Гэртээ хэрүүл хийж, үр хүүхдээ зоддог хүн төрийн жолоо атгаж, түмэн олны өмнөөс ажиллаж чадах уу. Сэлэнгэ аймгийн иргэдээс УИХ-ын зөөлөн сэнтийд залрах мандат авсан Ч.Ундрам гишүүний хүүхдэдээ гар хүрч буй дүрс бичлэг цахим ертөнцөд түгэлээ. Гар хүрэх, хүрэхдээ сандлаас арагш татаж, хүүхдээ ар дагзаар нь шаланд савлаа. Энэ бол харгис үйлдэл, Ч.Ундрам гишүүн ээ. Дүрс бичлэгүүдийг түүний нөхөр болох Б.Наранцацралт олон нийтийн сүлжээгээр түгээж буй. Монгол Улсын ирээдүй болсон балчир үрсээ олны шившиг болгохын хэрэг юунд байна. Энэ бүхний ард эрх мэдэл, албан тушаал яригдаж байгаа юм биш биз. Тийм ч байсан хүүхдүүдээ энэ бүх булай зүйлээс хол байлгах нь зүйн хэрэг болов уу.  

          Монголчууд эрт үеэсээ “Гэрээ засаад төрөө зас” хэмээх хэлц үгийг хэрэглэж, заншсан ард түмэн. Гэтэл төрийн жолоо атгаж буй Ч.Ундрам гишүүн гэрээ засах нь бүү хэл биеэ ч засаж чадаагүй л явна. Тиймээс үр хүүхдүүдээ гар хүрч, элдвээр харааж, гэр бүлийнхээ тайван байдлыг үгүй хийж буй дүрс бичлэг олон нийтэд хүрлээ. Түүнийг гурван удаагийн салалтай нүүр тулаад байгааг сонгогчид андахгүй биз. Нөхрөөрөө амлалт бичүүлж, түүнийгээ олон нийтийн сүлжээгээр хээв нэг уншиж байсан удаатай. Үүнээс гадна гэр бүлийн гадуурх харилцаанд нэр холбогдоод амжсан. Энэ хүн гэр бүлийн тухай хууль санаачилсан гэхэд итгэмээргүй.

Боловсролтой, эрх мэдэлтэй сэхээтэн хүмүүс атлаа хамаг онигоогоо түмний өмнө дэлгэлээ

             Гэр бүлийн маргаан, бузар булайгаа олон нийтэд дэлгэсэн Б.Наранцацралт дүрс бичлэгүүдээ дараах тайлбартайгаар нийтэлсэн юм. “Миний хамгийн гол хөндсөн зүйл бол хүүхдийн хүчирхийллийн асуудал юм. Би уг асуудлыг олон нийтийн анхаарлын төвд оруулах гэсэн шалтгаан нь “УИХ-ын гишүүний халдашгүй дархан эрх” хууль хүчний байгууллагад нөлөөлөөд байсан учраас олон нийтэд хандсан юм. Үнэхээр аргаа барсандаа л олон нийтийн анхааралд тавьж байна. Би энэ бүхнийг хүсээгүй, хүмүүсийн хэлдэг шиг “эр хүн” шиг байж “олгой хагаравч тогоондоо” гэгчээр дуугүй амиа бодоод явж болох ч надад ирэх түм буман эрсдэлээс үл айн, хүүхдүүдийнхээ сайн сайхны төлөө, эцгийн хувьд зүрх зориг гарган олон түмэнд дэлгэж байна.  Хүчирхийлэл гэдгийг дан ганц эр хүн үйлддэг юм биш, эмэгтэй хүн ч үйлддэг. Гагцхүү “дархан эрхээр” хамгаалагдсан эрх мэдэлтэй хүнтэй энгийн хүн тэмцэх байтугай үг хэлсэн ч буруутдаг цаг дор амьдарч байгаа учраас “олны хүч оломгүй далай” гэдэг учраас дэлгэсэн юм” гэжээ. Тэгвэл үүний хариуд УИХ-ын Ч.Ундрам “Хүү, охин хоёр минь цэцэг цэврүү шиг өсвөр насандаа байна. Амьдрал, ирээдүй нь чи бид хоёрын хэрүүл маргаанаар дуусахгүй. Салж сарнилаа үхэн үхтлээ аав, ээж хоёр нь л юм чинь тэндийнхээ ирээдүй, сэтгэл зүрхийг хайрлаж хамгаалж явъя. Эцэг хүний ёсоор хоёр хүүхдийнхээ эмзэгхэн сэтгэл, бяцхан зүрх, маргааш ирээдүйг ахин нэг бодож үзээрэй” гэжээ. Энэ мэтийн хэрүүлээс олон гэр бүл салж, сарниж байна. Гэхдээ салахдаа үр хүүхдээ түмний шившиг болгодог нь цөөн. Энэ цөөн, ухамсаргүй хүмүүсийн төлөөл Б.Наранцацралт, Ч.Ундрам нар байлаа. Боловсролтой, эрх мэдэлтэй сэхээтэн хүмүүс атлаа хамаг онигоогоо түмний өмнө дэлгэлээ. Гэр бүлийн асар их асуудалтай Ч.Ундрам гишүүн УИХ-д гэр бүлийн тухай хууль өргөн барьж, гэр бүлийнхээ хамаг булайг олны өмнө дэлгэж буй Б.Наранцацралт нарын тэмцлээс болж, хүүхдүүд нь шившиг боллоо.

Үүнээс гадна гэр бүлийн гадуурх харилцаанд нэр холбогдоод амжсан. Энэ хүн гэр бүлийн тухай хууль санаачилсан гэхэд итгэмээргүй

          Дээрх хүмүүсийн үйлдлийг хууль хяналтын байгууллага анхааралдаа авсан байх. Тиймээс хүүхдээ зодож буй Ч.Ундрам гишүүн, дүрс бичлэгийг нийтийн сүлжээгээр түгээсэн Б.Наранцацралт нарт ямар хуулийн хариуцлага хүлээлгэх нь зүй. Ер нь овоо босгоогүй бол шаазгай юун дээр суух билээ. Ч.Ундрам гишүүн ээ таны эрх ашиг, албан тушаалын шуналаас болоод гэр бүл, үр хүүхдүүд тань түмний шившиг болж байгаа юм биш биз.