Монгол Улс 1992 онд дарангуйллаас бүрэн салсан гэдэг. Хүний эрх, эрх чөлөөг эрхэмлэдэг эх орон маань эргээд бурангуй ёс дэлгэрсэн шоронжсон нийгэм бол хувирлаа. Уг нь бид үг хэлж, үзэл бодлоо илэрхийлэх бүрэн эрхтэй. Гэвч үг хэлснийг хорьдог, цагддаг болоод удаж байна. МАН-ын аль нэг гишүүнийг эсэргүүцэж хэлсний төлөө хоёр гурван сар хоригддог жишиг тогтлоо гэхэд буруудахгүй. Нэг үгээр эрх баригч намд эсэргүүцэл үзүүлж болохгүй гэсэн үг. Эсэргүүцэл үзүүлж, үзэл бодлоо илэрхийлэх юм бол  торны цаана өчиггүй сууна. Саарал ордны хууль хатуу, дарангуйллын хэв шинжтэй юм хойно яах билээ.

Цөөхөн хүн амтай, бүх зүйл алган дээр байгаа мэт тодорхой байдаг манай орны хувьд хөгшин, залуу хэн ч болов цагаан зам, мөртэй амьдрах нь л өлзийтэй билээ

             Нэр алдар, эд хөрөнгөнд шунасан, эх оронч бус, шударга, зөв бус зарим хүний нөлөө, дарамтад автаж бусармаг үйлдэлд нь хамсаатан болж оролцсоор улстөрчийн хувьд өөрийгөө гутаасан байдал нь өргөжсөөр л байна. Залуусыг уруу татаж, цааш цаашдын нь ахих, дэвших замыг нь хааж, нэр төр, амьдралаар нь тоглосон ахмад хүмүүсийн нэр, хаяг ч тодорхой болсоор байгаа нь нууц биш. Цөөхөн хүн амтай, бүх зүйл алган дээр байгаа мэт тодорхой байдаг манай орны хувьд хөгшин, залуу хэн ч болов цагаан зам, мөртэй амьдрах нь л өлзийтэй билээ. “Нууцлагдаад үлдчихдэг муу хэрэг том улстөрд байдаггүй” гэсэн үг үнэнээ нотолсоор л байна. Энэ байдлыг хэрхэн, хэзээ, ямар хүмүүс засаж, зөв голдиролд нь оруулж чадахыг хэн ч хэлж мэдэхгүй байгаа нь харамсалтай.

Олон хүн үзэл бодлоо илэрхийлснийхээ төлөө төмөр хаалга татаад байна

                 Монголчууд хаашаа явж байгаагаа ч өөрсдөө мэдэхгүй болчихжээ. Монголын төр ямар шинж, чанартай болчихоод байгаагаа ч өөрөө ойлгохгүй байна. Монголын залуус мөнгө олох гэж л дэлхийгээр нэг тэнэж яваа болохоос биш эх орноо сайхан болгоё, Монголын нийгмээ жирийн иргэдэд ээлтэй болгоё, Монголын төр засгийг шударга болгоё, Монголдоо сайхан амьдардаг болъё гэх зорилгод нэгдэж чадахгүй байна. Нэгдэх боломжийг нь төр засаг хавчаад байхаар яалтай билээ. Олон хүн үзэл бодлоо илэрхийлснийхээ төлөө төмөр хаалга татаад байна. Эрх баригч нам сонгууль бүрээр халамжийн бодлогоор иргэдээ хангалуун амьдруулна гэх нь холгүй мөрийн хөтөлбөр танилцуулж иргэдийн толгойг угаагдаг. Үүнээс биш ямар нэгэн хүний эрх, жижиг дунд үйлдвэрлэл, иргэдийнхээ тав тухтай ажиллаж, амьдрах боломжийн талаар ганц ч болов мөрийн хөтөлбөр дэвшүүлдэггүй нь харамсалтай. Энэ мэт цааш яваад байвал Монгол Улс шоронжсон орон болох нь ээ.