Манай монголчууд эсэргүүцнэ гэж гурилдах юм. Эсэргүүцэж чаддаг оронд нь төрийн томчуудаас эхлүүлээд олны танил алдартнууд нь ч амнаасаа болох битгий хэл ам нээгээгүйнхээ төлөө бойкотлуулахаас айдаг юм билээ. Энэ ч гоё, тэр ч сайхан гэж манайхны магтан үлгэрлэх дуртай гаднын урлаг соёл, спортын од, улстөрчдийн тэгж "сүнсийг нь зайлуулсан" зүйл нь ердөө бойкотлож, эсэргүүцэж чаддаг олон нийт. Ард түмэн, олон нийт нь үзэл бодлоо илэрхийлж, буруу хэлснийг нь цэгнэж, эсэргүүцэн бойкотлож чаддаг болж байж л дээдэх хүмүүсээ цензурдэх юм байна.

-МОНГОЛЧУУД ЭСЭРГҮҮЦЭЖ ЧАДДАГ БАЙСАН БОЛ УРЛАГИЙНХАН ТОГЛОЛТОО ХИЙХ ГАЗАР, УЛСТӨРЧИД НҮҮР ХИЙХ ГАЗАР ҮГҮЙ БОЛОХ БАЙЛАА-

Хамгийн сүүлд гэхэд, хамтлагийн гишүүн Н.Энэрэлсайханы мэдэгдсэнээр "B production" нь "NS" хамтлаг болон тус продакшнтай гэрээтэй уран бүтээлчдийн хөдөлмөрийг мөлжиж байж болзошгүй асуудал гарч ирсэн. Н.Энэрэлсайханы хэлж буйгаар продакшн нь залуу уран бүтээлчдийнхээ цалинг олголгүй хоёр жил болсон бөгөөд залуустай уран бүтээлээс олсон орлогын 90 хувийг байгууллагад, 10 хувийг уран бүтээлчид өгөх хөдөлмөрийн гэрээ байгуулдаг гэх. Үүнд, "B production"-аас "Н.Энэрэлсайханд гэрээгээр тохирсон хувиа өгдөггүй гэсэн нь худал мэдээлэл бөгөөд уран бүтээлчийг удаа дараа гэрээний үүргээ зөрчсөн. Дахиж олон нийтийн сүлжээнд буруу, ташаа мэдээлэл нийтэлбэл хууль, шүүхийн байгууллагад хандана" гэсэн албан ёсны мэдэгдэл хийхэд цахим сүлжээнд олон нийт дургүйцлээ илэрхийлж байсан. Гэсэн ч бойкотлож, эсэргүүцэж чадахгүй хэвээр.

                                   Хоёр жилийн өмнө Баачка нэрээрээ олонд танигдсан "Никитон" хамтлагийн дуучин Б.Батчулуун дуучин С.Сэрчмаатай шууд дамжуулалтын үеэр ёс бус агуулгатай зүйл ярьсан байдаг. Тухайн үед олон нийт "Урлагийнхан гэж ийм заваан юмнууд байдаг", "Олны өмнө ийм зүйл ярьж болохгүй. Урлагийнханд энэ зэргийн боловсрол ч байхгүй бололтой" зэргээр шүүмжилж, ганц, хоёр байгууллага Баачкатай хамтран ажиллах гэрээгээ цуцалж байгаагаа мэдэгдэж байлаа. Харин "Никитон" Б.Батчулуун "Олон нийтийн сүлжээгээр ярих, ярихгүй зүйл байна гэдгийг анзаарч, сургамж авлаа" хэмээж иргэд, үзэгчдээсээ уучлалт гуйсан юм. Түмэн хайрлаж дээш нь "шидсэн" уран бүтээлчээ олон нийтийн сүлжээнд зүй бус үг хэллэг ашиглан ярьж, бага насны хүүхэд ч сонсож байж болзошгүй шууд дамжуулалтаар хүчирхийллийн сэдэл, сэдэвтэй зүйл ярьсныг нь уучлалт гуйхынх нь төдийд өршөөв үү гэлтэй Баачка өнгөрсөн оноос хойш хэд хэдэн удаа тайзан дээр гарсан сурагтай.

Ард түмэн хайраа өгч чадсан бол буцааж авдаг байх ёстой. Түмний хайрыг доромжилсон бол түүнийх нь хариуг өгдөг байвал болох. Хайр дайгаагүй урлагийнхныг үзэж, сонсохоосоо татгалзъя. Газрууд ч тоглолтыг нь хийлгэхээ больё. Байгууллагууд ард түмээ доромжилсон урлагийнхантай хамтрахаа больё. Доод албан тушаалтнуудаа хүчирхийлсэн гэх Ц.Анандбазарыг ч, ард түмний цахим хэрэглээг "хянаж" мэдэх хуулийн төсөл өргөн мэдүүлсэн Н.Учралыг ч бойкотлоё.

УИХ-ын гишүүн Ц.Анандбазарыг цахим сүлжээгээр бишгүй эсэргүүцье, бойкотлоё гэдэг ч хүмүүс өнөө л "Содмонгол"-оос түлшээ авдаг, "Өргөө"-д кино үздэг хэвээрээ. Одоо ч бүр "бузар"-аараа цоллуулаад явж байсан "алтан үе" мартагдаж эхлээ биз ээ. Арай мартагдаж амжаагүй дээр нь Олон нийтийн сүлжээнд хүний эрхийг хамгаалах тухай хуулийн төслийг дахин санацгаая. Иргэд УИХ-ын гишүүн Н.Учралын өргөн мэдүүлсэн дээрх хуулийн төсөлд олон нийтийн мэдэх эрх чөлөө хязгаарлаж,  цахим орчинд хориг тавьж болзошгүй зэрэг байр сууриа илэрхийлсэн. Гэсэн ч цахим сүлжээнд нь энэ хуулийн төслийг, хуулийн төслийг өргөн мэдүүлэгчийг өөд уруугүй хараан шүүмжилж суухаас дорвитойхон эсэргүүцсэнгүй. Нэг нь ч жинхэнэ утгаар нь уг хуулийн төслийг, Н.Учрал гишүүнийг бойкотлож чадсангүй. Хэн ч илэрхийлж чадахгүй байна. Бид эсэргүүцдэг, бойкотлодог болж чадаагүй юм байна.

Бидний хийх гээд "гурилдаад" байгааг гаднынхан утгаар нь харуулж байна. 2023 он гарахын өмнөхөн БНХАУ-д 2007 онд АНУ-д гарч байсан шиг ипотекийн хямрал болж болзошгүй гэсэн сургаар л иргэд нь ипотекийн салбараа бойкотлочихож байгаа юм. 50 гаруй хотод нь иргэд зохион байгуулалттайгаар ипотекийн төлбөрөө зогсоож гэнэ. Бүр бидний сайн мэдэх "Харри Поттер" номын зохиолч Ж.К.Роулинг санамсаргүй хэлсэн үгнээсээ болж бойкотлуулж, уншигчид уншихаа ч больж, шүүмжлэгчид ч үзэхээ больсноор зохиолч эмэгтэй нэгэн цагт хүртэж байсан хүний эрхийн төлөөх шагналаасаа татгалзсан юм.

                                   Бойкот гэж нэрийдсэн зүйл нийтийн дунд бий болсон цагаасаа л хэд хэдэн утгатай болсон. Энэ үгийг аливаа компани, төрийн буруу шийдвэрийг эсэргүүцэж, эсэргүүцлээ хэдэн хоног, олон сараар үргэлжлүүлэх, байгууллага, газраар нь үйлчлүүлэхгүй байх зэргээр хэлж ч болно. Үүссэн цагаасаа л өөр өөр утга илэрхийлж, түүнийхээ адилаар өөр өөр үүрэг гүйцэтгэж байсан байсан "бойкот"-ын үнэн үзэл нь эсэргүүцэлдээ үнэнч байх гэнэ. Хэн нэгэн том албан тушаалтан аль эсвэл олны танил эрхмийг ч буруу шийдвэр гаргахад нь, ард түмнийг гутаасан байж болзошгүй үг хэллэг ашигласан тохиолдолд түүнийг нь анхааруулан сануулж, тэнцвэрийг нь олох эсэргүүцэлдээ үнэнч байхыг л бойкот гэх ажээ.