ГЕГ-ын дарга Б.Асралт “Би хүрз нүүрс ч аваагүй. Шалгуулахад бэлэн” гэж хэлээд хоёр хоногийн дараа огцорлоо. Гэхдээ “Өөрийнхөө хүсэлтээр огцорч байгаа” гэх үгээр халхавч хийгээд тэр албан тушаалаа хүлээлгээд өгчихлөө. Тодруулбал, Засгийн газрын ээлжит бус хуралдаанаар Гаалийн ерөнхий газрын дарга Б.Асралт албан тушаалаасаа чөлөөлөгдөх хүсэлтээ өгч, түүний оронд Нийслэлийн цагдаагийн газрын дарга Р.Отгонжаргалыг үүрэг гүйцэтгэгчээр томилохоор болсныг Хууль зүй, дотоод хэргийн сайд Х.Нямбаатар мэдэгдэв.

       Тэгвэл Гаалийн ерөнхий газрын дарга асан Б.Асралт ямар албан тушаалд томилогдох вэ. Түүнийг хууль хяналтын байгууллагаас шалгах уу, гэдэг нь асуулт хэвээр үлдэж байна. Албан тушаалаа хүлээлгэж өгнө гэдэг нь зохих хариуцлага мөн үү, гэвэл биш юм. Яг энэ мэтээр албан тушаалаа хүлээлгэж өгөөд гаднын улс руу оргон зугтсан, түүнийхээ хариуцлагыг хүлээхгүй зугтдаг олон жишээ манайд бий. Албан тушаалаа өөрийн биеэр хүлээлгэж, өгөөд хууль хяналтын байгууллагад шалгуулах хүсэлтээ өгвөл магадгүй энэ өөрийнхөө шударга ажилласан гэдгийг батлах нэг  алхам гэж харж болох юм. Хэрэв зээ тийм үйлдэл хийхгүй л бол  ГЕГ-ын дарга асан Б.Асралтад хилийн хориг тавъя.

            Хууль хяналтын байгууллагынхан шаардлагатай хүмүүсээ цаг алдалгүй шалгаж, хуулийн дагуу ажиллах нь одоогийн нөхцөл байдалд зайлшгүй шаардлагатай байна.

Нүүрсний хулгайн хэргийн эсрэг өнгөрсөн хугацаанд Гаалийн ерөнхий газар ямар ажил хийж, хэрэгжүүлсэн бэ гэдгийг хамгийн сайн мэдэх хүн нь одоогоор Б.Асралт болчихсон. Яг ийм хариуцлагатай үед хэн нэгэн эрх мэдэлтэн албан тушаалтан ажлаа хүлээлгэж өгөх нь хариуцлага тооцох асуудал биш гэдгийг энд дурдах нь зүйн хэрэг биз ээ.