Л.Оюун-Эрдэнийн Засгийн газар огцрох, огцрохгүйн дээсэн дөрөөн дээр дэнжгэнэж явсаар жилийн ой дээрээ ирлээ. Хэнтийн ахынхаа халааг авсан цагаас нь л “Түр Засгийн газар” гэх тодорхойлолт түүнийг сүүдэр шиг дагасаар жил болох нь гэсэн үг. Эхэндээ “Л.Оюун-Эрдэнийн Засгийн газар тун удахгүй танхимаараа огцрох гэнэ лээ” гэлцдэг байлаа. Төд удалгүй “Таван сайдаа сугалж огцруулах гэнэ лээ” гэх болсон. Сүүлд нь “Үндсэн хуулийг өөрчлөх замаар УИХ-аас танхимаа нараа бүрдүүлж, цөмийг нь давхар дээлтэй болгоод цааш явах болсон гэнэ” гэлцэж эхэлсэн. Гэвч бүтэн жилийн хугацаа өнгөрөхөд аль аль шийдэл, таамаг нь биелсэнгүй, ажиг сураггүй байсаар л. Ерөнхий сайд Л.Оюун-Эрдэнийн гол алдаа энэ. “Өөх ч биш, булчирхай ч биш” гэдэгтэй утга адилаар огцрох, огцрохгүйгээ нэг мөр зарлаад, нийгэмд үүсээд буй хүлээлт, таамгийг эцэслэхгүй байгаа нь түүний алдаа. Энэ Засгийн газар орших, эс оршихоо эцэслэхгүйгээр, энэ л янзаараа таавар таалгасан хэвээр байвал цааш явах зам үлдсэнгүй. Ингэж хэлэхийн учир нь, “Удахгүй огцрох юм гэнэ лээ” гэдэг яриа нь эцэстээ энэ Засгийн газрын хандлагыг “Буцах бэрд үнээ тугал нийлэх хамаагүй” гэж харагдуулаад байгаа юм. 

         Гэтэл төрийн шат шатандаа “Засаг удахгүй огцорно” гэх хүлээлттэй, огцрохыг нь отсон горьлогчидтой байгаад байдаг. Юу гэхээр, яг үнэндээ улс төр ч, бизнес ч “Засаг огцрох эсэхээс хамаараад” гэдэг байдлаар гацаанд орчихлоо. Огцорч болзошгүй сайдууд, оронд нь томилогдож магадгүй нөхдүүдийн хэн хэн нь хаа хаанаа хувцсаа баглачихаад хүлээж байгаа нөхцөлд Засгийн газраас дорвитой шийдэл гарахгүй, төрийн ажил урагшлахгүй л дээ. Энэ Засгийн газрын зарим сайд “Өнөө маргаашгүй явахын хооронд өөртөө төвөг удах хэрэг юу байна” гэх маягийн хандлага гаргаж, салбараа сул хаячихаад байгаа нь бодит үнэн. Нэмээд Засгийн газар огцорчихвол яам, агентлагаасаа эхлээд томилгоо явагдана, тэр үед хэнийг бараадаж, хаана хурган дарга болохоо тоочиглосон нөхдүүд хаа сайгүй байна. Төрийн ажил түгжирч гацаад, улсын ажил урагшлахгүй зогсоод байгаа гол шалтгаан ердөө л энэ. 

Ард түмний ахуйтай нийцэх энэ шаардлагад тэнцэхгүй буюу “холгодог гутал” шиг хэд хэдэн сайд энэ Засгийн газарт бий. Өөрөөр бол, хол замд Л.Оюун-Эрдэнэд ч, ард түмэнд ч “хань” болохгүй, Засгаас “хаягдаж” хоцрох ёстой сайдууд гэсэн үг л дээ. 

 

Тухайлбал, Улаанбаатарын утаа угаар нэмэгдсэн шалтгааныг ухаж ойлгож чадахгүй, бүр хүсэхгүй байгаа Н.Уртнасан сайд байна. “Саарал утаа нэмэгдсэн шалтгаан бол сайжруулсан түлш хямд байгаагийнх” гэж улайм цайм яриад суугаа хүн утаатай, угаартай тэмцэх үү, чадах уу. Улаанбаатар хотын иргэдийн уушги утаагаар дүүрч, угаартаж үхэх гэж байхад “Үнэгүй юманд нугасгүйгээсээ болоод л үхэж байгаа юм” гэх утгатай тайлбар хийгээд сууж байх нь салбарын сайдаас гарах үг мөн юм уу. Утааны асуудлаар Н.Уртнасан сайдтай адил “увайгүй” тайлбар хэлээд сууж байгаа Н.Тавинбэх гэж сайд байна. “Сайжруулсан түлшний чанарт асуудал алга, хэрэглээ нэмэгдсэн нь л асуудал болоод байна” гэх тайлбар нь Эрчим хүчний сайдаас гарах үг лав биш. Ухаандаа утаа нэмэгдсэний гол буруутнууд нь Улаанбаатар хотын гэр хорооллын иргэд юм байна л даа. Гэхдээ сайд нарын “Хэрэглээ нэмэгдсэнээс болж утаа ихэссэн” гэдэг тайлбарыг Улаанбаатарчууд ухаж ойлгож чадахгүй л байгаа юм. Бодоод үзье л дээ, таван ханатай гэр нь тэвчиж суухын аргагүй халуун болчихоод байхад “Хямд юм чинь” гээд нүүрс галдаа нэмээд байх айл байх уу. Хямд гэдэг шалтгаанаар хоёр дахин их гал түлдэг болсон байлаа гэж бодоход нэг шуудайг түлэхэд утаа гардаггүй, хоёр шуудайг түлэхээр утаа гараад байдаг хэрэг үү. Тээврийн хэдэн жолоочоо халдвараас хамгаалж чадахгүй байсаар “улаан бүс” болгоод эцэст нь хориг тавиулж, хилийн цаана хамаг ачаагаа гацаачихсан Л.Халтар гэж сайд байна. Энэ улс Эрээн хотын захирагчийг царайчилж, “Хилээ нээгээд өгөөч” гэж хойно урд нь гарч гүйх болсны гол буруутан нь Л.Халтар гэчихэд харлуулсан болохгүй биз. Бас хөрш хоёр гүрэнтэйгээ хэл амаа ололцож чадахгүй атлаа гадаадад томилтоор "зугаалж" явдаг "ганган" Б.Батцэцэг гэж сайд байна. Хуучин цагт, Ерөнхий сайд нь ч, Гадаад харилцааны сайд нь ч хоёр хөрш рүүгээ давхиж очоод, хил гаалийн асуудлаа тэр даруйд нь шийдчихдэг байлаа. Гэтэл одоо яаж байна, урд хөрш хаалгаа хаагаад хэдэн сар болоход Б.Батцэцэг сайдын амнаас "хил нээх"-тэй холбоотой үг унав уу. 

 

Ингээд харвал, нэн тэргүүнд Ерөнхий сайд Л.Оюун-Эрдэнэ огцрох, огцрохгүйгээ, орших, эс оршихоо нэг мөр шийдээд, төр улсыг удирдах гол ажилдаа ормоор байна. Ингэхдээ салбараа мэдэхгүй сайд нараасаа салж, оронд нь олигтой нөхдийг томилоод цааш явмаар байна.