Түүхэнд байхгүй том бүрэлдэхүүнтэй, данхар бүтэцтэй Засаг төрийн эрхийг барьж байгаа ч ард иргэдийн нүдэнд ил болсон даацтай шийдвэр, хийсэн ажилгүй өвөлтэй золгож байна. Ерөнхий сайд Л.Оюун-Эрдэнэ “давхар дээл”-тэй сайд нарыг тангарах өргөх үеэр “Сайд бол албан тушаал биш, цаг нартай уралдан асуудлыг шийдвэрлэж, гал барилцах улс төрийн манлайлагчид байх учиртай” гэж байсан. Гэтэл өнөөх хэдэн сайд нь ажилтайгаа танилцаж дуусаагүй, дадлагаа хийгээд л яваа бололтой, таг чиг сууцгаах. Хийсэн ажлаасаа илүүтэй, хийх ажлаа тайлагнасаар, мөрөөдлийн төлөвлөөгөө танилцуулсаар дараагийн сонгуультай залгах нь. Яг үнэндээ Л.Оюун-Эрдэнийн Засгийн газрын сайд нар дэндүү аймхай, хулчгар байна. Өнөөдөр сайд нар ард түмнийхээ бодит байдалтай танилцахаас айж, цахимд цуурхахаас өөрөөр хийсэн ажил, гийгүүлсэн гавьяагүй л сууна.

     Хамгийн наад захын жишээ гэхэд л өнөөдөр манайх улс даяараа дизель түлшний хомстолд орчихсон, хүндхэн нөхцөлд байна. Дизель түлш хомстсоноор уул уурхайн салбарын үйл ажиллагаа доголдохоос гадна хөдөө орон нутгийн тээврийн үйлчилгээ тэр чигтэй зогсож, өргөн хэрэглээний барааны үнэ дахиад л өснө.  Иргэдийн амьдралд сөргөөр нөлөөлөх гэх мэт асуудлууд хоолойгоор татчихаад байхад салбарын сайд нь чимээ, аниргүй, дүлий дүмбэ суусаар л байна. Энэ талаар сэтгүүлчид Уул уурхай, хүнд үйлдвэрийн яамны сайд Ж.Ганбаатараас тодруулга авахыг хүсэхэд тэрбээр яриа өгөхөөс татгалзаж, “Энэ долоо хоногт түлш хэвийн болно” гэхээс өөр тайлбаргүй сууна.  Тэрбээр анх сайдын сэнтийд залрахдаа “Намайг сайдад томилохыг би зөвшөөрсөн. Бүх хүчээ дайчлан ажиллана” гэж хэвлэлээр дамжуулан ард иргэддээ амлалт өгч байв. Гэвч ажлаа авснаасаа хойш иргэдээ мэдээллээр хангах үүрэг хүлээсэн сайд нь асуудлаас бултаж, хийх ажлаасаа бултаж байгаа нь өнөөдрийн бодит байдал болчихлоо. 

 Мөн нийслэл тэр аяараа тэг зогсолт хийж байхад Хот хариуцсан сайд, Түгжрэлийн үндэсний хорооны дарга нь “Ард түмэн хариуцлагаа дор бүрнээ ухамсарлаж, бэлтгэлтэй замын хөдөлгөөндөө оролцоорой” гэх агуулгатай үгсийг цахимд жиргээд сууж байгаа харамсалтай дүр зураг өнөөдрийн нийгэмд бий.

      ХХААХҮ-ийн сайд Х.Болорчулуун үүрэгт ажлаа хүлээж аваад хоёр гаруйн хугацаа өнгөрлөө.  Гэтэл ард түмэн нь энэ өвлийг хэрхэн давах тал дээр төлөвлөгөө гаргасан эсэх нь тодорхойгүй. Цаашлаад гурилын үнэ өмнө жилээс хоёр дахин өсөж, гурилынхаа үнийг барьж чадаагүй л байна. Үүнийгээ “Гурилын үнийг Хүнс хөдөө аж ахуй, хөнгөн үйлдвэрийн яам тогтоодоггүй. Энэ нь зах зээлийнхээ зарчмаар л тогтдог жамтай” гэж тайлбарлаад л сууж байна.

   Улсын төсөв батлагдах үеэр Засгийн газраас жинхэнэ бодлого төлөвлөлт яриад, төсөв санхүүжилтэй зөв хуваарилах талаар яриад сууж байх ёстой хүн нь Эдийн засаг, хөгжлийн сайд Ч.Хүрэлбаатар байв. Гэтэл тэрбээр төсөв санхүү, эдийн засгийн хөгжилд анхаарал тавих нь битгий хэл цахим сүлжээнд өөрийгөө өмгөөлөн жиргэж суудаг цахим “хэрүүлч” нь тэр байлаа.

   Хүйтний улирал ирж бүх насныхан томуу,томуу төст өвчнөөр өвчилж, эмнэлгүүд нь багтаамжаа дийлэхгүй. Мөн короновируст халдварын тоо өдөр ирэх тусам өссөөр байхад Эрүүл мэндийн яамны сайд С.Энхболд мэргэжилтнүүдэд чиглэл өгчхөөд, салбартаа халаа сэлгээ хийж сууна. Сүүлд гэхэд  Өргөө амаржих газрын дарга Ж.Энхцэцэгийг ажлаас нь чөлөөлөх тушаал гаргасан нь цахим сүлжээг нэлээд хугацаанд донсолгосон. Эмнэлгүүдийн дарга нарыг сольж, мэргэжилтнүүдээрээ  туг тахиж суухын оронд салбарынхаа ажилд анхаарвал дээрсэн сайд аа.

    Энэ мэт салбараа  мэддэггүй, дорвитой шийдвэр гаргадаггүй, цахимын цаанаас хийрхсэн сайд нарын цуваа үргэлжилсээр байна. Салбар хариуцсан сайд нар нь асуудал үүсэх бүрд мэргэжилтнүүдээрээ туг тахиж, халаа сэлгээ, толгой дараалан хийхээс бусдаар хийсэн ажилгүй суугаа нь нууц биш юм.