Өргөө амаржих газрын дарга Ж.Энхцэцэгийг ажлаас нь чөлөөлөх тушаал гаргасан Эрүүл мэндийн сайд С.Энхболдын суудал ганхаж эхэллээ. Нэг эмнэлэгийн даргыг сольсон биш өөрөө сайдынхаа суудалд байх уу, үгүй юу гэдэг дээрээ тулав. Ингэхдээ Өргөө амаржих газрын дарга Ж.Энхцэцэг цахим орчинд сэтгүүлчдийг хоёр талцуулж, заримыг нь С.Энхболдын эсрэг босгов.  “Ж.Энхцэцэг Монголд битгий хэл дэлхийд байхгүй сайн эмч. Энэ хүн шиг сэтгэл зүтгэлтэй эмч хараагүй. Эрүүл мэндийн салбарын хатиг бэтгийг шахаж байсан юм” гэсэн пи-ар цахим орчинд хэдэн өдөр үргэлжилсэн. Мөн шууд дамжуулалт хийдэг хэд хэдэн хэвлэл мэдээллийн хэрэгсэл Ж.Энхцэцэг захирлыг өмгөөлж  мэдээлэл хийв.

          Харин өөдөөс нь Эрүүл мэндийн яамныхан Ж.Энхцэцэг захирал болоод 20 гаруй жил цагдаад ажиллаж байгаад Өргөө амаржих газрын дэд даргаар ажилласан хурандаа П.Эрдэнэцэцэг нарын нууц бичлэгийг задарлаа. Халагдсан даргаасаа ч илүү заналхийлэл, сүрдүүлэг үйлддэг П.Эрдэнэцэцэг жинхэнэ төрхийг дараах үгсээр тодорхойлж болно. “Би нэг зуусан юмаа тавьдаггүй шүү, цус гаргаж байж сална шүү Мөнхзул та хоёроос. Новшнууд чинь бүр алцаганаад байх юм. Би хулгайчтай харьцдагаараа харьцаж байна. Би та нараас давсан танилтай шүү” гэх мэтчилэн ёс зүйгүй хандлагаар үг гээхгүй маргалдаж байгаа хурандаа Өргөө амаржих газрын дэд даргаар ажиллаж байжээ. Харин түүнийг дур мэдэн дэд даргын тушаалд томилсон Ж.Энхцэцэг “Би мөнгөтэй баян хүн, та нар шиг гуйлгачин биш” гэж эмнэлэгийн ажилчдаа доромжилдог гэв.

     Үүнд Эрүүл Мэндийн Яамны төрийн нарийн бичгийн дарга Ц.Эрдэмбилэг тайлбар өгөхдөө “Өргөө амаржих газрын дарга Ж.Энхцэцэг дур мэдэн сонгон шалгаруулалттай холбоотой заалтуудыг өөрчилсөн. Мөн харьяаны доор ажиллах ёстой үүргээ дэд захиралууддаа шилжүүлсэн болон санхүүгийн асар их зөрчил илэрсэн” гэлээ. 

      Ингэж Ж.Энхцэцэг болон түүнийг өмгөөлсөн дагалдангууд хийсэн нүглээ далдлах гэж өрөвдөлтэй түүх ярин хэвлэл мэдээллийн хэрэгслээр түгээж, нөгөө талд Ж.Энхцэцэгийг ажлаас нь чөлөөлсөн Эрүүл мэндийн сайд С.Энхболд болон түүнтэй хатуу тэмцсэн зарим эмч, үйлчлүүлэгчдийн байр суурь ард түмнийг цахим орчинд сөргөлдөхөд хүргээд байна. Өргөө амаржих газар нь цагтаа сайдын суудал ганхуулах нь битгий хэл Засгийн газрыг огцроход хүргэсэн баялаг түүхтэй.  

      Тэдний дунд архидалт, авлигалын хэргээс авахуулаад хэвийн төрөх эмэгтэйчүүдийн хярзанг хайчилж, оёж, дадлага хийлгэдэг байсан гэх яриа ч бий. Гэвч энэ бүхэн иргэдийн дунд түгэхтэй зэрэгцэн Ж.Энхцэцэг хэвлэл мэдээллээр төдийгүй өөрийн албан ёсны цахим хуудсаар дамжуулан “Өргөө амаржих газар олон жилийн түүхтэй. Энд олон чадварлаг эмч, эх баригч, сувилагч, мэргэжилтнүүд ажиллаж байна. Тэднийг минь бүгдийг нь харлуулж болохгүй. Би нэр төрөө сэргээлгэнэ. Салбар, яаманд гомдолтой байна” гэж өөрийгөө өмөөрч, яаманд гомдол гарган иргэдэд сайдыг буруутгах, огцруулах сэдэл төрүүлж байна гэх. Ийн нэгийгээ тал, талаас нь хэмлэж, зөв бурууг дэнсэлсэн Монголын цахим сүлжээнд Ж.Энхцэцэг, сайд С.Энхболд нарын тэмцэл өрнөж байгаа бололтой. Ганц даргын суудлаас болж Монголын ард түмэн талцахад хүрээд байна гэж хэлж болохоор. 

ЕРӨНХИЙ САЙДЫН ОНГОЦНЫ ШУУГИАНЫГ, ЭРҮҮЛ МЭНДИЙН САЛБАРЫН БУЛХАЙГААР ХАЛХАЛАХ ГЭВ ҮҮ 

             Нөгөө талдаа төрийн томчуудын сенсацийг энэ мэтээр дардаг уламжлалт технологи ч байж  мэднэ. Өөрөөр хэлбэл, Ерөнхий сайд Л.Оюун-Эрдэнэтэй холбоотой иргэдийн шүүмжлэл цахим орчинд багагүй шуугиан дэгдсэн. Ерөнхий сайд Холбооны Бүгд Найрамдах Герман Улсад хийсэн айлчлал хийх үеэрээ Франкфуртад буух ёстой байсан онгоцыг Берлинд газардуулсан нь иргэдийн дургүйцлийг хүргэж, хэл амны бай болоод байлаа. 

          Гэвч гэнэт тэсэрсэн эрүүл мэндийн салбарынхны бичлэг Ерөнхий сайдын онгоцны шуугианыг нам дарж орхисон. Засаг, төрийн удирдлагууд олны шүүмжлэлд өртөөд эхлэхээрээ эмнэлэг, сургуулийн захиралуудын халаасны бичлэг олонд дэлдэг. Үүгээрээ томчуудын дуулианыг дардаг тогтолцоо манайд бий.

    Хамгийн сүүлд гэхэд л Монгол Оросын хамтарсан гуравдугаар сургуулийн захирал Ж.Соронзонгийн дуулиан давхар дээлтэй сайд нарын мөн ч олон дуулианыг дарсан даа.

 Харин эцэстээ Ж.Энхцэцэг тэргүүтэй эрүүл мэндийн салбарын даргын суудал тойрсон маргаан Ерөнхий сайдын онгоцны чиглэл өөрчилсөн дуулианыг дарж орхив. Ингэж нэгийг, нөгөөгөөр далдалж, халхавч хийдэг тогтолцоо монголын улс төрд ужгирчихлаа.