Нийслэлчүүд автомашиндаа хоноход ойрхон байна. Хотын захад гэртэй иргэд ажлаа тараад харих замдаа машиндаа хоол хийж идэх, хөтөвчинд бие засах нь бараг энгийн хэрэглээ болох дээрээ тулчихаад байна гэхэд хэтрүүлсэн болохгүй байх. Иймдээ тулсан замын хөдөлгөөний түгжрэлийг "Түгжрэл бууруулна" хэмээгсдэд бодитоор мэдрүүлмээр байна. 

                 Жил бүр Улаанбаатар хотын замын хөдөлгөөний түгжрэлийг сааруулахад тэрбум, тэрбум төгрөгийн төсөв баталдаг. Гэвч тодорхой үр дүнд хүрэхгүй байсаар дээрх байдалд хүрчихлээ. Нийслэлийн Засаг дарга бөгөөд Улаанбаатар хотын захирагч Д.Сумъяабазар энэ оны хоёрдугаар сард "Түгжрэлийг шийднэ шүү дээ, угаасаа. Улсын хэмжээнд бүртгэлтэй 665 мянган тээврийн хэрэгсэл байна. Зам тээврийн хөдөлгөөнд оролцож буй нь 480 орчим мянга болж байна. Жилд 80 мянгаар тээврийн хэрэгсэл нэмэгдэж байна. Тэгэхээр Ухаалаг удирдлагын системтэй болох хэрэгтэй. Нийтийн тээврийн нэгдсэн систем, тойрог хурдны зам, бусад холбоос зам хэрэгтэй. Зогсоолыг бид төлбөртэй болгох ёстой. Мөн түгжрэлийн талаарх мэдээллийг тасралтгүй ард иргэдэд өгч, соён гэгээрүүлэх ёстой. Түгжрэл шийдэх 30 асуудлыг эхний ээлжинд батлуулахаар бэлтгэж байна. Ард иргэдийнхээ амьдралыг мэднэ, зовлонг нь хуваалцана” хэмээсэн. Тиймээс хамгийн түрүүнд хотын дарга Д.Сумъяабазарыг таксины жолооч болгоё. Нэг ч өдөр болов жолооч нарыг зовлонг мэдэрч, автозамын түгжрэл юунаас үүдэж, хэрхэн өрнөж байгааг мэдрэг. Тэндээсээ гарц гаргалгаа хайг. Түгжрэлд гацахын зовлон мэдэхгүй, бүр жолооны үнэмлэх ч үгүй зарим сайд, дарга түгжрэл бууруулна гэж ярихаар үнэндээ итгэл төрөхөө байчихжээ. Харин ч эсрэгээрээ ард иргэдээр, тэр бүүхэл жолооч нараар даажигнаад байгаа юм шиг санагддаг болоод уджээ. Ингэж хардах шалтгаан олон бий. 

түгжрэлийг бууруулах зорилгоор 2022-2024 онд жил бүр 420-оос доошгүй тэрбум төгрөгийг улсын төсөвт тусгаж байхыг сайд Б.Жавхланд даалгасан байдаг.

         Засгийн газрын ээлжит хуралдаанаар Улаанбаатар хотын автозамын түгжрэлийг бууруулах зорилгоор 2022-2024 онд жил бүр 420-оос доошгүй тэрбум төгрөгийг улсын төсөвт тусгаж байхыг сайд Б.Жавхланд даалгасан байдаг. Мөн түгжрэлийг бууруулах, нийтийн тээврийн үйлчилгээний чанарыг сайжруулах гадаадын зээл, тусламжийн төсөл, арга хэмжээг Улсын хөрөнгө оруулалтын хөтөлбөрт тусгах гэрээ, хэлэлцээр байгуулахыг холбогдох сайд нарт үүрэг болгосон. Инээдтэй нь, энэ бүхний эцэст ердөө хичээлийн шинэ жил эхлэх үе буюу наймдугаар сарын сүүлчээс есдүгээр сарын эхний тав хоногт автомашинуудыг дугаарын хязгаарлалтаар зорчуулсан төдий л арга хэмжээ байлаа. Хэдхэн хоног түгжрэл бууруулсан, гал унтраах энэхүү арга хэмжээгээ үргэлжлүүлэхийг санаархсанаас илүү дэвшилтэт хийгээд ухаалаг арга хэмжээ огт авсангүй. 

Зураг төслийг гаргаж олон нийтийн сүлжээгээр сүр дуулиантай гэгч цацагдаж дүүжин гүүрний асуудал өнөөдөр харин ул болоод үлдлээ

        Уур бухимдлын уурхай, үүтгэл болсон автозамын түгжрэлийг бууруулна хэмээн олон амлалт өгөөд "мурьсан" хүмүүсийн тоонд Нийслэлийн Засаг дарга бөгөөд Улаанбаатар хотын Захирагч асан С.Амарсайхан нэрлэгддэг. Тэрбээр “Хотын замын түгжрэлийг бууруулах нэгэн гарц болох дүүжин гүүрийг 2022 онд ашиглалт оруулна” хэмээн амлаж байлаа. Зураг төслийг нь гаргаж, олон нийтийн сүлжээгээр сүр дуулиантай гэгч цацаж байв. Иргэд ч тухайн үед түүнийг үнэхээр л амласнаа хийх байх, монголчууд дүүжин гүүртэй болох нь хэмээн итгэж байсан. Гэвч дүүжин гүүр ч үгүй, түгжрэл саарсан ч юмгүй бахь байдгаараа байж л байна. Энэ мэтчилэн түгжрэлээр далимдуулж, шоу, бизнес хийдэг төрийн түшээд манайд цөөнгүй. Тиймээс үнэхээр л замын хөдөлгөөний ачааллыг бууруулахад тодорхой үр дүнд хүрнэ л гэж байгаа бол Хотын дарга Д.Сумъяабазар та такси үйлчилгээнд ядаж ганц удаа ч болов явж, замын түгжрэлийн үнэн мөн чанарыг өөрөө мэдэрнэ үү. Тэгж гэмээнэ зөв бодлого, төлөвлөлт гарч мэднэ. Тэгж чадвал албан тушаалд чинь ч шат болох биз ээ.  Аа, харин такси үйлчилгээнд явахдаа нэг ч дагалдах даргагүй явбал үр дүнтэй шүү.