Онцгой байдлын аврагчид баярын өдрөөр ч, хүлээсэн үүрэг, хариуцлагадаа чин үнэнчээр зүтгэж, живж байгаа хүний араас гол руу өөрийн амийг үл хайхран үсэрч орж, байхад хүний амь аврах алдар бүү хэл гавьяа ч “байгуулаагүй” хэдэн сошиал медиагийн “од”, инфлюенсер нэртнүүд Их тэнгэрийн аманд хундага тулган зогсож байв. Гэмтлийн эмнэлгийн үүднээс эхлүүлээд гар, хөлөө хугалуулж, толгойгоо хагалуулж, цээжээ цоолуулсан нэгнээ тэврэн гуйж, ор, өрөө хүн хүч хүрэлцэхгүй сандралдаж байхад хамгийн үнэтэй, шимтэй гэсэн дарс, ундаа ууж, хонь бүтнээр нь шараад л “шавайгаа” ханатал найрласан гэнэ.

-ТӨРИЙН ХЭМНЭЛТИЙН ТУХАЙ ХУУЛЬ ЗӨРЧСӨН ДАЙЛЛАГЫН ХАРИУЦЛАГЫГ ХЭН ХҮЛЭЭХ ВЭ-

Өнгөрсөн баяр наадмын өдрүүдээр Их тэнгэрийн аманд төрийн дайллага нэрээр 2000 гаруй хүн цуглуулж, найрлуулжээ. Дайллагаар урлаг соёлын голцуу сошиалын “од”-ууддаа зориулсан хүлээн авалт зохион байгуулж, асар болгоных нь ширээг хамгийн үнэтэй гэсэн дарс, шар айргаар дүүргэсэн байх аж. Очсон инфлюенсерүүдийн цахим хаягтаа “гайхуулах” маягтай тавьсан зурагнаас ажихад аяга дүүрэн шар айраг, бүр архи ч барьсан харагдах.

Гэтэл Ерөнхийлөгчийн зохион байгуулсан төрийн дайллагад оролцсон хүмүүс дунд улсын ирээдүй, хөгжил ярих “гавьяа”-тай хүн алга. Эрдэмтэн, доктор, багш бүү хэл хүний төлөө тангараг өргөн идэвхтэй зүтгэж, ажиллаж байгаа эмч, аврагч ч харагдсангүй. Тэгээд л өнөө олны “улиг” болсон хошин шогийн жүжигчин, зохиолын дуучин, сошиалд “санаан зоргоороо” ярьж байдаг  инфлюенсерүүд очсон байх. Хатуухан хэлэхэд, нийгэмд хэрэгтэй бизнес эрхэлж, хүний цалин ч тавьж үзээгүй хэдэн сошиал “од” төрөөрөө дайлуулж суух “гавьяа”-тай эсэх нь эргэлзээтэй.

Төрийн дайллага эхлээд ид дундаа орж байгаа үе бололтой Ерөнхийлөгч У.Хүрэлсүх нээж үг хэлэхээр гарч ирж байна. Их тэнгэрийн аманд зассан их өргөө нь бололтой гэмээр том асраас тайз хүртэл дэвссэн улаан хивсэн дээгүүр мөн ч итгэлтэй гэгч нь алхалсаар явж байна шүү. Гэтэл Монгол Улсын Ерөнхийлөгчөөс эхлүүлээд төрийн түшээд, урлаг соёлын “од”-ууд, сошиал инфлюенсерүүд нь ард түмнээсээ “нууцаар” Их тэнгэрийн аманд найрласан нь монголчуудын баярын сэтгэгдэл, баяслыг үгүй хийв бололтой. Цахим сүлжээгээр дүүрэн иргэд Их тэнгэрийн аманд болсон төрийн дайллагыг буруушааж эхэлжээ. “Төсвийн мөнгөөр тоглолоо”, “Таван тэрбум төгрөгөөр зохион байгуулсан шуум байна” гээд л Ерөнхийлөгч төрийн дайллага, нь “бай”-гаа онолгүй даллага болсон талаар бичиж байна. Тэгвэл 2000 гаруй “од”-ууд цуглуулж, найрласан Их тэнгэрийн амны төрийн дайллага нь өөрөө хууль зөрчжээ.

Төрийн хэмнэлтийн тухай хуулийн 1.1 дүгээрт зааснаар “төр, түүний бүх шатны байгууллага, нийтийн алба, тэдгээрийн үйл ажиллагаанд санхүүгийн сахилга батыг мөрдүүлж, ил тод байдлыг хангах, үр ашгийг нэмэгдүүлэх, үрэлгэн байдлыг хязгаарлах, хяналт тавихтай холбогдсон харилцааг зохицуулах” тухай заалтыг Ерөнхийлөгчийн төрийн дайллага зөрчиж байна. Тухайлбал, Төрийн хэмнэлтийн тухай хуулийн 15.1.7-т “байгууллагын төсвөөр согтууруулах ундаа худалдан авах”, 4.1.3-т заасан “үр ашигтай байх” буюу үр ашиггүй зардал гаргахгүй байх заалтыг зөрчжээ. Бүр хамгийн наад захын жишээг авч үзэхэд Төрийн хэмнэлтийн тухай хуулийг 4.2.2-т заасан “хэмнэлтийн горим нь иргэд, олон нийтийн ашиг сонирхолд нийцэж, тэдний дэмжлэгийг хүлээхүйц түвшинд тодорхойлогдсон байх” заалтыг зөрчиж байгаа юм.

                    Ердөө хоёр сарын өмнөөс хэрэгжиж эхэлсэн Төрийн хэмнэлтийн тухай хуулийг зөрчвөл тухайн хуулийн 21.1-т  тусгаснаар “Төсвийн захирагч, энэ хуулийн 3.1.3, 3.1.4-т заасан этгээдийн гүйцэтгэх удирдлага болон холбогдох албан тушаалтан үйл ажиллагаандаа санхүүгийн сахилга бат, хэмнэлтийн горимыг мөрдөж ажиллаагүй нь тогтоогдсон бол ажлаас халах үндэслэл болно” гэсэн юм. Хоёрхон сарын “настай” Төрийн хэмнэлтийн тухай хуулийг зөрчсөн Их тэнгэрийн аманд болсон дайллагын хариуцлагыг хэн хүлээх вэ, Ерөнхийлөгч өө.