Нэгэн  цагт тэр Монголын “хаан” байлаа.  Улс төрийн акц болгоныг тэр хийдэг. Өөрийнхөө нэр хүндийг ард иргэдийн дунд  домог мэт яригдах пи арыг  сайн хийж чаддаг байв. Өөрт нь таалагдсан нэгнийг “кран”-даж  өндөр албан тушаалд томилуулдаг. Бас  түүнд дургүй хүмүүсийг шахан хавчиж, хэн ч биш болгодог. Бүр шорон оронгоор айлгадаг байсан. Хэзээ ч улстөрийн өндөр сэнтийгээс буухгүй юм шиг. Насан туршдаа “хаан”-ы амьдралаар амьдрах юм шиг  л аашилдаг, аягладаг байв. Үүнээс болж олон ч дайсан өөртөө бэлдсэн.  Өс өвөртөлж, хутга ханцуйлагсдын тоо хэдэн зуугаараа нэмэгдсэн юм. Түүнээс намынхан нь урваж, шарваж эхэлсэн байдаг. Ингээд 2009 оны Ерөнхийлөгчийн сонгуульд тэр  өвдөг шороодож,  улс төрийн  тавцангаас хөөгдсөн. Тухайн үеийн МАХН нэрээ өөрчлөн Х үсгээ авч хаяад МАН гэх  нэртэй болсон. Энэ цаг үеэс нэгэн цагт монголын хаан ширээнд заларч явсан Намбарын Энхбаярын  болон гэр бүлийнхний  амьдралын гунигт түүх эхэлсэн гэж хэлж болно. 

Оймстойгоо хүртэл ачигдаад явахад нь "Улстөрийн хэлмэгдүүлэлтэд өртлөө" гэж эвийлж, өрөвдөх хүн олон байлаа. Хорих ангид өлсгөлөн зарлаад бие нь муудаж, дараа нь Солонгос руу биеэ эмчлүүлэхээр явахад нь ч Н.Энхбаярын дэмжигчид түүнээс урвасангүй. Харин тэр өөрөө л дэмжигчдээ урваж, хүүгээ УИХ-ын гишүүн болгохоор өөрт нь итгэсэн хүнээ бүгдийг нь "зарсан" байгаа юм. 

"Төрийн тэргүүн байсан хүн харь оронд сууж болдог юм байна" гэсэн буруу ойлголтыг ард түмэндээ төрүүлсэн Н.Энхбаяр өнгөрсөн оноос улстөрийн замналаа өндөрлүүлж, Үндэсний аюулгүй байдлын зөвлөлийн томоохон албан тушаалд томилогдоод амар жимэр суух болов. “Ямар ч аргаар болтугай” гээд хүүгээ УИХ-ын гишүүнд “өргөмжлөх” гэсэн Н.Энхбаярын хүсэл биелсэн нь түүний тэнгэр харж хэвтээд “гэдсээ илээд” тайван сууж байх шалтгаан болсон гэж хэлж болно. 

                    Уг нь түүний хүү Э.Батшугар аавынхаа МАХН-аас сонгуульд нэр дэвшсэн бол нэлээн рэйтинг өндөртэй өрсөлдөгчдийн нэг, бүр ядахдаа л нэр цэвэр байх сан. Гэтэл Э.Батшугар 2021 онд дахин гарч ирээд өнгөрсөн жил нь учир зүггүй муулж явсан МАН-аа тэнгэрт тултал магтаад эхлэх нь тэр. Тэр цагаас л хойш Э.Батшугар аавынхаа нүүрийг “шороо”-той нь хутгаж, Н.Энхбаяр ч хүүгээ УИХ-ын гишүүн болгохын тулд юугаа ч өгөхөөс сийхгүй гэдгээ нотлоод авч байна. Нэгэн үед “МАН-аас өрх тусгаарлаж, Монголын төрд бугшсан муу муухайг илчилнэ” гэж амласан тэр МАН-ын бөөрөнд наалдаж, “дэлүү” болсон түүх энэ. 

 -МАН-Д НААЛДСАН “ДЭЛҮҮ” МАХН ДАХИН “БУТАРЧЭЭ”- 

Хуучин цагийн МАХН-аас сугарч үлдсэн хэдэн хүн Н.Энхбаярын хүрээлэл болж, МАН-д элссэнийг хэн ч хэлээд өгнө. Гэтэл нэг хүрээлэл болж, Э.Батшугарыг УИХ-ын гишүүн болоход нь “бялуу” хувааж, “лаа” үлээлгэж явсан хэд нь хүртэл Н.Энхбаярыг “жийж” эхэлсэн гэнэ. МАХН-д 10 гаруй жил “өвөр түрийдээ” орж явсан буурал үст ах нь “зан”-гаа таниулж, хаяхаар арга ч үгүй биз. 

Одоо Н.Энхбаярт түүнийг гэх үлдсэнгүй. Хүүгээ дээш нь гаргах “мөрөөдөл”-өө биелүүлэхээр намаа МАН-тай нэгтгэсэнд хүрээллийнхэн нь орхиж, МАХН-ы “тасархай” юм болохоор нь шинэ намынхан нь “нэг нүдээрээ ч” тоож харахгүй юм байна. Улстөрд үс нь цайтлаа зүтгэсэн Н.Энхбаяр, аавынхаа салбарт дөнгөж “хөлд” орж яваа хүү Э.Батшугар хоёрт нэр төр, итгэл үнэмшил, бүр хүрээлэл ч үлдэлгүй дуусах нь дээ.