ЗГХЭГ-ын дарга Д.Амарбаясгалан сайдын суудлаа МАН-ын Ерөнхий нарийн бичгийн даргын албан тушаалтайгаа авч үлдэхээр намынхаа дүрэмт өөрчлөлт оруулах гэж байгаа гэнэ.

-Д.АМАРБАЯСГАЛАН МАН-ЫН ДҮРМИЙГ ӨӨРЧИЛНӨ-

МАН-ын Ерөнхий нарийн бичгийн даргын суудалд өөр албан тушаал эрхэлж байгаа хүн суухыг хориглодог. Тодруулбал, МАН-ын дүрмийн 29.2-т “Ерөнхий нарийн бичгийн дарга орон тооны байх бөгөөд өөр ажил, албан тушаал эрхлэхийг хориглоно” гэж заасан байдаг. Энэ  сургаар МАН-ын генсект өрсөлдөх хэд хэдэн хүний хувилбарын цуу тасарсангүй. Ерөнхийлөгчийн Тамгын газрын дарга Я.Содбаатараас эхлүүлээд МАН-ын Нарийн бичгийн дарга Ц.Чулуунзагд, Б.Тулга нар яригдаад амжив. Харин сүүлийн өдрүүдэд өөр нэгэн шинэ хувилбар гарч ирсэн нь ЗГХЭГ-ын даргаар ажиллаж байгаа Д.Амарбаясгалан өөрөө МАН-ын генсекийн албыг үргэлжлүүлэн хаших гэнэ.

МАН-ын дүрэмд зааснаар намын Ерөнхий нарийн бичгийн даргыг томилох, чөлөөлөх эсэхийг Бага хурал зөвлөлдөж, шийдэх аж. Ээлжит МАН-ын Бага хурлаар 479 гишүүн хуралдан санал хурааж, шинэ генсекээ сонгоно. Харин ирэх арваннэгдүгээр сард товлогдсон тус хурал болохоос ч өмнө Д.Амарбаясгалан намынхаа холбогдох хүмүүстэй тохирч, дээр дурдсан МАН-ын дүрэмд өөрчлөлт оруулахаар ярьж байгаа гэнэ.

-САЙД Д.АМАРБАЯСГАЛАНГИЙН ЭХНИЙ АЖИЛ НЬ ТӨРИЙН ХЭМНЭЛТИЙН ТУХАЙ ХУУЛИЙН ХЭРЭГЖИЛТИЙГ ШАЛГАЖ, МХЕГ-ЫН ЧИГ ҮҮРЭГ ӨӨРЧЛӨЛТ ОРУУЛАХ БАЙВ-

Наймдугаар сарын 29-нд ЗГХЭГ-ын даргаар томилогдсон Д.Амарбаясгалан түүнээс хойш Засгийн газрын хоёр ч хурлын талаар мэдээлэл хийж, сайдын суудалд хэрхэж байгаагаа нийтэд харуулав.

Тэгэхдээ Төрийн хэмнэлтийн тухай хуульд шалгалт хийх болон МХЕГ-ын үйл ажиллагааны чиг үүргийг өөрчлөлт хийх талаар мэдэгдсэн. Тухайлбал, Төрийн хэмнэлтийн тухай хуулийн хүрээнд 2022 оны төсвийн жилд 5.8 тэрбум төгрөг хэмнэх тооцоо гарч байв. Уг хуулийн төслөөр Засгийн газрын агентлагуудын 159 тэргүүн дэд, орлогч дарга, зөвлөхийг чөлөөлж, төсвийн жилдээ 1.4 тэрбумыг, сайдаас доош түвшний албан тушаалтнуудын автомашины хэрэглээг хязгаарлаж, төсөв ерөнхийлөн захирагчдын эзэмшилд байсан 586 автомашиныг битүүмжилснээр энэ төсвийн жилд гарах байсан урсгал зардлаас 268.4 сая төгрөг хэмнэсэн урьдчилсан дүн гарчээ. Харин Засгийн газрын хуралдаанаар Төрийн хэмнэлтийн тухай хуулиар төрийн албаны ёс зүйг эрхэмлэх, татвар төлөгчдийн мөнгийг хэмнэх, хэрхэн зарцуулах зэрэг асуудалд хангалттай бус гэж үзэн хяналт, шалгалт хийхээр болсон. Улмаар шалгалт хийх Ажлын хэсэг зохион байгуулж, ЗГХЭГ-ын дарга Д.Амарбаясгалан өөрөө ахалж, хуулийн хэрэгжилтэд дүгнэлт хийхээр болсон юм.

                                Мөн 2023 оны нэгдүгээр сарын 1-нээс МХЕГ-ын чиг үүргийг өөрчлөхөөр болсон. Энэ тухай ЗГХЭГ-ын дарга Д.Амарбаясгалан “Иргэдэд хүнд суртал үүсгэж байгаа олон давхардсан хяналт шалгалтыг багасгаж, илүү ойлгомжтой болгох бодлого баримталж, МХЕГ-ын чиг үүргийг өөрчилнө” гэсэн юм. Өөрөөр, “МХЕГ хувийн хэвшил, ард иргэдийг бус төрд хатуу хяналт тавьдаг болно” буюу төр өөрөө өөртөө хяналт тавьдаг болох аж.

-Д.АМАРБАЯСГАЛАН ХЭМЖЭЭГҮЙ ЭРХТ БОЛНО ГЭВ-

Хамгийн залуу буюу 27 насандаа МАН-ын Хэрэг эрхлэх газарт ажиллаж байсан гэх тодотголтой Д.Амарбаясгалан энэ жил МАН-ын Ерөнхий нарийн бичгийн даргаар дөрөв дэх удаагаа улиран ажиллаж байв. Одоо ЗГХЭГ-ын даргаараа ч, МАН-ын Генсекээрээ ч үргэлжлүүлэн хамт ажиллаж болзошгүй байгаа гэх.

                       Төрийн эрх барьж байгаа МАН болон бусад сөрөг хүчинд өөр албан тушаал хашдаг генсек үгүй. Харин МАН-даа генсекээр дөрөв улиран сонгогдож, намынхаа “загалмайлсан эцэг” болтлоо томорсон Д.Амарбаясгалан улс төрийн шинэ түүх бичиж, ЗГХЭГ-ын дарга, МАН-ын генсекийн суудалд зэрэг суух юм байна. Д.Амарбаясгалан санасандаа хүрч, МАН-ын дүрэмд өөрчлөлт оруулбал, нэг намын генсек ЗГХЭГ-ын даргаар ажиллаж байгаа болно. Намын хамаа, харьяалалтай ч бус бүр намынхаа ажлыг Засгийн газраар дамжуулан гүйцэтгүүлдэг бүрэн эрхтэй болох юм.

Засгийн газрын “бүрэн эрхт” сайд, МАН-ын “домогт” генсек Д.Амарбаясгалан санасандаа хүрэх намын Бага хурал хүртэл хоёрхон сарын зай үлдлээ дээ.