Монголын Улсын ерөнхий аудитор Д.Занданбат “Би 10-20 мянган төгрөгийн зангиа зүүдэг” хэмээсэн нь цахим орчинд шуугиан тариад байна. Тухайлбал, "Лайвчин Д.Мөнх-Эрдэнэ" нэрээрээ алдаршаад буй АН-ын ҮБХ-ны гишүүн, Ерөнхий консул асан Д.Мөнх-Эрдэнэ нүүр хуудсаараа дамжуулсан дүрс бичлэгийн үеэр Д.Занданбат дээрх үгийг хэлсэн юм. Энэ нь олон нийтийн дургүйцэлтэй нүүр тулаад байна гэхэд хилсдэхгүй. Учир нь, түүний ажлын өрөөнд буй зангианууд нь дэлхийн алдартай брэндийн үнэтэй зангианууд байсан юм. Гэтэл тэрбээр зангиануудаа “10-20 мянган төгрөгөөр худалдан авсан” хэмээн ярьсан нь олны дургүйцлийг хүргээд буй. Яг үнэндээ 10-20 мянган төгрөгийн үнэтэй зангиа захуудын лангуу бүү хэл хуучин хувцас зардаг комиссын дэлгүүрт ч өдгөө байхгүй. Үүнийг энгийн иргэд мэдэж байгаа. Тиймээс л дургүйцлээ илэрхийлж байгаа бөгөөд энэ нь ч зүйн хэрэг биз.

Яг үнэндээ 10-20 мянган төгрөгийн үнэтэй зангиа захуудын лангуу бүү хэл хуучин хувцас зардаг комиссын дэлгүүрт ч байхгүй

       Өдгөө 56 нас хүрч яваа Д.Занданбатыг "1000 ам.долларын үнэтэй зангиа зүүсэн" гээд хэлчихэд хэн ч буруутгахгүй, барьцахгүй байх байлаа. "Насаараа шахам төрийн байгууллагад удирдах албан тушаалд ажиллаж, хөдөлмөрлөснийхөө үр шимийг хүртэж” хэмээн олон нийт харах, магад анзаарахгүй өнгөрөх байв. Гэтэл тэрбээр хөрсөн дээрээ буусан оновчтой бөгөөд үнэн үг хэлж чадаагүйн улмаас өөр өөрийгөө олон нийтийн өмнө буруутан болгоод байгаа нь энэ. Тодруулбал, Монгол Улсын Ерөнхий аудитор Д.Хүрэлбаатарыг Жижиг, дунд үйлдвэрлэлийг хөгжүүлэх сангаас бага хүүтэй зээл авсан асуудалтай нь холбогдуулан УИХ-ын 2018 оны арваннэгдүгээр сарын 22-ны өдрийн 86 дугаар тогтоолоор албан тушаалаас нь түдгэлзүүлсэн юм. Улмаар түүний оронд Д.Занданбат томилогдож, өдгөө ч ажилласаар байна. Нэг үгээр бол хүн юу хэлээд, хийгээд бурууддаг вэ гэдгийг дэргэдээс нь харж буй Д.Занданбатын буруудах шалтгаан нь үнэтэй зангиандаа биш, худал хэлсэндээ л байв. Эсвэл Д.Занданбат зүүж буй зангианыхаа үнийг мэддэггүй байж болох уу. 

Д.ЗАНДАНБАТ ГЭЖ ХЭН БЭ

         Баянзүрх дүүргийн татварын хэлтэст улсын байцаагч, Нийслэлийн татварын газарт улсын байцаагч, Хан-Уул дүүргийн татварын хэлтсийн дарга, Татварын ерөнхий газрын Улсын төсвийн орлого, хяналтын газрын дарга, нийслэлийн Хан-Уул дүүргийн Засаг дарга, нийслэлийн Сүхбаатар дүүргийн татварын хэлтсийн дарга, Зам, тээврийн хөгжлийн яамны Төрийн захиргаа, удирдлагын газрын дарга, мөн яамны Санхүү, эдийн засгийн хэлтсийн дарга, Хөрөнгө оруулалт, үйлдвэрийн хэлтсийн дарга, Татварын ерөнхий газрын даргын үүргийг түр орлон гүйцэтгэгчээр томилогдон ажиллаж байсан туршлагатай нэгэн. Д.Занданбатыг “Төсвийн мөнгийг удаа дараа үр ашиггүй зарцуулсан” хэмээн сүр дуулиан болж байсан цаг саяхан. Түүнчлэн түүнийг хувийн харилцаатай эмэгтэйчүүдээ албан тушаалд томилдог гэх яриа жиргээчдийн дунд байдаг. Мөн Хөгжлийн банкны зээлтэй холбоотой асуудлуудад хяналт тавьж, төрийн нүд, чих болж байх учиртай гол хүн нь Д.Занданбат байлаа. Гэтэл тэрбээр олон нийтэд нээлттэй мэдээлэл өгөх шаардлагатай бүхнээс зайлсхийж, өдий хүрсэн гэхэд болно.

Хөгжлийн банкны зээлтэй холбоотой асуудлуудад хяналт тавьж, төрийн нүд, чих болж байх учиртай гол хүн нь Д.Занданбат байлаа. Гэтэл тэрбээр олон нийтэд нээлттэй мэдээлэл өгөх шаардлагатай бүхнээс зайлсхийж, өдий хүрсэн гэхэд болно

       Монгол Улсын Ерөнхий аудитор Д.Занданбат төрийн байгууллагад олон жил жил ажиллаж, татварын мөнгөөр угжуулсаар байгаад үнэхээр зүүж буй зангианыхаа үнийг мэдэхээргүй болтлоо баяжсан уу эсвэл ард иргэдийг юу ч мэдэхгүй хэмээн даажигнасан уу. Ямартай ч өнгөрсөн амралтын өдрүүдэд түүний талаарх мэдээлэл цахим ертөнцөд хангалттай цацагдлаа. Харин өнөөдрөөс албан тушаалдаа үлдэх эсэх тухай нь шийдвэр гаргагчид хэлэлцэх нь дамжиггүй биз ээ. Ер нь өмсөж байгаа хувцас бүү хэл, идэж буй талхныхаа үнийг ч мэдэхгүй хүмүүсээр төрийн алба дүүрчээ, Ерөнхий сайд аа...