• Өнөөдөр 2022-09-29

ЭРХ МЭДЭЛД ХҮРЭЭГҮЙ СЭН БОЛ ТЭД ЭХ ОРНЫХОО ТӨЛӨӨ ИХ ЮМ ХИЙХ БАЙЛАА

2022-03-21,   432

-ГЭТЭЛ ОДОО ӨӨРСӨД ШИГ НЬ ТЭМЦЭХИЙГ, ӨӨТЭЙ БҮХНИЙГ ИЛЧЛЭХИЙГ ОГТ ЗӨВШӨӨРӨХГҮЙ БАЙГАА НЬ СОНИН-

Хэрвээ тэд улс төрийн эрх мэдэл нь одоогийнхоос нь жаахан л дутуу байсан бол, хүссэн албан тушаалдаа хүрч чадаагүй байсан бол Улаанбаатар Дарханыг холбосон засмал замыг өнөөг хүртэл ашиглалтад оруулаагүйнх нь төлөө Засгийн газрыг огцрохыг шаардаж, Ерөнхийлөгч, Ерөнхий сайд, Зам тээврийн сайдынхаа зургийг лоозонгийн самбарт “матарлаж”, бариад жагсаж зогсож байгаад ашиглалтад оруулж байх байлаа.

             Монголын залуучуудын холбооны нэр бүхий залуусын архи асгаж, архинаас гарахыг уриалж зогссон дүр зургийг улам тодотгон, Залуучуудын холбооноос улбаатай УИХ-ын гишүүд, улстөрчдийн улс төрийн зам мөр, улсаас идсэн уусан баримтыг улайтал нь дэлгэж, улсынхаа залуусыг төлөөлж суугаа холбоог бүрэн бүрэлдэхүүнээр нь хөөж явуулаад, МЗХ-г “цэвэрлэх” байлаа.

             Байгуулагдсан цагаасаа хойш бүтэлгүй зээл олгосон Хөгжлийн банкны асуудлаар Ч.Хүрэлбаатараас эхлээд МАН-ын эрх мэдэл, нөлөө бүхий томчуудыг УИХ-ын гишүүнээс нь эгүүлэн татуулж, улс төрийн тавцангаас тэр чигт нь зайлуулж, шүүхийн шийдвэрээр шоронд суулгах хүртэл нь тэмцэх байлаа.

Коронавирусийн халдвараар нас барагсдын шалтгааныг дарааллуулж байгаад Эрүүл мэндийн сайдыг салбарынхантай нь хариуцлагажуулах, хамаа замбараагүй төсөвтэй төсөл, хөтөлбөрүүдийг нь хазаарлах байлаа.

             Сурагчаа зодсон багшийн жишээгээр сурах орчин, сургалтын чанар, баахан бичлэг цацаж байгаад ч хамаагүй багш нарын харилцааг ил гаргаж, Боловсролын сайдыг фэйсбүүк хуудаст элдэв юм бичих бус бодитой арга хэмжээ авахуулж, болохгүй бол огцруулах байлаа.

Бусдын толгой дээр кофе асгасан оюутныг илчилсэн төрийн цагдаагийн үнэн төрхийг түмний өмнө нүцгэлж гаргаад, “Иргэнтэй ингэж харилцахгүй ээ” гээд ижил тэнцүү яллахыг шаардаж байх байлаа.

             “Шатахуун, барилгын материал ер нь юм бүхний үнэ цаашид ч нэмэгдэнэ” хэмээн иргэддээ томорч зогссон сайдыг ингэж хэлсэн өдөртөө огцортол, тэр сайдын уршгаар бүх сайдаа чирээд Ерөнхий сайд нь “Бид хариуцлагатай байж чадаагүйнхээ төлөө бүрэн бүрэлдэхүүнээрээ огцорч байна” гэж хэлтэл нь эсэргүүцэх, эгдүүцэх байлаа.

            АН-ын байрны аль нэг давхарт ажиллаж асан албатууд бусдын хаягийг хакерддаг нь, бүр тэгээд сонгуулийн дүнд нөлөөлснийг нь шүүхээр хэлэлцэх хүртлээ хуулийнхан баримтаар тогтоосон бол өлсгөлөн зарлаж, нэгнээ үхүүлж байгаад ч хамаагүй шударга бус сонгууль, эрх баригчдыг байранд нь тавьтлаа тэд салам тэмцэх байлаа.

Байлаа, байлаа, байлаа... Тийм ээ, улс төрд өдгөө гол тоглочид болоод байгаа эрхмүүд өнөөгийн өндөр албан тушаалууддаа томилогдоогүй байсан бол энэ мэт шударга бус олон сэдвийг хөндөж, зогсчихоод байгаа төслүүдийн үнэн царайг дэлгэж, хариуцлага нэхэж, төв талбайд жагсаж, бүр өлсгөлөн зарлаж, шүлэг, найргаар нэмэрлэж байгаад ч хамаагүй “Ядарсан ардынхаа эрх ашгийг нь хамгаалдаг хүмүүс байдаг юм шүү” гэдгээ харуулж, ард түмний дэмжлэгийг чинээнд нь тултал авч, хамтдаа үр дүн нэхээд, олон ажлыг яралзтал бүтээх байсан юм.

             Гэвч тэдэнд одоо тэгэх шаардлага байхгүй. Тэр цагт тэмцэгч "дүр эсгэн" байж санаархаж асан албан тушаалууддаа бүгд очжээ. Хүссэнээ авчээ, хүрье гэсэндээ хүрчээ. Одоо тэдэнд УИХ-ын гишүүдийн тоог 99 болгох, Ерөнхийлөгчийг ард түмэн бус танхим нь “томилох”, “Шинэ сэргэлтийн бодлого”-ыг хэрэгжүүлэхэд шаардлагатай төсвийг бүрдүүлж л байвал казино байгуулах, байгалийн баялагтай газар нутгаа “боловсон” аргаар ухуулах, АН-ыг шинэ даргатай болгож байгаа мэтээр харьяандаа бүр мөсөн оруулах, Хөгжлийн банкны найдваргүй зээлдэгчдийн “шүүсийг нь шахаж” байгаа нэрээр намдаа, ах нартаа хандив, өргөл барьц үг дуугүй баригчдын тоо, хүрээг нэмэх гээд улс төрийн “булчин суух”-даа л анхаарах нь юу юунаас чухал байна.

Өлсгөлөн зарлаж, нэгнээ үхүүлж байгаад ч хамаагүй шударга бус сонгууль, эрх баригчдыг байранд нь тавьтлаа тэд салам тэмцэх байлаа

             Улс төрийн бүлэглэлүүдийг “бөлдөгдөх”, ах нарынхаа аашийг нам “дарах” гээд ахуйн хүрээний аар саархан ажлаа өмнөх хоёр жилд тасралтгүй хийсээр одоо л өөрсдийгөө улс төрийн тавцанд “бялдаржуулах” ажилдаа орох гэж байна. Өөрөөр хэлбэл, “Сүүнд түлэгдсэн хүн өрөм үлээдэг” гэдэг шиг бүх замаа маш сайтар цэвэрлэж, эсэргүүцэх нэг ч хүнгүй болгож аваад бүгд бөхийн ёсолж, хүлээн зөвшөөрч байгаагаар алга ташуулж, тайзан дээр гол дүр байхыг тэд хүсэж ирсэн. Үүний тулд л тэд өмнө нь цөөнгүй удаа жагсаж, ах нарынхаа булхай луйврыг илчилж, ард түмнээ дөнгөнөөс салгаж, жаргаахын төлөө амь биеэ үл хайрлан зүтгэгчдийн дүрд тоглож ирсэн гэмээр. Хэрвээ үгүй сэн бол өдийд тэд тэр цагт ч монголчуудын шүдний өвчин байсан нэн тэргүүний асуудлуудыг жагсаж байсан үеийнхээ хурдаар шийдвэрлээд явчих байсан биз ээ. Өөрөөр хэлбэл, өнөөгийн улс төрийн тоглогчид одоогийн албан тушаалууддаа очоогүй байсан бол үүндээ хүрэхийн төлөө улс, эх орондоо их юм хийх байжээ. Ард түмэнд хэрэгтэй, аятай таатай гэсэн бүхнийг хөндөн гаргаж, хөгжүүлэх, хөрөнгийг нь шийдүүлэхийн төлөө зүтгэх, жагсах, тэмцэх байжээ л гэсэн санаа...

Үнэндээ бүгд бөхийн ёсолж, хүлээн зөвшөөрч байгаагаар алга ташуулж, тайзан дээр гол дүр байхыг л тэд хүсэж ирсэн.

             Одоо бол тэд өөрсөд шиг нь үнэний төлөө жагсаж тэмцэх, өөтэй зүйлсийг ил гаргах, буруутныг илчлэх, бүлэглэл болж тендер завшигчдыг баримтаар дэлгэхийг хэнд ч зөвшөөрөхгүй байна. Хэнийг илчлэх, юуг зарлах, ямар баримтыг аль хэсгээс нь дэлгэхээ өөрсдөө найруулж, өөрсдийнхөөрөө “дэглэх”-ийг бүх шатанд даалгавар болгосон уу гэмээр өрөвдмөөр өдөр хоногууд үргэлжилж байна. Гэхдээ улс орон хөгжихгүй, эдийн засаг сайжрахгүй, эрүүл мэндийн үйлчилгээ улам дордож, цахим монголчууд иргэний үнэмлэхээ хувилуулахад дугаарлаж, цалин нэмэгдэхгүй мөртлөө үнэ өсөж байгаад цаашлаад бүр Дарханы зам “царцсанд” өндөр дээд албан тушаал, эрх мэдэл л буруутай...

Өнөөгийн улс төрийн тоглогчид одоогийн албан тушаалууддаа очоогүй байсан бол үүндээ хүрэхийн төлөө ард түмэнд хэрэгтэй, аятай таатай гэсэн бүхнийг хөндөн гаргаж, хөгжүүлэх, хөрөнгийг нь шийдүүлэхийн төлөө зүтгэх, жагсах, тэмцэх байжээ л гэсэн санаа

 


ЭРХ МЭДЭЛД ХҮРЭЭГҮЙ СЭН БОЛ ТЭД ЭХ ОРНЫХОО ТӨЛӨӨ ИХ ЮМ ХИЙХ БАЙЛАА
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1
  • Сэтгэгдэл үлдээсэн: 2022-03-30 23:50:42
    тхх: эднийг дарга болгож давраах хэрэггүй байсан нь үнэн шүү. дарга болоо л бүхнийг улан дороо хийгээд, мартсан даа
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188