-ГОМДОЛ ДЭЭР НЬ ДӨРӨӨЛЖ, "ӨЛГИЙДӨЖ" АВААД МАН-ЫН ОДООГИЙН УДИРДЛАГУУДЫН ЭСРЭГ БОЙЖУУЛАХ САНААРХАЛ М.ЭНХБОЛД, СҮ.БАТБОЛД, С.БАЯР, Н.НОМТОЙБАЯР, СУ.БАТБОЛД, Ө.ЭНХТҮВШИН, Ц.МӨНХ-ОРГИЛ, Ч.УЛААН, Д.ТЭРБИШДАГВА, О.ЧУЛУУНБААТАР, ТЭР Ч БҮҮ ХЭЛ Н.ЭНХБАЯР, Э.БАТ-ҮҮЛ ТЭРГҮҮТЭЙ ЛУУХАГАРУУДАД ТӨРЖ Л ТААРНА-

         Хөгжлийн банкны зээлийн хуудуутай, хуудуугүй зээлдэгчдийг олон нийтэд ил тод мэдээллэснээрээ МАН-ын өнөөгийн удирдлагууд өөрсдөдөө мөн ч олон дайсан бэлдлээ дээ. Улс орны бүтээн байгуулалт, элдэв хөрөнгө оруулалт, ийм тийм худалдаа наймаа, үйлдвэр, техник хэрэгсэл гээд аль эрхэлж болох бүхнээр оролдоод, ашиг хүртээд, шатаад, дахин өндийгөөд үзчихсэн бизнес эрхлэгчид, улстөрчид бүр тодруулбал, намынхаа гол санхүүжүүлэгчдийг тэр аяар нь нийгэмд “Хулгайч, луйварчид, зальтнууд” гээд зарлачихлаа шүү дээ.

        МАН-ыг улс төрийн тавцанд том байлгахад тодорхой үүрэг хүлээсэн хүмүүс учраас тэд өмнөх Засгийн газраас тэгж их хэмжээгээр бага хүүтэй зээл авсан нь захын хэнд ч тодорхой зүйл. МАН өөрсдөдөө туслаагүй, сонгуулийн санхүүжилтэд нь ахиу нэмэр хандивлаагүй нэгэнд Хөгжлийн банкны байтугай ипотекийн зээл ч гаргадаггүйг монголчууд гадарлана. Өөрөөр хэлбэл, МАН-ын өмнөх удирдлагын аппаратын үнэнч хамтрагчид, санхүүжүүлэгчид учраас тэд ийн “бялуу” хуваалцаж, эрхээ эдэлсэн гэсэн үг. Бас тэдний санхүүжилтийн ачаар МАН сүүлийн сонгуулиудад олонх болсон гэвэл үнэнээс хол зөрөхгүй л болов уу. Эндээс хөөвөл нэрээ зарлуулж, хулгайчаараа цоллуулсан МАН-ын гишүүд одоогийн МАН-ын удирдлагууддаа олигтой юм хялайлгаагүйгээр зогсохгүй энэ хэдийгээ тэр цагийн цүнх баригчаар нь тооцон тоомжиргүй хандсан байж болзошгүй. Эх сурвалжийн мэдээлж буйгаар “Шинэ сэргэлтийн бодлого”-ыг хэрэгжүүлэхэд шаардлагатай 120 их наяд төгрөг бүрдүүлэхэд зарим нь гар бие оролцохгүй гэдийсэн учраас нэрээ хар дансанд бүртгүүлсэн гэх. Мөн МАН-ын удирдлагууд нэгэнт өөрсдөдөө хань болохгүй, өмнөх ах нарынхаа хөрөнгө оруулагчдаар туг тахин шинэ үеийнхнийг идэвхжүүлэх, илүү хандив өргөхөд нь ташуур, сүрдүүлэг болгож буй хэрэг гэх нь ч байна. Энэ утгаараа МАН-ын данс дундарсаар ирэх сонгуультай золгох талтай.

      Монголчуудын хувьд аль нь ч байсан “Монголын Засгийн газар ийм маягаар боломжийг хуваадаг юм байна, түүнийг нь илчилж болдог юм байна” гэдгийг ойлгож, итгэл үнэмшил төрж буй нь гол олз юм. Харин МАН-ын хувьд хөрөнгө чинээтэй, нас, туршлагаараа одоогийн хүрээлэгчдээс нь арай дөнгүүр хүмүүсээ үргээж, хөөсөөр Л.Оюун-Эрдэнэ, Д.Амарбаясгалан, Х.Нямбаатар нарт гомдогсдын арми “Элсний 13” шиг чимээгүйхэн бүрэлдэж мэдэхээр болчихлоо. Эдэнд гомдох нь яах вэ, гол нь намынхаа төлөө олон арван жил үнэнчээр зүтгэсэн мөртлөө ийн гадуурхагдсан гомдогсод нэгдвэл нэлээд хүчтэй сөрөг хүчин болж мэдэхээр. Тодруулбал, “Капитал”-ын Б.Ундармаа, 33 тэрбумын Г.Амартүвшин, Баянхонгорын М.Билэгт, С.Бямбацогт, Х.Ганхуяг, Х.Дамдинням, А.Сүхбат, Ш.Лхамсүрэн, Ш.Үнэнбат, ялласан дээрээ дахин “банзадсан” хөшөө Г.Батзориг, Д.Дамба-Очир, Д.Хаянхярваа, Г.Солтан, У.Хүрэлсүхийг “топор муужгай” гэснийхээ шанг хүртсэн Н.Номтойбаяр гэх мэтээр ердөө дөрөвхөн жилийн өмнө МАН-ын нүүр царай, томчуудын эгнээнд жагсаж асан гомдогсдын цуваа тасрахгүй ч байж мэднэ. Эднийг гомдол дээр нь дөрөөлж, "өлгийдөж" аваад МАН-ын одоогийн удирдлагуудын эсрэг бойжуулах санаархал Миеэгомбын Энхболд, Сү.Батболд, Санжийн баяр, Нямтайширын Номтойбаяр, Су.Батболд, Ө.Энхтүвшин, Ц.Мөнх-Оргил, Ч.Улаан, Д.Тэрбишдагва, О.Чулуунбаатар тэр ч бүү хэл Н.Энхбаяр, Эрдэнийн Бат-Үүл тэргүүтэй луухагаруудад төрж л таарна. Нам байгуулаад, ирэх сонгуульд жин дараад ороод ирэхийг ч үгүйсгэх аргагүй.

      Улстөрчдийн араншин угаасаа гомдож, улайрахаараа чөтгөртэй нөхөцсөн ч хамаагүй болчихдог. Үүний хамгийн ойрын жишээ бол өнгөрсөн УИХ-ын сонгуулиар АН-ын гишүүдийнхээ намдаа өгсөн хандивын босгыг олон нийтэд хэвлэлийн хурал зохион байгуулж, зарлан байж эрт үеэс үзэл бодол, үнэт зүйл огт нийлж байгаагүй гэж ирсэн эсрэг намдаа элсэж, нэр дэвшиж, өдгөө УИХ-д суугаа Х.Ганхуяг билээ. Тэгэхээр нэгэн цагт МАН-д “Өгье гэвэл ганцаасаа” хэмээн харамгүй хандивлаж явсан ч өдгөө элдэвлүүлснийхээ хариуг авахын төлөө МАН-д гомдогсод нэгдэж ч мэдэхээр байна. Нэгдвэл дийлдэхээргүй арми болж ч мэдэх нь. Аливаа зүйл хөгжлийн дээд цэгтээ хүрэхээр нурдаг, бутардаг жамтай. Ер нь ч  гомдогсдодоо мад тавиулж ирсэн түүх энэ намын уналтуудын дадсан туршлага билээ.

МАН өөрсдөдөө туслаагүй, сонгуулийн санхүүжилтэд нь ахиу нэмэр хандивлаагүй нэгэнд Хөгжлийн банкны байтугай ипотекийн зээл ч гаргадаггүйг монголчууд гадарлана

           МАН-ын удирдлагууд “Намаа авлигач, албан тушаалын гэмт хэрэгтнүүдээс салгаж, цэвэрлэнэ, хөөнө” гэх улс төрийн намуудын үеийн үед ярьсаар ирсэн хуучин амлалтыг цоо шинэ мэт дахин дахин тунхаглаж байгаа нь зөв ч үр дүн хэрхэхийг таашгүй. Жишээ нь, МАН-ын Хяналтын ерөнхий хороо саяхан хуралдахдаа Ц.Анандбазар, Ё.Отгонбаяр тэргүүтэй ёс зүйгүй гишүүддээ хариуцлага тооцчихсон бол олон нийтийн үнэмшил, МАН-ын одоогийн удирдлагуудад итгэх итгэл суга өсөх байлаа. Гэвч тэд өмнө нь шүүхээр болоод намаасаа ялласан байсан гишүүдээ дахин “яллаж”, Хөгжлийн банкны "галыг унтраасан" нь олон нийтийг гайхашруулсан гэхэд хилсдэхгүй.   

         Энэ удаагийн найдваргүй зээлдэгчдийн нэрийг зарласан явдал бол дөнгөж эхлэл бөгөөд Хөгжлийн банкны хариуцлагагүй зээлдэгчдээс буцаан төвлөрүүлэх мөнгийг Л.Оюун-Эрдэнийн Засгийн газар хэрхэн зүй зохистой зарцуулахаас бүх зүйл шалтгаална. Бараг Л.Оюун-Эрдэнэ гэж хэн бэ гэдэг нь тодорхой болно. Хэрвээ өмнөхийн адил өөрсдийнхөө үеийн санхүүжүүлэгчдэд өнгө ялгаагүй хуваагаад зээлчихвэл, бусдад бус, тэдэндээ боломж болгочихвол ийн сүржигнэснийх нь хариу ердөө л хусмаа чамласан хүүхдүүд болно гэдгээ мэдэж байгаа гэж найдъя. Дээр нь дэмий баахан дайсан бэлдсэн, гомдогсод, бухимдагсдыг намынхаа эсрэг “цэнэглэсэн” сүржин зарлалт болж л үлдэнэ, Хөгжлийн банкны асуудал...

МАН-ын Хяналтын ерөнхий хороо саяхан хуралдахдаа Ц.Анандбазар, Ё.Отгонбаяр тэргүүтэй ёс зүйгүй гишүүддээ хариуцлага тооцчихсон бол олон нийтийн үнэмшил, МАН-ын одоогийн удирдлагуудад итгэх итгэл суга өсөх байлаа