-ТӨРИЙН АЛБАНЫХАН МУУДСАН МАХ ИДДЭГ НОХОЙ ЮМ УУ, Д.ГАНБОЛД ДАРГА АА-

         Төрийн албаныхныг төрийн албаны дарга нар нохой гэж боддог юм болов уу. Ямар ч ажил хийсэн, хаана, юу зохион байгуулна, дайчлах ажил байна урдаа барьдаг мод шиг л төрийн албаныхныг зүтгүүлчихнэ. Мод тарьлаа төрийн албан хаагчдыг ажил, амралтын өдөр гэхгүй өдөр, шөнөгүй талхиулах нь энүүхэнд. Дарга нарын уулзалт, сургалт, семинар боллоо төрийн албаныхан л явж байна. Ердөөсөө л уяатай нохой шиг хаана, ямар, үнэгүй хийлгэх ажил байна тэнд төрийн албаныхан зоолттой. Нөгөө “Төрийн албаныхан гэж иргэд нь дургүй, төр нь тоохгүй, цалин хөлс нь нэмэгдэхгүй. Бөөн сэтгэлүүд л явж байдаг шүү дээ, үнэндээ” гэдэг үг ч үнэний ортой бололтой.

         Хамгийн инээдтэй, өрөвдмөөр нь төрийн албаныханд хүн тоож худалдаж авахгүй болсон, химийн элдэв хорт бодис хольсон ч байх магадлалтай нөөцийн махны үлдэгдлээ “дараа төлбөрт” маягаар шахахаар болж, захирамж хүртэл гаргажээ. Үнэхээр өрөвдөлтэй юм аа, төрийн албаныхныг төрийн албаны дарга нар нь ингэж үнэгүйдүүлэхээр тэднийг хэн ойлгож, хүндлэх билээ дээ. Тодруулбал, Улаанбаатар хотын Ерөнхий менежер бөгөөд Захирагчийн ажлын албаны даргын албан үүргийг түр гүйцэтгэгч Д.Ганболд нэгэн хамтран ажиллах тухай захирамж гаргажээ.

Тэр Нийслэлийн нутгийн захиргааны байгууллагуудын удирдлагуудад хандаж, дараах хамтран ажиллах захирамжийг гаргасан байна.

         “Монгол Улсын Засгийн газрын хуралдаанаас нөөцийн махны нийлүүлэлтийг нэмэгдүүлэх, махны үнийг бууруулах шийдвэр гаргасантай холбогдуулан Улаанбаатар хотын Ерөнхий инженерийн 2022 оны А/18 дугаар тушаал байгуулан “Нийслэлийн хүн хүн амын өвөл, хаврын улирлын махны хэрэгцээнд зориулан бэлтгэн нөөцөлсөн махыг худалдан борлуулах ажлыг жил бүр зохион байгуулах, хяналт тавих Ажлын хэсэг”-ээс 2022 оны тавдугаар сарын 29-ний өдрөөс эхлэн үхрийн махыг жижиглэнгээр 8900, хонины махыг жижиглэнгээр 7750, гулуузаар 7550, ямааны махыг жижиглэнгээр 6900, гулуузаар нь 6450 төгрөгөөр тус тус худалдаалж эхлээд байна.

         Нөөцийн махны үлдэгдэл их байгаатай холбогдуулан төрийн болон нутгийн захиргааны байгууллагууд албан хаагчдадаа нэгдсэн байдлаар нэгдсэн байдлаар захиалж, дараа төлбөрт хэлбэрээр худалдан борлуулах ажлыг хамтран зохион байгуулж байна. Ийм нөөцийн мах авах албан хаагчдын захиалгыг 2022 оны зургадугаар сарын 03-ны дотор [email protected] хаягаар илрүүлж хамтран ажиллана уу” хэмээн гарын үсгээ зурж, төрийн тамга даржээ.

        Улаанбаатар хотын Захирагчийн ажлын албаны дарга нь ийм шийдвэр гаргах ч гэж дээ. Засгийн газрын тэргүүн нь “Нөөцийн махаа хурдан дуусга” гэхээр төрийн албаныхандаа шахдаг шахааны бизнес хийж байна хэмээн эгдүүцэх хүн ч олон байна. “Энэ хүн биш, оюутан” гэдэг шиг “Тэд төрийн албан хаагч биш, зарц, нохой” шиг л үзэж байна уу даа.