Төрийн халамж, түмний тэтгэлгээр баяжиж буй урлаг, спортын салбарынхнаас татвар авдаг болъё, Соёлын сайд аа. Ард түмний өмнө дуулж, жүжиглэснийх нь төлөө өгдөг мөнгөн шагнал, урамшууллаа зогсооно уу. Үнэхээр шагнал, урамшуулал өгмөөр байгаа бол хүн ардынхаа төлөө насаараа зүтгэж буй эмч, эрдэмт мэргэддээ өгдөг болъё. Монгол Улсын шагнал урамшуулал олгодог тогтолцоо хэрээс хэтэрсэн гэхэд хилсдэхгүй болжээ. Тухайлбал, олон улсын тэмцээнд амжилт гаргасан тамирчид, олонд танигдсан дуучин, жүжигчинд шагнал урамшуулал багадаагүй билээ. Тэр ч бүү хэл цахим орчинд бусдыг манлайлж буй олон дагагчтай хүнд хүртэл шагнал олдог боллоо. Үүгээрээ дамжуулан улстөрчид сонгуулийн үеэр өөрсдийгөө тэнгэрт тултал магтуулж, ард түмний толгойг угаадаг. Хариуд нь урлаг, спортынхон багагүй мөнгө халааслаад амждаг нь нууц биш. Үүнээс гадна улсын баяр наадамд цол хүртсэн бөхчүүд төрийн хишгийг хүртэж, ард түмнээс цуглуулсан хандиваар байр, машин авч хангалуун амьдарч байна. Урлагийнхан ч ялгаагүй дээгүүр харж, хамраа сөхөн, ард түмнийг доромжилж байна.

Урлагийнхан ч ялгаагүй дээгүүр харж, хамраа сөхөн, ард түмнийг доромжилж байна.

Татвар бол улс орны оршихуйн үндэс. Улс орныг батлан хамгаалах цэрэг арми, иргэдийн аюулгүй орчинд амьдрах баталгаа хангах үүрэгтэй цагдаа, хүүхэд багачуудыг үнэ төлбөргүй сурган хүмүүжүүлэх цэцэрлэг сургууль, өвдөж хавдсаныг эмчлэх эмнэлэг, эрүүл мэндийн байгууллага, төрийн үйлчилгээг иргэдэд хүргэх захиргааны болон шүүх прокурор гэх зэрэг олон зуун байгууллагын зардал, тэнд ажиллаж байгаа мянга мянган ажилчдын цалин хөлсийг гагцхүү татвар төлөгчдийн төсөвт хуримтлуулсан мөнгөөр л санхүүжүүлдэг. Урлагийнхны хэчнээн төгрөгийн орлого олдгийг хянах арга байхгүй. Тиймээс тэд өөрсдөө орлогоо тодорхойлоод дүүрэг дүүрэгтээ хувь хүний орлогын албан татвар төлдөг байна.

Хошин урлагийнхан гэхэд л өдөр алгасахгүй шахуу тоглолт хийж байна. Нэг хүний тоглолт үзэх тасалбарын үнийг нийт суудлын тоонд, мөн тоглосон өдрийн тоонд нь үржүүлээд үзвэл нэлээд өндөр ашиг орлогын тухай яригдах биз

Тухайлбал 2014 онд  жил шилдэг татвар төлөгчдөө тодруулахдаа урлагийнхнаас шилдэг татвар төлөгчийг тодруулъя гэсэн санал гаргаад шалгаруулалт явуулсан аж. Тухайн үед шилдэг татвар төлөгчөөр тодорчихоор уран бүтээлч байгаагүй байна. Урлагийнхны тоглолтыг ч татвар төлөгчид мөнгөө төлөөд үздэг. Тэгэхээр тэд ч бас татвар төлөх ёстой. Хошин урлагийнхан гэхэд л өдөр алгасахгүй шахуу тоглолт хийж байна. Нэг хүний тоглолт үзэх тасалбарын үнийг нийт суудлын тоонд, мөн тоглосон өдрийн тоонд нь үржүүлээд үзвэл нэлээд өндөр ашиг орлогын тухай яригдах биз. Харин тэд хэрхэн татвар төлдөг бол.  Дуучид шинэ жил, байгууллагын ой зэрэг баяр ёслол, тэмдэглэлт өдрүүдээр үе үехэн “түрийвчээ зузаалдаг” ч бас л олсон орлогоосоо улсад татвар төлдөг эсэх нь эргэлзээтэй.

Насаараа мэс засал хийж буй эмч, багш, тариаланч, инженерүүд цалин муутай, дээрээс нь татвараа төлж, байрын лизинг гэх мэт зүйлсээ төлөөд арай ядан амьдарч байна

Тэдний тоглолтын үнэ ханш гэж тэнгэрт хадсан үнэтэй байдаг. Улс орон даяар тэгш үйлчлэх ёстой татварын багц хууль эдгээр хүмүүст хэрхэн үйлчилдэг вэ, Соёлын сайд аа.  Уран бүтээлчид татвараас нуугдаж, зайлсхийж болно, харин энэ бүхнийг илрүүлдэг хяналтын байгууллага хэрэгтэй байна. Үнэндээ урлагийнхан бусад ажилчин албан хаагчид шиг улс оронд төлөх ёстой билээ. Насаараа мэс засал хийж буй эмч, багш, тариаланч, инженерүүд цалин муутай, дээрээс нь татвараа төлж, байрын лизинг гэх мэт зүйлсээ төлөөд арай ядан амьдарч байна. Соёлын сайд Ч.Номин та энэ тал дээр хэрхэн анхаарал хандуулах вэ.