Монголын улс төр уугьж эхэллээ. Энэ намрын улс төрд гал авалцах нь. Тэр гал Ерөнхий сайд Л.Оюун-Эрдэнэ, Ерөнхий сайд асан Сү.Батболд нарын дунд асах нь уугьж буй утаанаас нь илэрхий үнэртэж байна. Бүх шатанд ноёрхлоо тогтоож, Монголын “эзэн” болсон МАН энэ намар намын жинхэнэ эзэн хэн байх вэ, гэдгээ эцэслэнэ гэсэн үг. Хэн ялсан нь ирэх гурван жил өөрийн дүрмээр тоглож, хөгжмөө захиална. Төрөө түймэрдэж, Засгаа "шатаачихгүй" л байгаасай, тэр гал.

           Жаран бутархай, түмэн хагархай байсан МАН одоо хоёр хэсэгт хуваагджээ. Нэг тал нь Ерөнхий сайд Л.Оюун-Эрдэнэ болон түүний сайдаж муудаж, салах дээрээ ч тулж үзсэн сайн ах У.Хүрэлсүх. Ерөнхийдөө дунд ба залуу үеийнхний нэгдэл, залуу эзэд. Нөгөө тал нь Ерөнхий сайд асан Сү.Батболдын “МГИМО” болон М.Энхболдын “Хотынхон” буюу хожмынхоор “32-ынхон”. Хуучин эзэд гэсэн үг. Сү.Батболд, М.Энхболд нарын хувьд тус тусдаа явсаар залуучууддаа идүүлж дуусах уу, нэгдэж зүтгээд улс төр дахь насаа уртасгах нь уу гэдэг сонголтыг хийжээ гэсэн үг. Харин хуучин нь эргэж засаглах уу, шинэ нь үргэлжлүүлэн засаглах уу. Үндсэндээ эдний дунд энэ намрын улс төрийн их гал авалцана.

        Ерөнхийлөгч асан Х.Баттулга Ерөнхий сайд Л.Оюун-Эрдэнэд зөвлөхөөр болсон нь намрын улс төрд гал дүрэлзэхийн дохио. Хөгшин нь залуудаа, хуучин нь шинэдээ зөвлөх нь, мэддэг чаддагаа зааж сургах нь байдаг, байж болох үзэгдэл ч Х.Баттулга, Л.Оюун-Эрдэнэ хоёрын хувьд зөвлөх, зөвлүүлэх гэхээсээ илүү хэн хэндээ харилцан ашигтай, хамтын ажиллагаа гэж болмоор. Нэг ёсондоо Л.Оюун-Эрдэнэ экс Ерөнхийлөгч Х.Баттулгыг дэргэдээ авснаараа өөр лүү нь ирэх их түймрийг угтан цурамдаж байна гэсэн үг.

             Х.Баттулгаар зөвлүүлэхээр болсон Ерөнхий сайд, МАН-ын дарга Л.Оюун-Эрдэнийн хувьд шинэ, залуу, Сү.Батболд мэтийн акулуудын дэргэд аквариумын загас гэж дүгнэгдэж байсан ч энэ удаад сайн нүүлээ. Муугаар хэлбэл, Ерөнхий сайд Л.Оюун-Эрдэнэ сөрөг хүчний хүнээр зөвлүүлэхээр болсон нь Сү.Батболдынхноос сүнсээ гартал айж байгаагын илрэл. Өөрөөр бол Х.Баттулга Сү.Батболдоос өөрийг нь хамгаалах хамгийн бат бөх хана ч байж мэднэ. Юу гэхээр, У.Хүрэлсүх огцрохоор болж, УИХ-ын чуулганаар эл асуудлыг хэлэлцэж байх үед Х.Баттулга “Тусгаар Монгол Улсыг эзэгнэн дарлах гэсэн бүлэглэл, бүр тодорхой хэлэх юм бол УИХ-ын гишүүн, Ерөнхий сайд асан Сүхбаатарын Батболдын удирдсан бүлэглэл төрийн эргэлт хийж байна. Өнөөдөр Оюутолгой төслийн үйл ажиллагааг дотоодын төдийгүй гадаадын хууль, хяналтын байгууллагууд шалгаж эхэлсэн бөгөөд гол холбогдогч нь Сүхбаатарын Батболд гэдгийг хаа хаанаа тогтоогоод эхэлсэн. Ийм учраас төр Монголын төрийг хямрааж, Монголын ард түмний сонголтыг нухчин дарах ажиллагааг удирдан зохион байгуулж, хэрэгжүүлээд эхэллээ” хэмээн индэр дээрээс чанга дуугаар хэлсэн. Зүгээр ч нэг хэлээд зогсоогүй хууль хяналтынхнаар оролдуулаад ч амжсан гэх. Тэгэхээр Х.Баттулга бол Сү.Батболдыг зөрж чадах нэг хүч мөн.

           Хоёрдож, Л.Оюун-Эрдэнэ Х.Баттулгыг дэргэдээ орогнуулснаараа хэрвээ асуудал хурцдаж, огцрох эсэх асуудал УИХ дээр орж ирвэл АН-ын бүлгийн талыг хяналтдаа байлгах боломжтой болж байна гэсэн үг. Х.Баттулга Төрийн тэргүүнээс буусан ч АН бүлэг дахь нөлөөллөө алдаагүй гэдгийг санах ёстой.

            Л.Оюун-Эрдэнэд зөвлөхөөр болсон Х.Баттулгын хувьд Л.Оюун-Эрдэнэ хамгийн аюулгүй хорогдох байр. Ерөнхийлөгч байхуйдаа олон өстөнтэй болсон, өстнүүдээсээ илүү эрх мэдлийг түшиж гэмээнэ түр аюулгүй байх, дараа дараагийн нүүдлээ тунгаах зав зай гарч ирнэ. Эс бөгөөс түүнд оффшор данс, харь орон дахь хаус гээд шорон зүг олон зам зурайна. Харин Ерөнхий сайд Л.Оюун-Эрдэнэд одоогоор эрх мэдэл байгаа. Шүүх, прокурор, тагнуул, цагдаа гээд хууль хяналтад хамгаалалтаа сайжруулсан Л.Оюун-Эрдэнэ Х.Баттулгын хувьд төрийн хамгаалалт л гэсэн үг . Ингээд харвал Л.Оюун-Эрдэнэ, Х.Баттулга хоёрын хоршил хэн хэндээ харилцан ашигтай.

             Сү.Батболд, М.Энхболд нарын хувьд У.Хүрэлсүхийг ч, Ерөнхий сайд Л.Оюун-Эрдэнийг ч эрх мэдлийн тэргүүнд байлгах сонирхолгүй, анхнаасаа ч байгаагүй. М.Энхболдын хувьд Л.Оюун-Эрдэнэ, У.Хүрэлсүх нарт хэт саймширч, дүүгээ гэж андуурч явсан үе бий. Даанч хэтэрхий итгэснээсээ болж намын дарга, УИХ-ын даргын суудлаа аль алиныг нь алдсан. Одоо дахиад итгэх гэнэн нь М.Энхболд биш. Сү.Батболдын хувьд ч ялгаагүй. Ялангуяа сүүлийн үед Л.Оюун-Эрдэнийн Засгийн газар Оюутолгойгоор оролдох болсон нь түүний толгойны өвчин болж байгаа гэх. Бас нэг том шалтгаан нь, У.Хүрэлсүх танхимаараа огцорч, Л.Оюун-Эрдэнэ танхимаа бүрдүүлэх үедээ М.Энхболд болон Сү.Батболдын фракцад сайдын хувь хүртээгээгүй нь шинэ болон хуучин үеийнхний хооронд ширүүн маргаан дэгдээсэн гэх мэдээлэл бий.

Сүүлийн хоёр жил ажин түжин байсан Сү.Батболд болон М.Энхболдынхон энэ мэт шалтгаанаар одоо хөдөлж эхэлнэ. УИХ, Орон нутгийн сонгууль, Ерөнхийлөгчийн сонгуулийн үр дүнг харзнаж, хөдлөхөө азнасан. Одоо МАН бүх шатанд ноёрхлоо тогтоосон учраас хүлээх шаардлагагүй, харин ч цаг алдалгүй намаа гартаа авах нь хуучин эздийн хүсэж буй зүйл. Сү.Батболд, М.Энхболд нарын аль алинд нь улс төрийн тайзан дээр оршин тогтнох хугацаа бага үлдсэн. Одоо л МАН-ыг гартаа авч, фракцынхнаа хоолонд оруулахгүй бол цаашдын ирээдүй нь бүрхэнэ.

Ингээд харвал энэ намрын улс төрд их гал дүрэлзэх нь ээ.