөө мөнгөөр авсан юм, болох уу” хэмээн даналзсан зэрэг нь ард түмний уурыг нь хүргээд байгаа юм.

Эцэст нь, коронавирусээр хүн үхээгүй, харин хөл хорио нэрэнд хэт дулдуйдаж буй дарга нарын харгис бодлого, зохион байгуулалтаас болж олон хүн амиа алдаад байгаагийн хариуцлагыг ард түмэн Я.Содбаатар, Д.Сумъяабазар нараас нэхэж байна.

Шадар сайд, Улсын онцгой комиссын дарга Я.Содбаатарыг огцруулах санал асуулга ард нийтийн дунд өчигдрөөс эхлэн явагдаад эхэлжээ

Халдварт өвчин биш, хариуцлагагүй дарга нар ҮХЛИЙН АЮУЛ боллоо

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.