Хэдхэн өдөр орсон бороонд Сэлбэ, Дунд голын орчимд үерлэж, далан сэтэрснээс эрэг дагуух барилга, байгууламжуудын гарааш, нэг давхраар ус туулж, 30 гаруй орон сууц ус, цахилгаангүй болж, нийслэлээрээ хог, ялгадастайгаа хутгалдаж, гамшгийн түвшинд хүрлээ. Улаанбаатар хот хог, ялгадастайгаа хутгалдаж, ус туулсан орон сууцны айлууд ус, цахилгаагүй, хоол хүнсгүй суугаа нь буруу хот төлөвлөлтийнх гэж олон хүн хэлж байна. Тэгвэл үүнтэй холбоотойгоор Эргэлт.мн мэдээллийн сайт хот төлөвлөлтийг "хар толгой"-гоороо хариуцаж ажиллаж байсан Нийслэлийн ерөнхий архитекторуудыг танилцуулъя.

-ХОТ БАЙГУУЛАЛТЫН ГАЗАР “ДААМ” ГАРСАН ЕРӨНХИЙ АРХИТЕКТОР АСАН Н.НАЦАГДОРЖ-

Өнгөрсөн  онд огцорсон Н.Нацагдоржийг анх 2006 онд дүүргийн газрын алба, Нийслэлийн хот байгуулалт, хөрөнгө оруулалтын газарт архитектор байхад Нийслэлийн ерөнхий архитектораар томилж байв. Түүнээс хойш Н.Нацагдорж хууль бусаар зөвшөөрөл өгсөн, хуралд суудаггүй, ёс зүйн алдаа гаргасан зэрэг шалтгаанаар хэд хэдэн удаа огцорч байсан ч дахин томилогдож, Нийслэлийн ерөнхий архитектораар 2006-2010, 2012-2015, 2021-2022 онд ажиллаж байжээ.

                       Тодруулбал, Н.Нацагдоржийг “Замын цагдаагийн шинэ гүүрнээс баруун зүгт буудаг хэсгийн ажил ерөнхий архитекторын хувийн компаниас болж удааширч, хувийн компани нь нийслэлийн төв коллекторын шугамыг хууль бусаар өөрчилсөн”, “Усан парк барих газрын зориулалтыг өөрчилж, орон сууц барих зөвшөөрөх олгосон” зэрэг хууль бус зөвшөөрөл өгч байсан асуудал нь нийтэд ил гараад эхэлмэгц 2012, 2015 онд огцорч байсан аж. Гэсэн ч 2021 онд Нийслэлийн хот байгуулалт, хөгжлийн газрын даргаар дахин томилогдож, нэг жил ажиллахдаа олон хүний уур, уцаарыг барж байн дахин ажлаа өгсөн байдаг. Тухайн үед ерөнхий архитектор асан Н.Нацагдорж нь “НИТХ-ын төлөөлөгчдийн хуралд суудаггүй, тасалдаг. Хурлаа завсарлаад дуудаж үзсэн ч ирдэггүй” талаар НИТХ-ын төлөөлөгч Б.Өнөбат хэлж байв. Мөн НИТХ-ын төлөөлөгч П.Наранбаатарын хэлснээр Н.Нацагдорж Нийслэлийн ерөнхий архитектораар ажиллаж байхдаа Засаг дарга нь “Хотын төвд байшин бариулахгүй” гэх захирамж гаргасан ч түүнийг хүчингүй болгуулж байсан аж. Улмаар НИТХ-ын төлөөлөгчид өөрсдөө гарын үсэг цуглуулан барин байж Н.Нацагдоржийг 2022 онд огцруулж байсан түүхтэй.

-ХУУЛИЙН БАЙГУУЛЛАГА Ч ХҮЧИРДЭГГҮЙ М.ЭНХБОЛДЫН ХҮН, Т.БАДАМЖУНАЙГИЙН ХҮРГЭН Э.АНАР-

                    Н.Нацагдоржийг Нийслэлийн ерөнхий архитектораас огцорч, дахин томилогдож байх үед дундуур нь Ерөнхий сайд асан М.Энхболдын хүн гэгддэг Э.Анар томилогдон ажиллаж байв. Э.Анарыг Ерөнхий асад асан М.Энхболд УИХ-ын дарга байхдаа Нийслэлийн ерөнхий архитектораар томилсон гэдэг. Түүнчлэн ерөнхий архитектор асан Э.Анар нь Засгийн газраас хэрэгжүүлж байгаа “Шувуу” ажиллагааны хүрээнд гадаадаас баривчлагдсан Т.Бадамжунайгийн хүргэн. Улмаар Э.Анарыг Нийслэлийн ерөнхий архитектораар ажиллаж байхад Т.Бадамжунай болон түүний эхнэр, гурван охин, хүргэдийнх нь нэр дээр давхардсан тоогоор 28 орон сууц, үйлдвэрлэл, үйлчилгээний барилга бүртгэлтэй байгаа нь нийтэд ил болж шуугиан тарьж байв. Түүнчлэн НМЕГ-аас төлөвлөлт, чанартай холбоотой гомдлын дагуу Нийслэлийн Ерөнхий төлөвлөгөөний газрыг шалгаж, торгосон ч Э.Анар дуулианыг нь нам дараад өнгөрөөсөн гэдэг. Уг хэргээс хойш удалгүй ерөнхий архитектор асан Э.Анар өөрийн хүсэлтээр ажлаа өгсөн байдаг.

-1.5 ТЭРБУМЫН ОРОН СУУЦ, БАРИЛГАТАЙ ЕРӨНХИЙ АРХИТЕКТОР Ц.ТУЛГА-

Өдгөө Хот байгуулалт, хөгжлийн газрын даргаар ажиллаж байгаа Ц.Тулга нь Э.Анарыг Нийслэлийн ерөнхий архитектораар ажиллаж байхад тус газрын орлогч даргаар ажиллаж байв. Ерөнхий архитектор Ц.Тулгын 2021 онд мэдүүлсэн хөрөнгө, орлогын мэдүүлгээс дурдвал,

• Өөрийн орлого 46,764,000 төгрөг
• Гэр бүлийн орлого 39,777,000 төгрөг
• 1.5 тэрбум төгрөгийн хоёр нийтийн орон сууц, амины орон сууц, үйлчилгээний барилга, гарааш
• 80 сая төгрөгийн автомашин
• Найман сая төгрөгийн үнэт эдлэл
• 192 сая төгрөгийн дотоодын хадгаламжтай гэж мэдүүлжээ.

                    Хэрэв дээр дурдсан хүмүүс хийх ёстой ажил, үүргээ ухамсарлаж, зөв ажилласан бол өнөөдөр нийслэл хот хог, ялгадастайгаа хутгалдаж, гамшгийн түвшинд хүрэхгүй байх байлаа.