МАН-ын Удирдах зөвлөл өчигдөр хуралдаж, Засгийн газрын найман сайдыг чөлөөлж, УИХ-ын найман гишүүнийг сайдаар томиллоо. Гэтэл сая томилогдсон УИХ-ын гишүүн найман сайдын гурав нь Увсын сайд болж байна. Бүр сүүлдээ нутгархаж, зиндаардаг үйлдлүүд гаарч, тэр дундаас Увсынхан улсын Засгийн газар биш, “Увсын” Засгийн газар болгох нь.

                          Сүүлийн үед улс төрд нутаг нутгаараа ялгарч, нутгархдаг болсныг хүмүүс андахгүй. Нэгэн бүхэл байх ёстой Монголын төр Хэнтийн, Увсын, Говь-Алтайн гэх зэргээр хуваагддаг болжээ. Жишээлбэл, Хэнтийн бүлэгт Ерөнхийлөгч У.Хүрэлсүхээс эхлүүлээд Ерөнхий сайд Л.Оюун-Эрдэнэ, УИХ-ын гишүүн Б.Бат-Эрдэнэ, Ц.Идэрбат нар багтаж байх. Бүр сүүлдээ нутгархаж, ялгардаг нь гаарч, аав, ээж нь Говь-Алтайнх гэгддэг Ерөнхийлөгч У.Хүрэлсүх хүртэл Говь-Алтайн бүлэгтэй нийлдэг гэнэ. Тэгвэл Монголын төрийн “толгой”-д гарсан нутгийнхнаас Хэнтийн фракцын ардаас Увсынхан “дөрөө харшуулж” яваа сурагтай. Улсын төсвийн хуваарилалтаа яваад эхлэхээр Хэнтий аймгийн төсөвт хэдэн тэрбумаараа явж, араас нь Увс залгадаг гэх. Энэ мэтчилэн Увсын фракц Хэнтийнхнээс дутахгүй, бүр Засгийн “толгой”-д гарчих шахам болсныг сүүлийн өдрүүдийн улс төр ил болгож байна.

Өчигдөр МАН-ын Удирдах зөвлөл хуралдаж, Л.Оюун-Эрдэнийн Засгийн газраас найман сайдыг чөлөөлж, найман сайд томилохдоо Увсын гэх тодотголтой гурван УИХ-ын гишүүнийг томилов.

Тухайлбал, УИХ-ын Төсвийн байнгын хорооны дарга Ч.Хүрэлбаатарыг Эдийн засаг, хөгжлийн сайдаар, УИХ-ын Эдийн засгийн байнгын хорооны дарга Ж.Ганбаатарыг Уул уурхай, хүнд үйлдвэрийн сайдаар, УИХ-ын Үйлдвэржилтийн бодлогын байнгын хорооны дарга Б.Чойжилсүрэнг Эрчим хүчний сайдаар томилсон.

Улаангом хотоор овоглодог Ч.Хүрэлбаатар, Б.Чойжилсүрэн нараас гадна аав, ээж нь Увс аймгийн гаралтай гэгддэг Ж.Ганбаатар гишүүн ч багтжээ. Ерөнхий сайд Л.Оюун-Эрдэнэ өчигдөр МАН-ын Удирдах зөвлөлийн хурал болж байх үеэр Эдийн засаг, хөгжлийн яамыг “Засгийн газрын I яам” гэж онцлон хэлж байв. Тэгвэл өнөөгийн Засгийн газрын номер нэг яамд нь Увсын сайд очиж байх юм.

                          Нутгархаж, ялгарсан улс төрийн “маргаан”-д Увсынхны “шид” дуусахгүй. Сая сайдаар томилогдсон Ч.Хүрэлбаатар, Б.Чойжилсүрэн, Ж.Ганбаатар нараас гадна ЗГХЭГ-ын даргаас чөлөөлөгдөж байгаа Ц.Нямдорж, УИХ-ын гишүүн Н.Алтанхуяг, О.Цогтгэрэл нар ч багтана. Засгийн газрын нөлөө бүхий яамдаас эхлээд УИХ-д ч Увсынхы нөлөө томорч, ердөө Увс аймгийн ИТХ шиг харагдах болов.

-САЙДААР ТОМИЛОГДСОН УВСЫН ГУРВАН ГИШҮҮНИЙ ХЭН НЬ ХЭН БЭ-

ЭДИЙН ЗАСАГ, ХӨГЖЛИЙН САЙД Ч.ХҮРЭЛБААТАР

Ч.Хүрэлбаатар Увс аймгийн Улаангом хотод төрсөн. Тэрбээр Улаангомын 10 жилийн II сургуулийг дүүргэж, 1991 онд ОХУ-ын Ленинград хотын Санхүү эдийн засгийн дээд сургууль төлөвлөгөө, эдийн засагч мэргэжлээр, 1998 онд Австралийн Сидней Их сургуулийг эдийн засагч мэргэжлээр тус тус төгссөн.

АЖИЛЛАСАН БАЙДАЛ:

• 1991-1992 онд Yндэсний хөгжлийн яаманд эрдэм шинжилгээний ажилтан
• 1992-1995 онд Монгол Улсын Их Сургуулийн Эдийн засгийн сургуульд багш
• 1998-2000 онд ЭЗБД төсөлд ахлах эдийн засагч
• 2000-2003 онд Монгол Улсын Ерөнхий сайдын эдийн засгийн зөвлөх
• 2003-2007 онд Санхүү, эдийн засгийн яамны Төрийн нарийн бичгийн дарга
• 2007-2008 онд Монгол Улсын Засгийн газрын гишүүн, Түлш эрчим хүчний сайд
• 2008-2012 онд Монгол Улсын Их Хурлын гишүүн
• 2008-2009 онд Монгол Улсын Их Хурлын Төсвийн байнгын хорооны дарга
• 2009-2012 онд Монгол Улсын Засгийн газрын гишүүн, Монгол Улсын сайд, ЗГХЭГ-ын дарга
• 2012-2016 онд Монгол Улсын Их Хурлын гишүүн
• 2016-2020 онд Монгол Улсын Их Хурлын гишүүн
• 2016-2017 онд Монгол Улсын Их Хурлын Төсвийн байнгын хорооны дарга
• 2017-2020 онд Монгол Улсын Засгийн газрын гишүүн, Сангийн сайд
• 2020 оноос Монгол Улсын Их Хурлын гишүүн
• 2020-2021 онд Монгол Улсын Засгийн газрын гишүүн, Сангийн сайд
• 2021 оноос     Монгол Улсын Их Хурлын Төсвийн байнгын хорооны даргаар ажиллаж байв.

ЭРЧИН ХҮЧНИЙ САЙД Б.ЧОЙЖИЛСҮРЭН

Б.Чойжилсүрэн нь Увс аймгийн Улаангом хотод төрсөн. Тэрбээр Улаангомын 10 жилийн сургуулийг дүүргэж, 1993 онд ОХУ-ын Екатеринбург хотын Уралын политехникийн дээд сургууль автоматикч телемеханикч мэргэжлээр төгсжээ.

АЖИЛЛАСАН БАЙДАЛ:

• 1993-1995 онд ОХУ-ын Екатеринбург хотын "СП-Каман" компаний захирал
• 1995-1999 онд "Хурд Ч" ХЭАА-н захирал
• 1999-2006 онд "Хурд Хүнс" ХХК-ий захирал
• 2006-2008 онд Монгол Улсын Ерөнхийлөгчийн Тамгын газрын дэд дарга
• 2008-2012 онд Монгол Улсын Их Хурлын гишүүн
• 2012-2016 онд Монгол Улсын Их Хурлын гишүүн
• 2016-2020 онд Монгол Улсын Их Хурлын гишүүн
• 2016-2017 онд Монгол Улсын Засгийн газрын гишүүн, Сангийн сайд
• 2017-2020 онд Монгол Улсын Их Хурлын Төсвийн байнгын хорооны дарга
• 2020 оноос Монгол Улсын Их Хурлын гишүүн
• 2020 оноос Монгол Улсын Их Хурлын Үйлдвэржилтийн бодлогын байнгын хорооны даргаар ажиллаж байна.

​

УУЛ УУРХАЙ, ХҮНД ҮЙЛДВЭРИЙН САЙД Ж.ГАНБААТАР

Ж.Ганбаатар нь 1991 онд Налайхын 10 жилийн дунд сургуулийг төгсөж, 1995 онд Худалдаа үйлдвэрлэлийн дээд сургууль, эдийн засагч, 1995 онд Худалдаа үйлдвэрлэлийн дээд сургууль, эдийн засагч мэргэжлээр төгсжээ. Мөн түүний аав, ээж нь Увс аймгийн гаралтай хүмүүс байдаг учир Ж.Ганбаатарыг УИХ-ын дахь Увсын фракцыг дагадаг гэнэ.

АЖИЛЛАСАН БАЙДАЛ:

• 1996-2015 онд “Оргил” худалдааны төвийн ерөнхий захирал, зөвлөх
• 2004-2012 онд Баянгол дүүргийн Засаг даргын зөвлөлд зөвлөх
• 2008-2012 онд Нийслэлийн иргэдийн төлөөлөгчдийн хурлын төлөөлөгч, тэргүүлэгч
• 2016-2020 онд Монгол Улсын Их Хурлын гишүүн
• 2016-2019 онд Жижиг, дунд үйлдвэрлэлийн хөгжлийн дэд хорооны дарга
• 2019-2020 онд Монгол Улсын Их Хурлын Эдийн засгийн байнгын хорооны дарга
• 2020 оноос Монгол Улсын Их Хурлын гишүүн
• 2020 оноос Монгол Улсын Их Хурлын Эдийн засгийн байнгын хорооны даргаар ажиллаж байна.