Цагаан сарын баярыг залган Олон улсын эмэгтэйчүүдийн эрхийг хамгаалах өдөр болж өндөрлөлөө. “Найр ахаасаа, наадам дүүгээсээ” гэдэг. Гэтэл энэ үгний үнэ цэн хэдийнээ алдагджээ. Тухайлбал, аливаа баярын дараа согтуу эрс эрүүлжүүлэх зорьж байна. Бүр эмэгтэйчүүдийн баяраар ч ялгаагүй шүү. Нөгөө жудагтай, ноён нуруутай монгол эрчүүд яасан бэ, хаана байна. Гудамжинд согтуу найгаж, найр, наадамд жолоогүй морь шиг хэсүүчлэх болжээ. Олон улсын эмэгтэйчүүдийн эрхийг хамгаалах өдрөөр манай эрчүүд эмэгтэйчүүддээ цэцэг, бялуу өгч баярлуулсан болоод өөрсдөө зах зухгүй наргиж байна. Нөгөө уран хурц, үгээр эмэгтэйчүүдийн сэтгэлийг хөдөлгөж чаддаг хэр нь, жилдээ ганц тохих баярыг нь архидалт болгож байна гэхэд хилсдэхгүй.  Гуравдугаар сарын 8-ны өдөр үйлчилгээний байгууллагуудад эмэгтэйчүүд л ажиллаж харагдсан. Цэцгийн дэлгүүр, зоогийн газар, дэлгүүр гэх мэт газарт хөөрхий эмэгтэйчүүд ажиллаад үнэндээ баярлаж чадсан болов уу.

эмэгтэйчүүд үнэндээ баярлаж чадсан болов уу

                  Түргэн үйлчилгээний газруудад эмэгтэй нь ажлаа хийж, эрчүүд нь согтуу, манаач шиг сууж буй дүр зураг өнөөдрийг хүртэл манайд байна.  Захын ТҮЦ-нд явж орвол эхнэрээ баярлуулсан нэртэй согтуу эрс архи үнэртүүлэн сууна. Харин эхнэр нь гоёж, гангалсан болоод л худалдаа наймаагаа хийж харагдлаа. Харин шөнийн цэнгээний газруудын үүдэнд согтуу залуус зодолдож, нэгнийгээ гэмтээж, эрүүлжүүлэх рүү машин машинаар ачигдаж буй нь бодит үнэн. Баярлах ёстой эмэгтэй согтуу нөхрөө маллахад л хайран цагаа үрж байна.

эрүүлжүүлэх рүү машин машинаар ачигдаж буй нь бодит үнэн

              Энэ талаар цахим хуудсанд эмэгтэйчүүд өөрсдийн үзэл бодлоо хуваалцсан байна. Тухайлбал нэгэн эмэгтэй өөрийн цахим хуудастаа “Эрчүүдтэй ажил хийхэд хэцүү, үүрэг даалгавар өгөхөөр буцаагаад өөрт даалгавар болж ирнэ.  Тэд их шалчигнуур, заримдаа цохиод авмаар санагддаг. Харин эмэгтэйчүүдтэй ажиллахад илүү амар, ямар ажлыг хийчихсэн байдаг. Эр, эм хүний байр солигдоод үүрэг хариуцлага үүрэх ухаан дутуу эрчүүд олширчээ” гэсэн байна. Мөн цаашлаад “Баяраар бүрээр д согтуу эрчүүд харах залхмаар байна. Эд ажиллаж, хөдөлмөрлөх насандаа архи ууж, тамхи татаж, хүүхнүүдээс ч дор хэрэлдэж байгааг нь харахаар өмнөөс санаа зовоод байх юм. Манай ангийн эрчүүд охидоо баярлууллаа. Дуулж, бүжиглээд эхэндээ сайхан байсан. Сүүлдээ харин эрчүүд маань согтуу хэрэлдэж, уралцаад баяр маань дуусаж байлаа” гэжээ. Үнэхээр эрчүүд маань баяр болгонд оролцож, балгаа тарьтлаа согтдог гэж үү.   

              Эмэгтэйчүүдээ баярлуулах нэрээр өөрсдөө баярлаж, уусан идсэнээ шингээж чадахгүй гар зөрүүлж, нэг нь шороонд нөгөө нь шоронд ордог эмгэнэлт үйл явдал дуусах болоогүй бололтой. Эрчүүд минь ухаантайнхан байж, өр зөөлөн эмэгтэйчүүдээ баярлуулсан шиг баярлуулбал яасан юм бэ.