-САЙД НАРЫГ СОЛИНО, СОЛИХГҮЙ ГЭХ ЯРИАНААС ҮҮДЭЖ, УЛСЫН АЖИЛ ЦАЛГАРДСНААС АРД ТҮМЭН ӨНӨӨДРИЙНХӨӨС Ч ИЛҮҮ ХОХИРОЛ АМСАЖ МЭДЭХЭЭР БАЙНА-

              Аль нэг яамны сайдад горилж байгаа хүмүүс Ерөнхий сайдтай учраа хурдан олмоор байна аа. Олны ярьдгаар шан харамж өгдөг бол түүнийгээ, дэнчин, амлалт бэлддэг бол тэрийгээ, сайд болсныхоо дараа хэрхэн хамтрах төлөвлөгөө сэлт боловсруулдаг бол үүнийгээ, тэгээд хамгийн гол нь хэл амаа маш богино хугацаанд олохгүй бол монголчуудын амьдрал хэцүү дээрээ бүр хэцүүдлээ. “Засаг сайд нараа солино”, “Дөрвөн сайдаа УИХ-ын үеэр амлалт өгсөн эрх бүхий хүмүүсийнхээ төлөөллөөр солихоос өөр аргагүй болсон” гэх мэт ярианаас болж, нийгэмд ч, яамдын сайд нарт ч хүлээлт үүсээд, ажил нь тэр хэрээр удаашраад, царцаад ойролцоогоор дөрвөн сар гаруйн хугацаа өнгөрлөө.  

           Саарал ордноор нэг “Ерөнхий сайд энэ өдрүүдэд ёстой гэдийдэг дээрээ тавьчихаад баргийн хүнтэй уулзахгүй, тохироогоо том яриулж чадаж байгаатай нь хальт таарсан болж, ирмээд өнгөрч байгаа гэнэ”, “Энэ удаад дөрөв ч биш, зургаан сайдаа Засгаасаа гаргах гэнэ”, “Амласан дөрөв, шахааны хоёр хүн сайдад горилчихоод, нөгөөдүүл нь албан тушаалдаа жижигдээд, ирээдүйд Ерөнхий сайдад олигтой түшиг болчихоор, мэргэжлийн биш хүмүүс учраас томилгоогоо хойшлуулчихаад байгаа юм гэнэ”, “Ерөнхий сайдын “давхар дээл” өмсүүлэх гээд байгаа хүмүүс нь өөрсдөө гүйж, гуйж, тохироо энэ тэр ярихгүй байгаа гэх сураг байна. Тиймээс хурлаа ес хүлээзнээд байгаа гэнэ” гэх мэтээр үнэн, худал нь мэдэгдэхгүй ч ортой гэмээр ярианууд “нисэлдэж” байна.

Олны ярьдгаар шан харамж өгдөг бол түүнийгээ, дэнчин, амлалт бэлддэг бол тэрийгээ, сайд болсныхоо дараа хэрхэн хамтрах төлөвлөгөө сэлт боловсруулдаг бол үүнийгээ, тэгээд хамгийн гол нь хэл амаа маш богино хугацаанд олохгүй бол монголчуудын амьдрал бүр хэцүүдлээ

       “Сайдын суудал, даргын сэнтий тэргүүтэд “залрах” дэнчин төдөн тэрбум, төчнөөн сая ам.доллар” гэх яриа төрийн томчуудын амнаас гарсаар ирсэн. Хэрвээ үнэн бол сайдад горилогсод нь дэнчин хийгээд тохироогоо хурдлуулчихвал төрийн ажил цэгцрэх гээд байна. Ялангуяа монголчуудын хувьд хамгийн чухал салбар болох Эрүүл мэндийн сайдыг солих тухай яриа өнгөрсөн намраас хойш гарсаар буй. Үнэн бол эртхэн сольж, омикрон, дельтакрон зэрэг минут, секунтээр хувьсаж буй мутаци вирусуудын эсрэг авах арга хэмжээгээ тодорхой болгож, эрчимжүүлмээр байна. Энэ салбарт менежмент, зөв зохион байгуулалт, тууштай бодлого, тооцоолол, хөрөнгө, санхүү хэрэгтэй болчихоод байгаа нь элдэв томилгоо, ийм тийм албан тушаалаас илүү тулгамдсан асуудал болоод байна. Үгүй бол монголчууд дельтакрон ч бус омикроны өмнө өвдөг сөхрөхөөр байна. Тодруулбал, өчигдөр Улсын онцгой комиссын хуралдаанаас гаргасан шийдвэрийг танилцуулах үеэр ХӨСҮТ-ийн Ерөнхий захирал Ц.БИЛЭГТСАЙХАН “Нэгдүгээр сарын 6-нд NGS лабораторийн шинжилгээг хийж дуусаад зөөвөрлөгдсөн 12 тохиолдлыг зарласан. Омикрон хувилбарыг илрүүлэх NGS шинжилгээний нэг хүнд ногдох өртөг нэг сая гаруй төгрөгийн өртөгтэй учраас дүүрэг, орон нутаг, эмнэлгүүдээс ирсэн эерэг сорьцуудаас түүвэрлэн цөөн тоогоор шинжилгээнд оруулж байна” гэсэн.

        Өөрөөр хэлбэл, монголчууд зөвхөн омикрон туссан эсэх шинжилгээн дээрээ л бүдрэхээр хэмжээний аюул тулгараад байна гэсэн үг. Энэ тохиолдолд бусад яам нь яах вэ гэхэд Эрүүл мэндийн салбарыг царцсан байдалтай удаан байлгамааргүй байна. Ковидын эсрэг эмчилгээний эм, тариа, шаардлагатай эмнэлгийн хэрэгслүүд тасалдаад багагүй хугацаа өнгөрөөд байна. Дээр нь сайдаа солигдохыг хүлээсэн газар, хэлтсийн дарга нарын ажил ч “царцсан” байдалд байгаа нь үнэний хувьтай. Өөрөөр хэлбэл, эрүүл мэндийн салбарыг албан тушаалын элдэв татлаа түтлээ, асуудалгүй нэг зорилгын төлөө эрчимтэй, тасралтгүй ажиллуулах боломжоор Засгийн газар хангамаар байна.

        Үүний дээр Гадаад харилцааны сайдыг солих эсэх тухай яриа мөн л Монголын гадаад харилцаа, тасралтгүй үргэлжлэх бодлогыг саармагжуулаад багагүй хугацаа өнгөрлөө гэхэд худлаа хэлсэн болохгүй л болов уу. Хил хаалттай, дэлхий нийтээр сандарч буй энэ үед Монголд ядаж дуслын шингэн илгээх донор орнуудын хамтын ажиллагаа нэн чухал байна. Гэтэл энэ бүхэн улс төрийн элдэв фракц, хагарал, миний чиний намын харьяалал тэргүүтэй томилгоог хүлээж, “харзнасан” байдалтай удлаа. Энэ мэтээр дурдвал салбар бүрд асуудал бий. Гол нь, сайдад горилогчид Ерөнхий сайдтай учраа богино хугацаанд олж, Монгол төрийн ажлыг хэвийн үргэлжлэхэд хувь нэмрээ оруулмаар байна, эхний ээлжинд. Горилогсдыг “уяж” буй эрх бүхий томчууд ч энэ тал дээр онцгой анхаарч, яриа хэлэлцээрээ түргэтгэж, өгөө аваагаа "гялалзуулмаар" байна.

Бүх зүйл улс төрийн элдэв фракц, хагарал, миний чиний намын харьяалал тэргүүтэй томилгоог хүлээж, “харзнасан” байдалтай удлаа