Хэдхэн өдөр дараалсан бороонд нийслэл хотоороо урсахаа шахлаа. Сэлбэ, Дунд голын далан сэтэрч, үерлэснээс эрэг дагуух орон сууцнуудын гарааш, нэг давхар усанд автаж, айлууд нь ус, цахилгаангүй болов. Далан сэтэрч, үерлэсэн газар нь онцгой, цагдаагийнхан ажиллаж, чадахаараа л шуудуу ухаж, далан босгож байгаа ч үерийн усыг зогсоох нь битгий хэл торгоож ч чадахгүй байна. Арга ядаад ус, цахилгаан тасарсан гэрээсээ “зугтаж”, өөр тийшээ явъя гэлээ ч гадна, доод давхраар нь ус туулчихсан, иргэд гэрээсээ ч гарч чадахгүй байлаа. Бүр сүүлдээ хамаг л бохир, заваан хог, хаягдал, ялгадас урссан усан дундуур нялх хүүхдээ тэврээд явж байгаа аав, ээжийг Монгол даяараа харлаа...

                        Үүнтэй холбоотойгоор Сэлбэ гол орчмын арчлалт, автозамын ус зайлуулах хоолойг хариуцаж ажилласан хүмүүсийг Эргэлт.мн мэдээллийн сайт нэхэн сурвалжиллаа. Уг нь Сэлбэ голын эрэг орчмыг арчлах, тохижуулах ажил таван хотын даргын нүүр үзсэн юм байна. Анх 8.9 тэрбум төгрөгөөр хийхээр урьдчилан тооцож эхлүүлсэн Сэлбэ голыг сэргээж, тохижуулах төсөл буух эзэн, буцах хаяггүй явсаар өдийг хүрч, өнөөдөр Сэлбэ гол хальж, далан нь сэтэрчээ.

-СҮ.БАТБОЛД, Г.МӨНХБАЯР НАРЫН САНААЧИЛСАН СЭЛБЭ ГОЛЫГ СЭРГЭЭХ, ТОХИЖУУЛАХ ТӨСӨЛ ДАРЖИН ДАРАГДСАН НЬ-

Сэлбэ голын эрэг дагуух тохижилт, арчлалтын ажил одоогоос 12 жилийн өмнө буюу 2011 онд тухайн үеийн хотын дарга Г.Мөнхбаяр, Ерөнхий сайд Сү.Батболд нарын санаачилгаар “Сэлбэ голын урсцыг нэмэгдүүлж, орчныг тохижуулах төсөл”-ийн хүрээнд эхэлж байв. Төслийн хүрээнд Их тойруугийн гүүрнээс Арслантай гүүр хүртэлх 1.3 км үерийн далангийн дагуу явган хүний зам, зүлэгжүүлэлт, гэрэлтүүлэг зэргийг барьж, тохижуулан хотын төв хэсэгт амралт зугаалгын бүс болгохоор төлөвлөж, төсөлд 8.9 тэрбум төгрөг шаардлагатай гэж үзсэн ч “Нийслэлийн төсөв хүрэлцэхгүй” гэх шалтгааны улмаас Сэлбэ голын эрэг дагуух тохижилтын ажлыг төсөвт тааруулж, гурав хувааж хийхээр болсон байдаг.

                Ингээд “Сэлбэ голын урсцыг нэмэгдүүлж, орчныг тохижуулах төсөл”-ийн эхний ээлжид Их тойруугийн гүүрнээс “Голден Вилла” хотхоны гүүр хүртэлх 350 метр Сэлбэ гол дагуух үерийн даланг тохижуулах төлөвлөгөөг баталж, Нийслэлийн Засаг даргын тамгын газар, Сүхбаатар дүүрэгтэй хамтран 1.7 тэрбум төгрөгийн тендер зарласан. Тус далан тохижуулах төслийн тендерт “Норбу” ХХК шалгарсан. “Норбу” ХХК  Сэлбэ голын эрэг дагуух далан тохижуулах ажлыг хоёр жилийн хугацаанд хийж гүйцэтгэх үүрэгтэй байсан ч төслийн ажил удааширч, дунд нь хэд хэдэн удаа зогсож байв. Улмаар “Норбу” ХХК заасан хугацаанд төслийн ажлаа гүйцэтгэж, хүлээлгэж өгсөн ч “Чанарын шаардлага хангаагүй” гэх иргэд, олон нийтийн гомдол, хүсэлтийн дагуу хуулийн байгууллагаас тус компанийг шалгаж байлаа. Гэсэн ч аудитын байгууллагаас “Ямар нэгэн зөрчил илрээгүй” гэсэн дүгнэлт гаргаж, “Норбу” ХХК төслийн ажлаа асуудалгүй хийж гүйцэтгэсэн” гээд орхиж байсан аж. Түүнчлэн “Норбу” ХХК-ийн ажлаас хойш “Сэлбэ голын урсцыг нэмэгдүүлж, орчныг тохижуулах төсөл” тусгаад байсан ажлууд хэрэгжээгүй байна.

-СЭЛБЭ ГОЛЫГ АРЧИЛЖ, ТОХИЖУУЛАХ АЖИЛ ДАХИН СЭРГЭСЭН Ч, “ШОУ” БОЛООД ӨНГӨРСӨН НЬ-

Ерөнхий сайд асан Сү.Батболдын үеэс эхэлж, хэдэн жилийн турш нам дарагдаад байсан Сэлбэ голын сэргээх, арчлах ажил 2018 онд буюу Су.Батболдыг хотын даргаар ажиллаж байх үеэр дахин сэргэсэн. Тухайн үед нийслэлийн удирдлагууд Сэлбэ голын тохижуулах зураг төслийн ажлыг баталж, Арслантай гүүрнээс урагш Натур төвийн урд талын гүүр хүртэлх хэсэгт тохижилтын ажил хийхээр төлөвлөсөн. Түүнчлэн дээрх төслийн талаар тухайн үеийн Нийслэлийн зураг төслийн хүрээлэнгийн газрын ерөнхий инженерээр ажиллаж байсан Ж.Баясгалан “1400 метр зайд боомт бүхий тунгаагуур, цааш Нарны зам хүртэлх тохижилт, усны барилга байгууламжийн ажлын зураг хийгдсэн. Төсөв нь 50 орчим тэрбум төгрөг болсон” гэж хэвлэлд ярилцлага өгч байжээ. Гэсэн ч Сэлбэ голын ойр орчмыг сэргээж, арчлах ажлын төсөл улс төрийн “шоу” болоод эргээд намжсан байна. Аль 2011 оноос л эхэлсэн Сэлбэ голын орчмыг сэргээх, тохижуулах төслийн ажил таван хотын даргын нүүр үзсэн ч, үр дүнд хүрээгүй хэвээр байгаа юм.

-Д.СУМЪЯАБАЗАРЫН ҮЕД ХЭРЭГЖИЖ БАЙГАА СЭЛБЭ ГОЛЫГ АРЧЛАХ, ТОХИЖУУЛАХ ТӨСӨЛ, ТЕНДЕРҮҮД-

Сэлбэ гол орчмын бүтээн байгуулалт, арчилгаа, тохижилтын ажлын хүрээнд өнгөрсөн онд НЗДТГ-аас зургаан тендер зарлажээ. Тухайлбал,

• 2022 оны тавдугаар сарын 6-нд нээсэн 500 сая төгрөгийн Сэлбэ голын засвар, тохижилтын ажил,
• 2022 оны тавдугаар сарын 10-нд нээсэн 1.2 төгрөгийн Сэлбэ голын баруун талын автозамаас хойш шинээр хийгдэх автозам, замын байгууламжийн ажил,
• 2022 оны зургадугаар сарын 10-нд нээсэн 500 сая төгрөгийн Сэлбэ голын засвар тохижилтын ажил,
• 2022 оны зургадугаар сарын 27-нд нээсэн 1.2 сая төгрөгийн Сэлбэ голын баруун талын автозамаас хойш шинээр баригдах автозам, замын байгууламжийн ажил,
• 2022 оны наймдугаар сарын 8-нд нээсэн 500 сая төгрөгийн төсөвтэй Сэлбэ голын засвар тохижилтын ажил,
• 2022 оны аравдугаар сарын 3-нд нээсэн 110 сая төгрөгийн төсөвтэй Сэлбэ голын явган хүний гүүр, тохижилтын ажил байгаа аж.

                 Гэсэн ч дээрх зургаан тендерийн гүйцэтгэлийн ажил жүжигчин Б.Цэцэгийн удирдагчаар нь сонгогдоод байсан гурван тэрбум төгрөгийн төсөвтэй “Сэрүүн Сэлбэ” төсөлтэй холбоотойгоор гацаанд орчихоод байгаа юм байна.

Үе үеийн хотын дарга нар гол усаа арчилж, тохижуулах, далан бэхлэлт байгуулж, автозамын ус зайлуулах хоолойгоо олон улсын стандарт нийцүүлэх юм ярьж, гаднын жишигтэй танилцахаар мөн ч олон гадаад руу явсан даа. Гэсэн ч тэднээс эх орондоо хэрэгжүүлж, үр дүнгээ үзүүлж байгаа юм алга. Өнөөдөр далан нь сэтэрсэн Сэлбэ гол таван хотын даргын нүүр үзсэн ч өнөөдрийнх шиг үер, ус үзэлгүй арайхийн тэсэж байжээ. “Барилдахаасаа таахалзах нь их” сүржин гаргаж ирээд ярьж байгаад л мартуулчихдаг үе үеийн хотын дарга нарын шийдэж чадаагүй хотын төлөвлөлт, ус зайлуулах хоолойны асуудлаас болж нэг л өдөр Улаанбаатар хот маань тэр чигтээ урсаад алга болох вий.