Царцаа, шоргоолж хоёроос ч долоон дор амьдарч байна даа, хэдүүлээ. Төр нь өөрөөсөө нуусан эд зүйл, зөвшөөрөл олгосон компанийн эзэн, зээл өгсөн бизнесмэн, зэргэлдээ орших хөршийн компаниа ч олохгүй, уймарч сууна. Уг нь ухаан байдаг бол царцаа шоргоолж найзыгаа уснаас аварчихсан шиг төрийн энэ олон түшээд тусгаар тогтносон жижигхэн улсаа аварч болмоор санагдах юм. Дээс томохын үлгэр ч манайд өрнөж чадахгүй дэнжигнэж байна даа. Ядахдаа ухаангүй ноён, урагшгүй албатуудынхаа толгой тархийг ажиллуулж байгаад ч болтугай зөвшөөрөл өгсөн компанийн эзнээ, зээл авсан улстөрчөө, зэргэлдээ орших хөрш улсын нүүрсний ченжээ аль хэдийнэ олоод хариуцлага тооцох хугацаа болчихлоо. Гэтэл юм л болбол эзэн нь олдохоо больчихдог “хэрэг”-тэй, түүнийг нь хайж байгаа улстөрчидтэй болж хувирлаа. Нэг улстөрч гарч ирээд л “Тэрний эзнийг олохгүй байна. Тэр хүнийг хайж байна” гээд л баахан эзэн биегүй эд зүйлтэй үлдсэнээ тоочдог өвчин тусчихлаа. Хамгийн хачирхалтай нь, Монголын ард түмэн, хэвлэл мэдээллийн хэрэгсэл, сэтгүүлчид төрийн ажлыг хийгээд, “Таны хайсан хүн энэ байна. Та нарын хайж байгаа компанийн эзнийг тэр гэдэг. Утасны дугаар, гэрийн хаяг, эзэмшдэг компани, бүүр түүгээр зогсохгүй хэзээ, хаанаас, хэнтэй хамтарч ажил хийсэн гэдэг нь энэ байна” гээд баримт гаргаад ирэхээр төр маань дүлий, сохор болчих юм. Яг л юм юм руу үсчиж, боргож, ульж байсан банхар хоолыг нь аягалаад өгөх хооронд долоох хүчгүй, хүсэлгүй болоод цаашаа хараад хэвтээд өгдөг шиг. Ийм л юм өрнөж байна даа, Монголд.  

Саяхан л онгоцонд суугаад эх орондоо ирснээ, казино тоглосноо, харийн орны онгоцны үйлчлэгчийн биед хүрснээ санахгүй, ой санамжаа алдсан гишүүдтэй байлаа, бид. Гэтэл одоо ажил нь бүтдэггүй, хүн нь олддоггүй хэдэн даргатай болж орхижээ, монголчууд минь. Мөн ч даажигнаж байна даа, биднээр.

ХӨГЖЛИЙН БАНКНААС ЗЭЭЛ АВСАН ХЭДЭН ҮХРИЙН ЭЗНИЙГ ОЛОХГҮЙ БАЙГАА Б.БАТТӨМӨР ГИШҮҮН БА ТҮҮНИЙ НӨХӨД

        Хамгийн эхний инээдтэй гэмээр юм уу, эмгэнэлтэй гэмээр юм уу “хэрэг” нь эзэнгүй хэдэн үхэр. Үхэр нь фермийн хашаандаа идээшээд, тэжээлээ цаг хугацаанд нь идээд байгаа хэрнэ эзэн нь байхгүй. Эзэн нь Хөгжлийн банкнаас зээл авсан даруйдаа, эсвэл Хөгжлийн банкны хэргийг хариуцсан Ажлын хэсгийн сургаар хэдэн үхрээ хаяад зугтаачихсан. Хаашаа явсныг нь хэн ч мэдэхгүй, хайгаад хайгаад олохгүй байгаа гэх. Бид ч яах вэ олж болох байх. Харин Б.Баттөмөр гишүүнд бол яагаад ч олдохгүй юм билээ. Тэр хоёр сар буюу 60 хоног үхрийн эзнийг хайгаад олоогүй, арга ядахдаа хэвлэлийнхэнд “Би үнэхээр үхрийн эзнийг олохгүй байна аа” гээд зогсож байсан.

Тодруулбал, Хөгжлийн банкны найдваргүй зээлдэгчдийн асуудлаар Төрийн ордонд нээлттэй сонсгол хийлээ. Энэ үеэр УИХ-аас томилогдсон Хөгжлийн банкийг шалгах ажлын хэсгийн ахлагч Б.Баттөмөр "Хөгжлийн банкнаас 4.1 тэрбум төгрөгийн зээл авсан "Сэлэнгийн герефорд" ХХК-ийн эзэн олдохгүй байгаа. Эзэн нь олдохгүй хэдэн үхэр л байна” гэж хэлсэн юм. Ийм л маягаар тэр Ажлын хэсгийг ахалж, улсын ажлыг явуулж байна. Хэдхэн товчлуур дарахад л хэдэн үхрийн эзнийг ах, дүү хамаатан садантай нь олчихож болно. Түүнд хэдэн үхрийн эзэн олдоно, гэвч тэр олохыг хүсэхгүй байгаад л учир бий.

ЭРЭЭНД ХӨЛ “УРГААД” ОЧЧИХСОН НҮҮРСНИЙ ЭЗНИЙГ Г.ЁНДОН САЙД ГААЛИЙНХАНТАЙ ХАМТ ХАЙСААР БАЙНА

         За, энэ ч яах вэ. Амьд хүн аргатай гэгчээр амьсгаатай байгаа хэдэн үхэр дээрээ эзэн нь ирж л таарах байх. Бас нэг инээдтэй “хэрэг” эзэн нь бас л олдохгүй байгаа Эрээн дээр өөрсдөө “ачигдаж” очоод хаачихаа мэдэхгүй байгаа 40 мянга гаруй тонн нүүрс байна.

     Г.Ёндон сайд ярихдаа “Хятадын талын хэлэлцээрийн үр дүнд нүүрс тээвэрлэлт нэмэгдэж байна. Ковидын халдвар нэмэгдэхгүй бол нүүрс тээвэрлэлт цаашид нэмэгдэх болно. Эрээд гацсан, төвлөрсөн байгаа нүүрс эзэнгүй байгаад байна. Өөрөөр хэлбэл, төлбөр нь төлөгдчихсөн байгаа нүүрсний эзэд олдохгүй байна шүү дээ. Экспортод гаргаж байгаа нүүрсний чанар, агууламжид анхаарлаа хандуулж байна. Нүүрсний компанийн эздийг хайж байгаа. Эрээнд төвлөрсөн нүүрсний ихэнх хэмжээ нь эзэнгүй. Эзэнтэй юм шиг хэрнэ сонин сонин нэртэй компани байна. Бид гаалийн байгууллагад эзнийг нь олоод өгөөч гэж хэлсэн байгаа” гэв.

      Уул уурхайн сайд Г.Ёндонгоор түүхий нүүрс нь хүртэл даажигначих бололтой юм. Эзэнгүй, мөнгийг нь төлсөн хүн нь мэдэгдэхгүй, ачаад очсон машины жолооч, ачиж буулгасан компанийн эзэд нь хүртэл олдохгүй юм. Сэжүүр олдохгүй Эрээнээр нэг эзэнгүй түүхий нүүрс, эзнийг нь хайсан албатууд байгаа бололтой дог. Гэхдээ бас Г.Ёндон сайдад буруу байхгүй ч байж болох. Үнэхээр эзэн нь олдохгүй байгаа нүүрсийг хаялтай нь биш, түлэлтэй нь биш байлгаж байхаас яалтай даа.

ӨМХИЙРСӨН БУЮУ 1.6 ТЭРБУМ ТӨГРӨГИЙН ҮНЭТЭЙ МАХАА ХАЯАД МЭРГЭЖЛИЙН ХЯНАЛТЫНХНААС ЗУГТААЧИХСАН МАХНЫ ЭЗЭН

         Хүнсний аюулгүй байдал сүүлийн өдрүүдэд хүчтэй хөндөгдөж байна. Бид үнэхээр эрүүл мах идэж байгаа эсэх нь эргэлзээтэй, экспортолж байгаа эсэх нь ч тодорхойгүй байна. Цогцос хадгалдаг бодисоор амталсан махаа экспортолдог, зах зээлд нийлүүлдэг, Монголын ард түмний иддэг махыг хортой  бодис хольж хутгаад, хор болгоод зарж байна л гэнэ. Үгүй ээ, цогцос хадгалдаг бодис биш, цардуулсан байсан юм байна л гэнэ. Найман тонн махыг өмхийрсөн байна гээд лацдаад явлаа. Маргааш өглөө нь МХЕГ-ынхан нь очоод лацыг нь хөндөөд, махны дээжээс аваад чанаж идлээ л гэнэ. Тэгээд “Өмхийрөөгүй юм байна” гэсэн дүгнэлт гаргалаа л гэнэ. Ингэж, тэгж явсаар өнөөх махных нь эзэн олдохоо больчихлоо. Баривчлаад аваад явсан хоёр хятад нь ч махны эзэн нь биш болж таарав.

МХЕГ-ын дарга Б.Баасандорж “Мэргэжлийн хяналтын ерөнхий газар тавдугаар сарын 18-наас улсын хэмжээнд махны чиглэлээр үйл ажиллагаа явуулж байгаа компаниуд болон гадагшаа мах экспортолдог компани болон эмээлтэд мах бэлтгэдэг 32 компани дээр хяналт шалгалт хийж байгаа. “Эм Ди Си Пи” ХХК дээр зөрчлийн болон эрүүгийн хэрэг үүсгэсэн. Эрүүгийн хэрэг нь ХКҮ компани 234 тонн орчим мах буюу үнэлбэл 1.6 тэрбум төгрөгийн махыг манай мах биш манай хаяг шошго, нэр усыг хууль бусаар ашигласан байна гэдэг гомдлыг СХД-ийн цагдаад өгсөн. Энэ асуудалд эзэн холбогдогч олдохгүй байгаа. МХЕГ-ын байцаагчид ажиллаад энэ зөрчлөөр нь мөн цагдаагийн газарт өгсөн байна. Байцаагч, иргэд асуудал гарсан бол лабораторийн шинжилгээний дүн гарсны дараа махыг хэрэглэх үү, хэрэглэхгүй байх уу гэдгийг шийдэх ёстой. Гэтэл мах чанаж идсэн нь их эрсдэлтэй алхам болсон. Мэргэжлийн хяналтын байгууллагаас  прокурор дээр хэрэг үүсэн учраас тогтоолын дагуу прокурорын хяналтын дор лац тавьсан.  Лацыг прокурорын зөвшөөрөлгүй мэргэжлийн хяналтын байцаагч, цагдаагийн байгуулга, иргэний аль нь ч лацыг хөндөж, гэмтээж, авч болохгүй. Энэ нь зөрчлийн асуудал болно” гэв. Сенсацыг сенсацаар дарна гэдэг технологи бүрэн эрхээрээ л хэрэгжиж байна. Ямартай ч лацтай махыг эзэн нь байхгүйд чанаж идсэн Мэргэжлийн хяналтынханд 1.6 тэрбум төгрөгийн мах, үйлдвэр үлджээ. Махны үйлдвэрийн эзэн манайханд найдаад, эд хөрөнгөө үлдээгээд алга болчихсон бололтой. Тийм л юм ярьлаа, Б.Баасандорж дарга.

        Юм юм руу боргож, ульж суудаг нас харьчихсан, шүдгүй банхар шиг болж дээ, Монголын төр. Монголын төрийн хайгаад олохгүй байгаа эзэнгүй эд зүйлс, зээл авсан баримт нь байгаа хэрнэ зээл авсан хүн нь олддоггүй, ачсан нүүрс нь байгаа мөртлөө нүүрсний эзэн нь байдаггүй, хүүр хадгалдаг бодист хутгасан, өнхрүүлсэн, холион бантанд нь мөлхүүлсэн мах нь байгаа хэрнээ мөн л эзэн нь олдоггүй махны үйлдвэрийг отож суугаад ч болов эзнийг олж өгөх ажилтай боллоо, хэдүүлээ. Угтаа мэдэгдэл хийгээд, эзнийг нь хайгаад байна хэмээн уйлан дуугараад байгаа дарга нар л тус компанийн эзэнд зөвшөөрөл, зээлээ өгсөн биш бил үү. Мартчихдаг л юм байх даа. Яг нөгөө сая ам.доллароо дансандаа мартдаг эрхэм шиг төрийн ажил мөн ч халуунаар, бүтэл муутайхан үргэлжилж, ухарч байна даа.