-БҮХ ЦАГ ҮЕИЙН БУРУУ БОДЛОГЫГ ТЭЭСЭН ЗАСГИЙН ГАЗАР ГЭДЭГ НЬ ӨРГӨН БАРЬЖ БУЙ ХУУЛИЙН ТӨСЛҮҮДЭЭС НЬ ИЛТ ХАРАГДАНА-

         Монголын улс төрд их уналтын үе тохиож байна. Засгийн эрх баригч нам нь бусад жижиг намынхаа “шүдгүй арслан”-гуудаас айхдаа үр хүүхэд, ах дүүсийг нь намынхаа нэрээр сонгуульд ногоон гэрлээр оруулаад, ялуулчихдаг, ял, гэм зэмийг нь ханцуйдаа наймаалцчихдаг, наймаа таарсан нэгнийг ичих ч үгүй “кран”-даад гаргаад ирж байгаа нь энэ намын бодлого яалт ч үгүй уруудсаных.

      Сөрөг хүчний үүрэг гүйцэтгэж байгаа АН-ынханд баримталж байгаа бодлого битгий хэл багтаж шингэж, эвлэлдэх боломж нам дотроо алга болоод хоёр жил гаруй хугацаа өнгөрчихлөө. Үүнийгээ УИХ, Ерөнхийлөгчийн сонгуулиар олон нийтэд хангалттай ил гаргаж, онигоо болсон ч Нөхөн сонгуулиар мөн л шившгээ тариад авлаа. Ард түмэнд нэр хүндгүй болсон АН-д ахин сэхэх боломж ойрдоо л үгүй болчихлоо.

 Бусад жижиг намынхаа “шүдгүй арслан”-гуудаас айхдаа үр хүүхэд, ах дүүсийг нь намынхаа нэрээр сонгуульд ногоон гэрлээр оруулаад, ялуулчихдаг, ял, гэм зэмийг нь ханцуйдаа наймаалцчихдаг, наймаа таарсан нэгнийг ичих ч үгүй “кран”-даад гаргаад ирж байгаа нь энэ намын бодлого яалт ч үгүй уруудсаных

       Засгийн газарт сүртэй нөлөө үзүүлж чадахгүй ганц нэг суудалтай намууд төдийгүй бие даагчид өөрсдийн эрх ашигт нийцэх, олон нийтэд таалагдах зүйлсээ хийгээд юун эх орон, ард түмэн, ковидоос хамгаалах манатай л байна.

       Үндсэндээ Засгийн газрыг бүрдүүлж буй будлиу хэдийн байгаа үнэн төрх энэ. Гэсэн ч УИХ-ын гишүүн л бол гишүүн учраас яалт үгүй тэд төрийн эрх барьж, бодлого шийдвэр гаргалцаж явна. Гол нь өөдтэй, шийдтэй, санаачилгатай юм өнөөг хүртэл нэгээхэн ч алга. Ковидоос сэргийлэх болон хамгаалахтай холбоотой асуудал үүсэнгүүт Шадар сайд, УОК-ын дарга, Нийслэлийн Засаг дарга нар нь нуруу нуруугаа харуулж сууцгаагаад, дор дороо нэг нэг юм гоншигоноод, тал талд дур дураараа шийдвэр гаргаад явж өгнө шүү дээ. Тэгж байтал нь Эрүүл мэндийн сайдтайгаа ХӨСҮТ-ийн удирдлага, эмч нар нь санал зөрөөд тэс хөндлөн хараад хэвтэцгээчихнэ. Тэгээд бас болоогүй ээ, УИХ-ын гишүүд нь зунжин, намаржин боловсруулсан хуулиа өргөн барих болтол нэг хэсэг нь Эдийн засгаа эрчимжүүлэх нэрээр байгаль дэлхий, уул усаа ухуулж, сэндийлүүлэх, ан амьтан, ургамлынхаа амиыг таслах, тусгай хамгаалалттай газар нутгаасаа чөлөөлөх хуулийн төсөл ичих ч үгүй бариад зогсож байна. Нөгөө хэсэг нь гаднын иргэдэд хэдэн халтар төгрөгөөр Монгол Улсад оршин суух эрх олгоход буруудаад байх юм байхгүй гэж байна. Эдийн засгаа сэргээнэ, хэдэн төгрөг олно л гэвэл эх орон, газар нутгаа ч зарахад бэлэн гишүүд Төрийн ордонд холхиж байгаа нь дээрх хоёр хуулийн төслөөс л тодхон харагдана.

        Бүрэн эрхэт байдал хийгээд тусгаар тогтнол, газар нутаг, үнэт зүйлээ бусдад бадар болгон барин байж мөнгө олох тухай эдгээр хуулийн төслийг хэн нэгэн санаачилдаг юмаа гэхэд түүнийг нь боловсруулж өгөөд төсөл болгон УИХ-д танилцуулахад бэлгэн болтол нь зөвлөж, бэлдэлцэж байгаа хуульчид, зөвлөхүүд, гарын үсэг зуран зөвшөөрч байгаа УИХ-ын гишүүд, Ажлын хэсгийнхнийг нь юу гэж ойлгох вэ. Төрийн эсрэг хууль батлуулахаар санаархсан гэж үзэхэд буруудахгүй баймаар.

Эдийн засгаа сэргээнэ, хэдэн төгрөг олно л гэвэл эх орон, газар нутгаа ч зарахад бэлэн гишүүд Төрийн ордонд холхиж байгаа нь дээрх хоёр хуулийн төслөөс л тодхон харагдана

       Үүний дээр Ерөнхийлөгч нь нэг газраас нь булгалж, сугалж нөгөө газар нь суулгахыгаа мод тарих үндэсний хөтөлбөр хэмээн зарлаж, төрийн албыг тэр чигт нь ажиллах хүчээ болгочихоод зогсож байна. Ерөнхийлөгч болсноосоо хойш тэр хэд хэдэн удаа гаднын томчуудтай утсаар ярьлаа, хэдэн уул, овоогоо тахилаа, энэ хөтөлбөрийг хэрэгжүүллээ. Өөрөөр гавьтай хийгээд гавьяатай юм Ерөнхийлөгч болсноосоо хойш ер цухуйлгасангүй. Ерөнхий сайд байхдаа хэлдэг байсан “Хариуцлагын сэлмээ сугална”, “Хамтдаа л хариуцлагаа хүлээнэ” гэх мэт уран цэцэн үгс нь гарахаа ч байж.

       Харин Ерөнхий сайд Л.Оюун-Эрдэнэ энэ албаа авсныхаа дараа салбар бүрийн төлөөлөлтэй өглөөний уулзалт хийж байна хэмээн очсон газар бүртээ “Шорвог мэт гашуун үгээ би хэлсээр л байх болно” хэмээсхийж байгаад тэгсхийгээд намжсан. Ингээд Шадар сайд хийгээд Нийслэлийн Засаг дарга тэргүүтэй биесээ “үздэггүй” томчуудтай хэсэг “зууралдаж” байгаад барахгүйгээ мэдсэн үү, яасан орхисон. За тэгээд ковидгүй зун, наадам, намар гэж хэсэг сурталчилсан ч тусыг эс олж, тэрүүхэндээ хэдүүлэхнээ наадамлаад амжсан. Ингэж байтал Замын-Үүдийн ариутгалын хаалга, ачаа барааны гацаа, бөглөрөл гэх том сэдэв босож ирж, тэр хавиар хэсэг манаргасан ч тэндэхийн “Вант Улс”-ын эсрэг хүчгүйдээд Улаанбаатар руугаа буцсан. Ирснийхээ дараа “ах”-ыгаа илгээж, тэндэхийн дархалсан гэгдэх дарга нарыг албан тушаалаас нь буулгаж, АТГ-т шалгуулахаар баривчлуулаад илч төлөөлөгчдөө томилсон. Гэсэн ч өнөөг Замын-Үүд дэх асуудал бүрэн шийдэгдээгүй, нөхцөл байдал нь тэр үеийнхээсээ дээрдээгүй л байна. Ийн хүүхэд, нохой шуугиулсныхаа дараа уул овоо нууцхан тахиад, нам жим амьдарч байснаа гэнэт “Цахим үндэстэн” шоу төв талбайдаа зохион байгуулж, хэдэн зуун хүн цуглуулаад үг хэлж, зүрх сэтгэлийг нь хөдөлгөж өгөөд, талбай дүүрэн бүжиг, таанц болгосон. Юун коронавирусийн дэглэм, хүн хороондын зай, дельта, мутаци вирус... Тал талд ах дүүстэйгээ ч уулзахаас цэрвэн дэглэм сахиж буй монголчуудынхаа нүдэн дээр Ерөнхий сайд нь толгойлоод бут авч, бүгдээрээ нийлнэ гэдгийг үзүүлж өгсөн.

Энэ Засгийн газар удахгүй унах нь дамжиггүй, гэхдээ монголчуудад тохиох хамгийн муу бодлоготой нь тэд л байгаасай

        Энэ мэтээр энэ Засгийн газраас өнгөтэй өөдтэй гэчихээр юм өнгөрсөн хэдэн сард лав цухуйсангүй. Эдийн засаг нь элгээрээ хэвтэж, ард иргэд нь ковидын хор уршигт нэрвэгдэн өвчиндөө шаналж, өдөрт хамгийн цөөндөө 10 хүн коронавирусийн оноштойгоор амиа алдаж байхад манай засгийнхан “Казино байгуулна, бооцоот морины уралдаан зохион байгуулна, мансууруулах төрлийн өвс, ургамлыг зөвшөөрсөн хэсэгт тарьж, ургуулна. Зэрлэг амьтдаа харийнхнаар агнуулах тоог өмнөхөөс нь хоёр дахин нэмүүлнэ, тусгай хамгаалалттай газар нутгаасаа алт тэргүүтэй ашигт малтмал олборлуулахаар улсын хамгаалалтаас гаргана. Ингэснээр эдийн засаг сайжирна” хэмээгээд сууж байна. Өөрөөр хэлбэл, Монгол Улсын Засгийн газар, УИХ тэргүүтэй төр түшиж байгаа бүх түвшинд бодлого, нэгдэл, мэдлэг, цэгц алга. Энэ Засгийн газар удахгүй унах нь дамжиггүй, гэхдээ монголчуудад тохиох хамгийн муу бодлоготой нь тэд л байгаасай.

Тал талд ах дүүстэйгээ ч уулзахаас цэрвэн дэглэм сахиж буй монголчуудынхаа нүдэн дээр Ерөнхий сайд нь толгойлоод бут авч, бүгдээрээ нийлнэ гэдгийг үзүүлж өгсөн