-Түмэн “амьтан” зовоож, чирэгдүүлж, тамласан хоёр хоногийн настай, “хог”-оо 500 сая төгрөгөөр бүтээсэн гэв үү-

Коронавирусийн аюул бүхэл бүтэн 300 хоног Монгол Улсын хаалгыг тогшиж, хэзээ л бол хэзээ орж ирэхэд бэлэн гэдгээ тунхагласаар байхад ЭМЯ, УОК, Засгийн газар, УИХ юу хийж байсан юм бэ. Ядахад та хэдэд орон нутгийн иргэдээ нутаг буцаах төлөвлөгөө ч байгаагүй юм биш үү. Угтаа бол та хэдийг унтах нойроо хугаслаад, өнөөдрийн нөхцөл байдалд хэрхэн ажиллахаа яг таг бэлдээд Төрийн ордон, төлөвлөгөөт яамандаа ажиллаж байгаа гэж итгэсэн шүү, ард түмэн. Харин гаргаж байгаа шийдвэр, хариу арга хэмжээг чинь хараад “Бухын доодохыг харж, үнэг турж үхнэ” гэдэг л болж байна.

Өнгөрсөн хоёрдугаар сард иргэдээ 10 хоног хот, хөдөөгүй хорьж, хөдөлгөөнийг  нь хумьсан. Тэр туршлагаасаа суралцаад, аюулт нөхцөл байдалд яах вэ гэдгээ ярилцаж болоогүй юм уу. “Ухаанд нь ухна ишиг үхсэн” юм шиг зөвхөн өнөөдрийг харж, маргааш гэж байхгүй юм шиг аашилсан мунхаг бодлын чинь хариуд хэдэн иргэний минь хөл, гар хөлдөж, ходоод гэдэс нь өлдөж, өөртөө л найдахаас өөр арга зам үлдсэнгүй ээ.

“Ковид-19” халдварыг дотооддоо алдлаа. Бид дайны талбарт нойр, хоолгүй зүтгэж байна. Иргэн та гэрээсээ битгий гар. Орон нутгийн иргэдийг нийслэлээс хэрхэн гаргах тухай судалж байна” хэмээх сүржин үг өгүүлбэрийг дарга, даамалгүй гурав долоо хоног үглэсний эцэст иргэдээ орон нутаг руу буцаахаар болов. Ингэхдээ “119.мн” хэмээх бүртгэл, мэдээллийн сайт байгуулж, орон нутгийн иргэдийг бүртгэхээр болсон юм. Овоо доо, техник технологи ашиглаж, иргэдээ шинжилгээнд хамруулж, гэрт нь хариулах нь гэж бодтол нээгдсэн цагаасаа эхлээд, хэл ам таталж, иргэдэд бүүр ч  их хүндрэл, бухимдал учруулж байгаад “амаа” барив, өнөөх нь. Өөрөөр хэлбэл, ачаалал даахгүй, алдаатай сайт нээгээд, хоёр хоногийн дараа хаасан гэсэн үг.

Эрүүл мэндийн сайд С.Мөнхсайхан хэлэхдээ “Хоёр хоногийн хугацаанд яаралтай  бүтээсэн учраас алдаа дутагдал байгаа байх. Удахгүй, маргаашнаас гацахгүй, иргэдэд хүндрэл учруулахгүй байх тал дээр анхаарч ажиллаж байна. Та бүхэн минь ойлгож, хүлээцтэй хандаарай” гэсэн. Гэтэл өнөөх нь маргаашнаас бүр таг, “119.мн” гэх мэдээллийн сайт байгаагүй юм шиг ор мөргүй алга. Ингэж улсын төсөв, иргэдийн татварын мөнгө, хандив, тусламжийг үрэн таран хийх нь хэнд ашигтай юм бэ. Хоёр хоногийн настай “119.мн” мэдээллийн сайт хэн гэдэг “ховдог” даргын шахаа юм бэ.

Түмэн “амьтан” зовоож, чирэгдүүлж, тамласан хоёр хоногийн настай, “хог”-оо 500 сая төгрөгөөр бүтээсэн гэв үү. Ингээд улсын төсвийн 500 сая төгрөгийг “огтоно” идчихлээ. Энэ их мөнгийг хий дэмий үрж, хэрэгцээгүй зүйлд зарцуулж, бүтэлгүйтсэн бүтэлгүй дарга хэн бэ. Түүнд хариуцлага тооцож, улсыг хохиролгүй болго, холбоо сүлбээтнүүдээ. Эсвэл Хотын дарга маань хувиасаа мөнгө гаргаж, Эрүүл мэндийн сайдад тусалж, Шадар сайд нь “шагласан” юм биш биз.  “Зовлон болоход ноёд баяжиж, зуд болоход ноход зоолдог” гэдэг шиг та нарын алга ташилт, танхайрал, дээрэм, тонуул иргэдийг бүүр ч их тарчлааж байна.

Мөн тус сайтыг "Интерактив" ХХК нь зургаан сарын хугацаанд бүтээж байгаа гэнэ.