Намрын улс төр нэлээн ширүүн эхлэхээр байна. Үнийн хөөрөгдлөөс эхлүүлээд инфляц "тэнгэрт хадахад" нөлөөлсөн Засгийн газраа "базаж" чаддаггүй тэргүүнийх нь "толгой"-г ярих нь ээ. Засгийн газрын тэргүүний зэрэгцээ эрх баригч намын дарга хэдий ч, парламентад "багадаж" байна. МАН-ын "ах нар"-тайгаа яриа нийлэхгүй байгаагаас эхлүүлээд өөрийн хүчээ бүрдүүлэхээр Засгийн газрын сайдуудаа давхар дээлтэйгээр дахин бүрдүүлэх сонирхлоо эртнээс илэрхийлж байсан. Гэсэн ч одоо Л.Оюун-Эрдэнэд "түшиг" болох хань ч, сүр хүч ч алга байна.

                    Эхэндээ “Л.Оюун-Эрдэнийн Засгийн газар тун удахгүй танхимаараа огцрох гэнэ лээ” гэлцдэг байлаа. Төд удалгүй “Таван сайдаа сугалж огцруулах гэнэ лээ” гэх болсон. Сүүлд нь “Үндсэн хуулийг өөрчлөх замаар УИХ-аас танхимаа, сайд нараа бүрдүүлж, цөмийг нь давхар дээлтэй болгоод цааш явах болсон гэнэ” гэлцэж эхэлсэн. Гэвч бүтэн жилийн хугацаа өнгөрөхөд аль аль шийдэл, таамаг нь биелсэнгүй, ажиг сураггүй байсаар л. Ерөнхий сайд Л.Оюун-Эрдэнийн гол алдаа энэ. “Өөх ч биш, булчирхай ч биш” гэдэгтэй утга адилаар огцрох, огцрохгүйгээ нэг мөр зарлаад, нийгэмд үүсээд буй хүлээлт, таамгийг эцэслэхгүй байгаа нь түүний алдаа. Энэ Засгийн газар орших, эс оршихоо эцэслэхгүйгээр, энэ л янзаараа таавар таалгасан хэвээр байвал цааш явах зам үлдсэнгүй. Ингэж хэлэхийн учир нь, “Удахгүй огцрох юм гэнэ лээ” гэдэг яриа нь эцэстээ энэ Засгийн газрын хандлагыг “Буцах бэрд үнээ тугал нийлэх хамаагүй” гэж харагдуулж байгаа юм. 

Төрийн шат шатанд “Засаг удахгүй огцорно” гэх хүлээлттэй, огцрохыг нь отсон горьлогчидтой байгаа. Үнэндээ улс төр ч, бизнес ч “Засаг огцрох эсэхээс хамаараад” гэдэг байдлаар гацаанд орчихлоо. Огцорч болзошгүй сайдууд, оронд нь томилогдож магадгүй нөхдүүдийн хэн хэн нь хаа хаанаа хувцсаа баглачихаад хүлээж байгаа нөхцөлд Засгийн газраас дорвитой шийдэл гарахгүй, төрийн ажил урагшлахгүй л дээ. Энэ Засгийн газрын зарим сайд “Өнөө маргаашгүй явахын хооронд өөртөө төвөг удах хэрэг юу байна” гэх маягийн хандлага гаргаж, салбараа сул хаячихаад байгаа нь бодит үнэн. Нэмээд Засгийн газар огцорчихвол яам, агентлагаасаа эхлээд томилгоо явагдана, тэр үед хэнийг бараадаж, хаана хурган дарга болохоо тоочиглосон нөхдүүд хаа сайгүй байна. Төрийн ажил түгжирч гацаад, улсын ажил урагшлахгүй зогсоод байгаа гол шалтгаан ердөө л энэ. 

                    Улсын инфляц 16 хувь давахад, бараа, бүтээгдэхүүний үнэ "тэнгэрт хадсан"-ы гол шалтгаан, эзэн Ерөнхий сайд Л.Оюун-Эрдэнийн "ойчих" цаг ойртож байгаа нь илт байна.