Үндсэн хуулийн өөрчлөлтийг иргэдэд танилцуулах гэж УИХ-ын гишүүд үйлээ үзэж, үстэй толгойгоо зулгаахаас наагуур байна. Гишүүдийн тоог нэмэх сургаар давхар сонгуулийн компанит ажлаа хийгээд завгүй явна тэд. Сонгуулийн жил хаяанд ирж, хаалга тогшиж байгааг гэнэт ухаарсан гишүүд тортой бэлэг өвөртлөө, том жийп хөлөглөөд хэдэн бор иргэдийнхээ саналыг авахаар тойглож эхлэх нь тэр.

      Өнгөрсөн гурван жилийн хугацаанд хамраа цухуйлаагаагүй шахам Төрийн ордонд тухалсан тэд Үндсэн хуулийн өөрчлөлтөөр гишүүдийн тоог нэмэх ажлыг сурталчлах хүндхэн даалгавар аваад тойрог руугаа мордсон нь энэ. Зөөлөн буйданд тухалж, том жийп хөлөглөсөн гишүүд цар тахлын дараах эдийн засгийн өөрчлөлт иргэдийн амьдралыг тартагт нь тултал туйлдуулсан, хаврын хатуу цагт хэдэн малаа алдаад дууссан малчдын бодит байдалтай нүүр тулахаас аргагүйд хүрэв.

      Үнэнтэй нүүр тулсан тэд Үндсэн хуулийн өөрчлөлтийг дэмжүүлж, дахин сонгогдох эрхээ өвөртлөх гээд юунаас ч буцахгүй, газар өвдөглөж суугаад ч хамаагүй дэмжүүлэх гээд гүйж байгаа харагдана. Эгээтэй л “Хонь хариулаад ир” гэвэл шилбүүр бариад гүйхээс наагуур л хөл алдаж гүйж явна. Зарим нь зах дээр очиж, барааны үнэ судалж, хүнсний дэлгүүрүүдэд өрийн дэвтрийг нь тэглэж өгөх нь холгүй яваа бол үлдсэн нь шороо зөөж, зам тавих дээрээ тулчихсан хөгөө чирч л байна даа манай гишүүд.

      Баянхонгор аймгаас сонгогдсон УИХ-ын гишүүн А.Адъяасүрэн, Д.Ганбат нар тойрогтоо очиж, хоёр хөлөө өвдөглөж суугаад таарсан болгонтой хөөрөг зөрүүлж буй зургаа цахим хаягтаа нийтэлсэн байх. Түүгээр ч зогсохгүй өмнөх сонгуулиар тараасан өөрийн зурагтай бидоноо шалгаж байгаа зургаа хүртэл нийтэлжээ. Хонины бэлчээр малчдыг тойруулаад өөрсдөө дунд нь суучихсан зургаа хүртэл дэлгээд амжив.

      Харин Чингэлтэй дүүргээс сонгогдсон УИХ-ын гишүүн М.Оюунчимэг шороо зөөж гүйгээд мод тарьсан зургаа цахим хаягтаа нийтэлсэн байх. Согинохайрхан дүүргээс сонгогдсон УИХ-ын гишүүн Б.Жаргалмаа дэвтэр үзэг өвөртөлчихсөн хүнсний дэлгүүрээр орж, гудамжид таарсан эмээ нарт үнсүүлсэн зургаараа гоёсон харагдана лээ.

       Орхоныг төлөөлж, МАН-аас сонгогдсон УИХ-ын гишүүн Д.Батлут сургуулиудаар орж, сурагчидтай санамсаргүй юм шиг авахуулсан зургаа танилцуулсан бол УИХ-ын гишүүн Х.Булгантуяа хүүхдүүд тойруулчихсан зармыг нь өвөр дээрээ суулгаад “Бид дээрэлхэлтийг тэвчихгүй” гэх бичигтэй самбар барьчихсан зургаа цахим хаягтаа нийтлэсэн байх.

      Завхан аймгаас сонгогдсон Б.Баярсайхан гишүүн өмнө нь цэргийн хувцас өмсөж, халаасандаа гараа хийсэн зургаа цахимд нийтлэж, шүүмжлэл дагуулж байсан бол энэ удаад цэргийн ангийнхантай хөл нийлүүлэн алхаж яваа зургаа нийтэлж, тойрогтоо ажиллаж байгаагаа мэдэгдэв.

     Дархан-Уул аймгаас сонгогдсон Г.Дамдинням зах худалдааны төвүүдээр хар хослолтой  ахлаж яваа зургаа нийтлээд давхар одонтой ээжүүдэд одон медаль гардуулж яваагаа дуулгах.

      Энэ мэтчилэн гишүүд цахимд элдэв янзын зургаа цахимд нийтлэж, иргэдийг тохуурхах, дооёолохын завсарт Үндсэн хуулийг сурталдаж, далимаар нь дахин сонгогдох нүхээ малтаж яваа нь нууц биш юм.

      Иргэдийнхээ өмнөөс хууль санаачилж, батлах үүрэг хүлээсэн гишүүд хийсэн ажлаа тайлагнах гэтэл ард түмний өмнө нүүр хийх газаргүй болчихсон бодит байдал энэ. Өнгөрсөн хугацаанд Хөгжлийн банкыг хуйгаар нь тонож, улсаа дефольт болгохоос наагуур хувааж идсэн баримтууд илэрсэн. Түүгээрч зогсохгүй цар тахлын үеийг далимдуулж, тонн тонноор нь нүүрс зарж, өөрсдөө хөлжсөн баримтууд ч ил болоод буй. Сүүлд томчууд нь Боловсролын зээлийн сангаас зээл авч хүүхдүүдүүдээ гаднын улсад сургах нэрээр тансаглуулж, зээлээ татвар төлөгчдийн мөнгөөр төлүүлсэн баримтууд ар араасаа илэрсээр байтал дараагийн сонгуулийн эрхээ өвөртлөх гээд улайрч байгаа харагдах.

      Уг нь өдийд УИХ-ын гишүүд иргэдээ төлөөлснийхөө төлөө бид ийм хуулийн төсөл баталж, ийм хуулийн төсөл өргөн мэдүүлж, эдийн засагт тийм өөрчлөлт гарсан гээд хийсэн ажлаа тайлагнаад нүүр бардам Үндсэн хуулийг ухуулж явах ёстой байв. Харамсалтай нь, манай энэ удаагийн парламентын үйл ажиллагаанд иргэдийн чихийг баясгах нэг сайн хуулийн төсөл байхгүй байгаа нь нууц биш юм.

      Ам ташсан хэрээ 13 эргэнэ гэгчээр харин ч дахин сонгогдох эрхээ өвөртлөх гээд хөлөө цуцтал гүйж, гэрт нь орж аяга тавгийг нь угааж өгөхөөс л наагуур юм болж байна даа. Үндсэндээ улс төрийг зохиомлоор идэвхжүүлж, уриа лоозонгоор бөмбөгддөг тархи угаалтын үе эрин үе эхэлж байгаа энэ. Сонгууль ойртсоныг илтгэх хамгийн чухал үе шат өрнөж байгаа гэх юм уу даа.

      Дээр нь дэлхийн эдийн засаг хямраад байхад л, манай эдийн засаг сэргээд байгаа ухааны ухуулга эрх баригч намынхан байнга өгөх болов. Сонгуульд бэлдэх дараагийн үе шат нь эрчимжиж байгаагийн илрэл нь.

     Ухаандаа Монгол Улс гэнэт л нүүрсээ 40-50 сая тонноор нь хилээр гаргаж, өмнөхөөсөө хавь илүү үнээр худалдаалаад эхэлнэ гэх мессэжийг эрх баригчид өдөр шөнөгүй ярих болов. Сонгуульд горилогч туршлагатай гишүүд нь зав л гаргавал “гурил, будаа” бариад тойрог руугаа гүйлдээд эхэлсэн.  Үндсэн хуулийн өөрчлөлтийг дэмжүүлэх даалгаврынхаа хажуугаар, өөрийнхөө нэр хүндийг өсгөх ажлаа ч орхигдуулахгүй хийж байгаа нь энэ.