-ОМИКРОН, КОВИДЫН ХАЛДВАР МОНГОЛЫН ГУРАВХАН САЯ ХҮН АМЫГ БҮРЭН “ЭЗЭЛЖ” БАЙХ ХООРОНД МОНГОЛЫН УЛС ТӨРД ИЙМЭРХҮҮ Л ҮЙЛ ЯВДАЛ ӨРНӨЖ БАЙНА ДАА-

          Намрын чуулган гавьсан юмгүй өндөрлөж, Засгийн газрын бүтэц хийгээд зарим сайдын халаа сэлгээ хойшилж, үүнийг дагаад улс төрийн попууд нам жим болсон уйтгартайдуу өдрүүд өнгөрч буй. Гэхдээ өчигдөр бол дуулиан, шуугиан тасарсангүй.

         Үдээс өмнө Монгол Улсын Ерөнхий сайд Л.Оюун-Эрдэнэ хэсэг нөхдийн хамт Оюу толгойд очиж, гүний уурхайн анхны тэсэлгээг хийж, 34 хувийн өрийг тэглэснээ зарлан улс даяар “Тэр түүхэн үүргээ гүйцэтгэж чадлаа” хэмээн алга ташуулсан. Л.Оюун-Эрдэнэ Ерөнхий сайд байж таарсан он цагт энэ үйл явдал өрнөсөн л болохоос биш, түүний оронд хэн ч байсан энэ үйл явдал болох нь тодорхой байсан билээ. Нөгөөтэйгүүр тэр болон түүний баг чадлаа, чадлаа. Оюу толгойгоос орж ирэх хөрөнгө оруулалтыг Шинэ сэргэлтийн бодлого руугаа “цутгачихгүй” л бол, энэ албан тушаалаа бэхжүүлэхэд ашиглачихгүй л бол ямар ч байсан эдийн засгийн нэг хөшүүрэг хөдөлж эхэллээ. Ерөнхий сайдыг ийн гадна, дотнын хамтрагчдаасаа сайшаал, магтаалд умбаж байх зуурт Ерөнхийлөгч МҮБХ-ны удирдлагууд буюу бөхөд хайртай монгол түмний бахархал болсон хэдэн бөхийг өмнөө суулгаад “загнаж” байлаа.

Оюу толгойгоос орж ирэх хөрөнгө оруулалтыг Шинэ сэргэлтийн бодлого руугаа “цутгачихгүй” л бол, энэ албан тушаалаа бэхжүүлэхдээ хэтэрхий ашиглачихгүй л бол ямар ч байсан эдийн засгийн нэг хөшүүрэг хөдөлж эхэллээ

       Өөрөөр хэлбэл, өчигдрийн үдээс хойш Монголын “гал тогоо”-нд өрнөсөн нэгэн чухал хийгээд сонин үйл явдал нь Ерөнхийлөгч У.Хүрэлсүх бөхчүүдээ өмнөө бүлтэлзүүлж байгаад “Олны өмнө хэл амгүйхэн барилдахгүй юм бол өгсөн цол, хэргэмээ буцаагаад авчихаж бас чадна шүү” хэмээн загнаж суулаа. Олон үзэгч, олон хүн “Омикрон нийтийн дунд ханиад хэлбэрээр тахал болж, бараа, бүтээгдэхүүний үнэ тэнгэрт хадаж, эмч, сувилагчид сөхөрч унахын наагуур гүрийж, хил хаалттайгаас ажилгүйдэл, ядуурал гаарч буй энэ үед улсын Ерөнхийлөгч маань арай ч бөхчүүдтэй уулзаагүй байлгүй дээ. Эдийг засагчид, бизнесмэнүүд, үйлдвэрлэгчид, төрийн өмчит компаниудын удирдлагууд, адаглаад эмч нарын төлөөлөлтэй уулзаж байгаа байх” хэмээн горьдсоноо олон нийтийн сүлжээгээр илэрхийлж байлаа. Гэвч Ерөнхийлөгч маань үнэхээр ОХУ-д хийсэн айлчлалаас хойш олны өмнө ийн гарч ирэхдээ бөхчүүдтэй уулзаж байгаагаа дүрсжүүлэн цацаж, нийтэд нь “Олигтой байхгүй бол байранд чинь тавина шүү” хэмээн “загнаж” орхилоо. Үүний дараа Ерөнхийлөгчийг “Допингийн асуудалтай, дандаа хэрүүлтэй, найрааны өртөг нь хэдэн зуун саяар яригддаг болсон хөлс үнэртүүлсэн бөхчүүдтэй уулзахаас өөр хийх ажил, уулзах хүн Ерөнхийлөгчид алга гэж үү” гэх шүүмж сошиалаар түгэж, олон нийт ч нэлээд бухимдсан. Гэхдээ үүнийг мартуулсан өөр нэг сонирхолтой бөгөөд эмгэнэлтэй явдал монголчуудыг мөн л гайхашрууллаа, өчигдөр.

Ерөнхийлөгч ОХУ-д хийсэн айлчлалаас хойш олны өмнө ийн гарч ирэхдээ бөхчүүдтэй уулзаж, нийтээр нь “Олигтой байхгүй бол байранд чинь тавина шүү” хэмээн “загналаа” орхилоо

       Тодруулбал, БСШУ-ы сайд асан, УИХ-ын гишүүн асан, АНУ-д Монголыг төлөөлж суусан Элчин сайд асан Ё.Отгонбаяр сэтгүүлчдийг “Ална” хэмээн заналхийлсэн нь олонд ил болов. Бүр тодруулбал, Хөгжлийн банкнаас түүний эхнэр 17.7 тэрбум төгрөгийн зээл авснаа буцаан төлөөгүйг баримтаар дэлгэсэн сэтгүүлч рүү “Та хоёроос болж амьдрал салж байна. Чамайг олж ална. Миний амьдралыг алж байгаа бол хариугаа авна. Заригтай чинь хамт ална. Үнэн хорсож байна. Нэгэнт та нар ингэж байгаа бол алалцана” хэмээн заналхийлсэн мессэж илгээсэн нь ил болсон юм. Энэ бол улс төрийн хүрээний болоод бизнеийн салбарынхны хууль бус, дүрэм журамд захирагддаггүй худал хуурмагийг баримтаар ил болгосон сэтгүүлчдийг улстөрчид, нөлөө бүхий хүмүүс хэрхэн дарамталдаг, хэвлэлийн эрх чөлөөг боомилж, нухчин дарахыг байнга оролдож байдгийн ердөө ганцхан жишээ билээ. Сэтгүүлчийн амь насанд нь халдана хэмээн заналхийлсэн дээрх мессэжийн мөрөөр МСНЭ тэргүүтэй байгууллагууд хэвлэл мэдээллийн хэрэгсэл, сэтгүүлчээ өмгөөлөхөө мэдэгдсэн мэдэгдэл гаргаж, Ё.Отгонбаярыг Ерөнхий сайдын зөвлөхийн ажлаа хүлээлгэн өгөхийг шаардсан акц сошиал орчинд хүчтэй давалгаа болж байна. 

     Омикрон, ковидын халдвар Монголын гуравхан сая хүн амыг бүрэн “эзэлж” байх хооронд Монголын улс төрд иймэрхүү л үйл явдал өрнөж байна даа.

 БСШУ-ы сайд асан, УИХ-ын гишүүн асан, АНУ-д Монголыг төлөөлж суусан Элчин сайд асан Ё.Отгонбаяр сэтгүүлчдийг “Ална” хэмээн заналхийлсэн нь олонд ил болов