Хөдөө орон нутгаа ногоон бүс болгож, цар тахлаас хамгаална гэсэн яасан бэ САЙД НАР АА

2021-08-31, 876

Монгол Улс ойрын хэдэн жилдээ цар тахлын амаргүй цаг үетэй дасан зохицож амьдрахаас өөр аргагүй болов бололтой. Угтаа бол төрөөс хэрэгжүүлж байгаа арга хэмжээ, хийж байгаа ажлыг харахад энэ аюулт өвчнийг хохирол багатай давж гарах найдвар төдийлөн харагдахгүй байгааг нуух юун. Өөрөөр хэлбэл, Засгийн гараас хэрэгжүүлсэн арга хэмжээ нь “бай”-гаа онохоос онохгүй нь их юм. Энэ жилдээ л ковидоос сална гэж мөрөөдөлтгүй болов. Бүтэн хоёр жил гаруй хугацаанд “Төр, засаг арга хэмжээ авчих байх, олон удаагийн хөл хорио үр дүнгээ өгч, сайн мэдээ дуулгана биз” гэсэн итгэл тээсээр иргэд өдийг хүргэсэн. Харамсалтай нь, өдөр ирэх тусам халдварын тархалт нэмэгдэж, цар тахлын хүндрэлээр амиа алдах тоо ч өссөөр байх боллоо. Түүгээр ч зогсохгүй улаан, шар, ногоон түвшин гээд ангилж байсан хөдөө орон нутгаар “Ковид-19” тархаж, хяналтаа алдав. Ингэснээр Монгол Улс цар тахалд бүрэн бүслэгдэж, эрүүл мэнд, эдийн засаг гээд бүх талаараа хүндхэн цаг үеийг туулах боллоо.

Сүүлийн 24 цагийн хугацаанд гэхэд л 2209 хүнээс коронавирусийн халдвар илэрч, коронавирусийн хүндрэлийн улмаас 41-80 насны дөрвөн хүн нас баржээ. Коронавирусийн халдвар нь батлагдсан 2209 хүний 438 нь Улаанбаатарт, 1771 нь орон нутагт илэрсэн гэх мэдээллийг Эрүүл мэндийн яамнаас өгөөд буй. Эндээс харахад орон нутагт халдварын тархалт улам бүр нэмэгдэж байна.

Хөдөөгийн алслагдсан сумдад халдвар нэгэнт тархаад эхэлвэл хаана хэн өвдсөн нь мэдэгдэхгүй хяналтаас бүр мөсөн гарч байна гэсэн үг. Гэтэл Засгийн газраас мөнөөх л вакцинжуулалтаа төдөн хувьтай, сайн үргэлжилж байна гэх тоон мэдээлэл танилцуулахаас өөр ажил хийлгүй өдийг хүрлээ. Ядаж, хөдөө орон нутагт халдвар тараахгүй, хяналтандаа байлгах боломж байсан ч оновчтой арга хэмжээ авахгүй байсаар өнөөдрийн байдалд буй. Одоо харин яаж, халдвартай иргэдийг хүндрэл багатай, эдгээх вэ гэдэг дээр л анхаарал хандуулах шаардлагатай болов.

Хоёр жил шахам хаалттай байсан сургууль, цэцэрлэгийн үйл ажиллагаа эхэлж, хөл хөдөлгөөн нэмэгдэх эхэлсэн үетэй давхцаад коронавирусийн мутацлагдсан хувилбар дэгдэж, аюулын харанга дэлдэв. Хэн хүнгүй намар дахиад хөл хорио тогтоох вий, мутацлагдсан вирус тусчихгүй байхсан гэх айдастай байна.

Ялангуяа орон нутагт энэ мутацийн халдвар эрчимтэй тархаж, эмнэлзүйн шинж тэмдэг нь нэн даруй илэрдэг, халдвар авсан хүмүүсийн 95 хувь нь эмнэлэгт хэвтэн эмчлүүлэх шаардлагатай болдог нэн аюултай мутаци гэнэ.

Ямар ч вакцинд дийлдэхгүй, ковидоор өвчилсөн ч халдвар авах эрсдэл өндөртэй гэх мэдээллийг эрдэмтэд дахин дахин сануулсаар буй. Манай улсад мутацлагдсан хувилбар гэнэт орж ирчихсэн ч биш. Дэлхий нийтэд анх тархаж эхлэхэд манайх хэдийн мэдээлэлтэй болж, халдвараас урьдчилан сэргийлэх бүрэн боломжтой байв. Харамсалтай нь, өнөөдөр коронавирусийн мутацлагдсан хувилбар хамгийн аюулгүй бүс гэгдэж байсан хөдөө орон нутгуудад маш хурдацтай тархаж, олон хүн өвчиллөө. Хэрэв зээ энэ намар Засгийн газар зунжин налайж, найрласан шигээ, жолоогоо сул тавибал ёстой л амьд үлдэхийн төлөөх тэмцэл жинхэнэ утгаараа эхлэх нь.

Тун удахгүй вакцины үйлчлэх хугацаа дуусаж, өмнө нь ямар байсан яг л тийм горимдоо шилжих нь. Коронавиурсийн эсрэг вакцин 5-6 сар халдвараас хамгаална гэдгийг эрдэмтэн судлаачид удаа дараа сануулж байсан. Амны хаалтаа тайлж, ковидгүй наадамлана гэсэн амлалтаасаа буцсан Ерөнхий сайд ирэх өвөлд бэлдэж л байдаг байгаадаа.

Хөдөө орон нутгаа ногоон бүс болгож, цар тахлаас хамгаална гэсэн яасан бэ САЙД НАР АА

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1

Сэтгэгдэл үлдээсэн: 2021-09-01 10:38:24

Иргэн: Наад сайд, гишүүд гээд байгаа малнууд чинь цар тахал ямар байх огт хамаагүй, ямар шийд гаргавал хэнд ашигтай вэ гэж л бодож байгаа шүү дээ. Тэгээгүй бол Улсын наадмаа зохиогооогүй байж аймаг орон нутагт бөх барилдуулаад л, морь уралдуулаад л Халдварыг тараачихсан шүү дээ.

Шинэ мэдээ

Нийтлэлчид