-ЭМГЭНЭЛ ИЛЭРХИЙЛЭХ БАЙСАН БОЛ АЛБАН ЁСНЫ, БҮР ЯДАХДАА ИНЭЭД АЛДАХГҮЙ Л БАЙСАН ДАА-

Элчин сайд Кобаяши Хироюкитэй гар барьж, эмгэнэл илэрхийлэх гэсэн биш инээд алдаад ард түмнээ “нүүр хийх” газаргүй болгож авлаа даа, Ерөнхий сайд. Үнэхээр л улсынх нь Ерөнхий сайд агсан Шинзо Абэ амиа алдсанд эмгэнэл илэрхийлэх байсан юм бол албан ёсны, бүр ядахдаа инээд алдахгүй л байсан даа...

                 Төрийн далбааны өдрөөр Ерөнхий сайд Л.Оюун-Эрдэнэ Монгол Улсад суугаа Бүрэн эрхт Элчин сайдуудыг хүлээн авч, уулзсан. Ерөнхий сайд ч эхнээс нь дотночлон гар бариад л ухас ухасхийн явлаа. Тэгж явсаар Япон Улсын Элчин сайд Кобаяши Хироюкигийн өмнө ирэхэд бусдаасаа арай удаж байна аа. Арга ч үгүй. Баяр наадам болохоос өмнөхөн Японы Ерөнхий сайд агсан Шинзо Абэ хүзүү, цээжин тус газраа буудуулж, шархаа даалгүй амьсгал хураасан юм. Тиймээс ч Ерөнхий сайд Л.Оюун-Эрдэнэ Японы Элчин сайд Кобаяши Хироюкид эмгэнэл илэрхийлэх санаатай бусдаас нь арай удаан зогсоо харагдаж байна. Гэтэл эмгэнэл илэрхийлэх биш бүр өөдөөс нь инээд алдан ярьж байх аж.

Ерөнхий сайд Л.Оюун-Эрдэнэ анхны албан айлчлалаа Япон Улсад хийж байв.

Япон Улсын Ерөнхий сайд агсан Шинзо Абэ амиа алдахад иргэд Японы Элчин сайдын яамны гадаа цуглаж, хүндэтгэлэн үзүүлэн цэцэг өргөж байлаа. Гэтэл тэнд очсон иргэдээ бүү хэл бүтэн улсаа төлөөлж байгаа Ерөнхий сайд маань албан ёсны эмгэнэлийн үг ч хэлэлгүй, таарсан газраа Элчин сайдад нь эмгэнэл илэрхийлэх гэсэн биш инээд алдаад бүр “доромжлоод” таарлаа. Зүүн Азийн хөгжилд чухал үүрэг гүйцэтгэсэн Японы Ерөнхий сайд агсан бусдын гарт амиа алдсанд Ази даяар харуусаж байхад монголчууд маань хүн ёсны мэдрэмж, хүндлэлгүй Ерөнхий сайдаасаа ичээд “нүүрээ хийх” газаргүй боллоо доо.

-ЕРӨНХИЙ САЙДЫН “БАЛАГ” ДУУСАХГҮЙ НЬ-

Ерөнхий сайд Л.Оюун-Эрдэнийн хүний эрхийн мэдрэмжгүй, хүндлэл, ёс зүйгүйн “балаг” дуусахгүй нь. Өмнө нь ч бүр эмэгтэйчүүдийг цэрэгт “явуулангаа” алдаж байлаа шүү.

                 Өнгөрсөн жил Л.Оюун-Эрдэнэ шинэхэн Ерөнхий сайд байхдаа Жендэрийн Үндэсний хорооны хуралд оролцож, хэлсэн үг нь эмэгтэйчүүд төдийгүй эрэгтэйчүүдийн ч “эгдүүцлийг” төрүүлээд амжсан. Тухайлбал, Ерөнхий сайд Л.Оюун-Эрдэнэ өнгөрсөн оны гуравдугаар сарын 5-нд болсон Жендэрийн Үндэсний хорооны хуралд үг хэлэхдээ “Эмэгтэйчүүдийн хөдөлмөр эрхлэлтийн оролцоог нэмэгдүүлэх тал дээр шинэ түвшинд ажиллах шаардлагатай байна. Энэ үгийг хэлсэндээ шүүмжлэлд өртөх л байх. Хэрэв хөдөлмөр эрхлэлтийн түвшний байдал эрс тэс болж, дөнгөж 17, 18 настайдаа гэрлэж байна. Энэ тохиолдолд эмэгтэйчүүдийг цэрэгт явуулахаас өөр гарцгүй байдаг гэж байгаа юм. Ингэж байж хөдөлмөрийн идэвхтэй оролцоонд тулгуурласан идэвхтэй иргэнийг бий болгодог.  Манай ажиллах хүч ердөө л 1.5 сая байдаг. Үүний 50 хувь нь идэвхгүй байж болохгүй” гэж хэлсэн юм.

Ерөнхий сайд Л.Оюун-Эрдэнийн хэлсэн үгийг эсэргүүцэж, иргэд эмэгтэйчүүдийн эрх, хүний эрхээ хамгаалахаар Сүхбаатарын талбайд жагсаал хүртэл хийж байв. Тэгэхдээ “8>9” гэсэн бичигтэй хуудсыг барьж, “Эмэгтэйчүүдийн эрх Ерөнхий сайдынхаас илүү” хэмээн жагссан юм.

                 Хүний эрхийн мэдрэмжгүй, хүн ёсны хүндлэлгүй Ерөнхий сайдынхаа өмнөөс монголчууд “хангалттай” ичлээ дээ.