Ерөнхийлөгч У.Хүрэлсүх Ерөнхий сайд асан, улс төрийн хоригдол М.Энхсайханы гэм бурууг уучилж, нарснаас нартад гаргахаар болж гэнэ. Тэднээс муу хүн байхгүй мэтээр цоллож, нийгмээр нүд үзүүрлүүлж, шоронд сүр дуулиантайгаар хийсэн улс төрийн хоригдлуудаа ээлж ээлжээр, эвтэйхэн шалтгаар нартад гаргасаар, эцэст нь Сангийн сайд асан С.Баярцогт л үлдэж байна. Түүнийг суллах нь ч ойрын ирээдүйнх биз ээ. 

          У.Хүрэлсүх, Х.Баттулга хоёр төрийн толгойд ид андалж байх үед нэр бүхий улстөрчид шорон зүг "цувсан". Ялангуяа 2018-2020 он хар түүхтэй улстөрчдөд суудал нь өнцөгдсөн жил байсан гэхэд болно. Баруун солгойгүй барьж, хорьсон, УИХ-ын сонгуульд нэр дэвшигчийн мандатаа авсан улстөрчдийг хүртэл. Улс төрийн баривчилгааны дуулианууд өрнөсөөр өнгөрсөн оны төгсгөл гэхэд шоронд Ерөнхий сайд асан гурав, салбарын сайд асан тав, УИХ-ын гишүүн асан хоёр хоригдож байлаа.

Тухайлбал, Монгол Улсын 18, 25, 29 дэх Ерөнхий сайд буюу М.Энхсайхан дөрвөн жил зургаан сар, С.Баяр таван жил, Ж.Эрдэнэбат зургаан жилийн ялтай хоригдож байв. Мөн Аж үйлдвэрийн сайд асан Д.Эрдэнэбат дөрвөн жил зургаан сар, Сангийн сайд асан С.Баярцогт дөрвөн жил найман сар, Сангийн сайд асан Б.Болор гурван жил зургаан сар, Хөдөлмөр, нийгмийн хамгааллын сайд асан Н.Номтойбаяр таван жил таван сар, Шадар сайд асан Да.Ганболд нэг жил гурван сар, УИХ-ын гишүүн асан Д.Дамба-Очир гурван жил зургаан сар, УИХ-ын гишүүн асан Г.Солтан гурван жилийн ялтай шоронд байлаа.

Тэгвэл сүүлийн хэдхэн сарын дотор тэднээс ес нь наранд гарч, С.Баярцогт л торойж хоцроод байна. 

Тухайлбал, 

       18 дахь Ерөнхий сайд М.Энхсайханы хувьд эхлээд “Таван толгой”-н нүүрсний ордын төслийн нэгжийг удирдаж байхдаа эрх мэдэл, албан тушаалаа урвуулан ашигласан, хөрөнгө оруулагч талд ашигтай байдал бий болгосон, энэ үйлдлээрээ хүн амын амьдралыг хангах үйл ажиллагааг доголдуулж, хорлон сүйтгэхийг завдсан гэж буруутгагдсан. Гэхдээ нотлогдоогүй гэх шалтгаанаар Эрчим Хүчний яамны харьяа Тавантолгой цахилгаан станц төслийн нэгжийн захирлаар ажиллаж байхдаа 75 сая төгрөгийн үнэлгээтэй автомашиныг 130 саяар худалдан авч, улсад 55 сая төгрөгийн хохирол учруулсан гэж ялласан байдаг. Гэвч ийнхүү Ерөнхийлөгч У.Хүрэлсүх түүнд уучлал үзүүлж, суллахаар болж байна. 

        25 дахь Ерөнхий сайд С.Баярын хувьд Ерөнхий сайдаар ажиллаж байхдаа албан тушаалын байдлаа урвуулан ашигласан буюу “Петровис”-ын шатахууныг "Оюутолгой"-д шахсан, АНУ-д хууль бусаар олон тооны үл хөдлөх хөрөнгө худалдан авч, мөнгө угаасан хэргээр давж заалдах шатны шүүхээс хоёр жил зургаан сарын хорих ял сонссон. Гэвч түүнийг өнгөрсөн сард магадлангаар сулласан. Хоригдож байх хугацаандаа зөрчил гаргаагүй, зан байдлаараа нийтэд аюулгүй болсон гэдгээ харуулсан, гэм буруугаа ухаарч, тохитой томоотой нэгэн болсон, хохирлоо нөхөн төлсөн зэрэг шалтгаанаар тэнсэж, магадланд хамруулж, сулласан гэх.

      29 дэх Ерөнхий сайд Ж.Эрдэнэбат мөн л эрх мэдэл, албан тушаалаа урвуулан ашигласан хэргээр “аавын хаалга” татсан. Түүнийг Ерөнхий сайдаар ажиллаж байхдаа Өмнөговь аймгийн Гурвантэс сумын нутагт байх “Улаан сайр-2” хэмээх 1463.82 га талбайг төрсөн дүүтэйгээ хамтран эзэмшдэг компанийнхаа нэр дээр таван сая төгрөгөөр худалдан авч, зургаан сарын дараа уг тусгай зөвшөөрлөө “Алтай констракшн” ХХК-ийн захиралд худалдсан хэргээр ялласан юм. Гэвч зургаан жилийн хорих ялтай хоригдож байсан ч түүний хэргийг Дээд шүүх хянан хэлэлцээд, анхан шатны шүүхийн шийтгэх тогтоол, давж заалдах шатны шүүхийн магадлан нь хуулийн шаардлага хангахгүй байна гэж үзэн прокурорт буцааснаар тэр суллагдсан юм. 

      Аж үйлдвэрийн сайд асан Д.Эрдэнэбатад анхан шатны шүүхээс дөрвөн жил зургаан сар, Сангийн сайд асан Б.Болорт дөрвөн жил гурван жил зургаан сар хорих ял оноосон бол давж заалдах шатны шүүхээс хорих ялаас чөлөөлж, Д.Эрдэнэбатыг 27 сая төгрөгөөр, Б.Болорыг 13 сая төгрөгөөр торгох ял оноосон байдаг. Харин Дээд шүүх тэдний хэргийг хянан хэлэлцээд нэмэлт мөрдөн байцаалт явуулахаар прокурорт буцааж, тэднийг сулласан юм. 

      Хөдөлмөр, нийгмийн хамгааллын сайд асан Н.Номтойбаярын хувьд анхан шатны шүүхээс таван жил таван сар сонссон ч Дээд шүүхээс нэг жилийн хорих ял болгож бууруулсан. Гэхдээ цагдан хоригдсон болон ажилласан хоногоо нэмж тооцуулан хугацаанаасаа өмнө суллагдсан юм. 

       Шадар сайд асан Д.Ганболдын тухайд анхан шатны шүүхээс дөрвөн жилийн ял сонсож, давж заалдах шатны шүүхээс хорих ялыг нь нэг жил гурван сар болгож бууруулсан. Харин Дээд шүүх хянан хэлэлцээд хэргийнх нь хөөн хэлэлцэх хугацаа дууссан үндэслэлээр сулласан юм. 

       ЖДҮ-чдын "түүчээ" УИХ-ын гишүүн асан Д.Дамба-Очир гурван жил зургаан сар, Г.Солтан гурван жилийн хорих  ялтай хоригдож байсан ч Ерөнхийлөгч асан Х.Баттулгын уучлалаар суллагдсан. 

        Ерөнхийлөгч У.Хүрэлсүх анх Ерөнхий сайд болохдоо хууль зөрчдөг, төсөв, тендер, лиценз будлиулдаг, төрөөс төрсөн тэрбумтнуудтай хатуу тэмцэж, хууль ёсыг сахиулна гэж сүржин мэдэгдэж байлаа. Тиймдээ ч 2018 оноос хойших улстөрчдийг онилсон баривчилгаануудыг олон нийт хууль ёсыг сахиулж, шударга ёсыг бий болгож байгаа зөв зүйтэй үйлдэл гэж дэмжиж байсан. Гэвч үнэн хэрэгтээ түр зуур нэр алдар зүүх, хуулийг шударгаар сахиулж буй мэт харагдах, замд нь гай болох улстөрчдийг зорьсон газартаа хүртлээ түр зуур замаасаа хол байлгах гэсэн ёс төдий үйлдлүүд байсан нь ийнхүү ил болж байна. Тэр хүссэндээ хүрсэн учраас улс төрийн хоригдлууд ээлж ээлжээр, эвтэйхэн шалтгаар нарснаас наранд гарсаар, эцэст нь улс төрийн ганц хоригдолтой л үлдэх нь. 

         Нөгөөтээгүүр, эрх мэдэл, албан тушаалаа урвуулан ашигласан, хуулийн дээр гишгэлсэн, улсад хэдэн зуун сая, хэдэн арван арван тэрбумаар тоологдох асар их хэмжээний хохирол учруулсан, иргэдийн боломжийг хулгайлсан зэрэг дуулиантай хэргүүдэд нэр холбогдсон улстөрчдийг сүр дуулиантайгаар баривчилж, цагдан хорьж, шат шатны шүүхийн танхим “хэсүүлж”, хэдэн жилийн ял оноож, олон нийтийн санааг амрааснаа хэдхэн сар, ихдээ жил хорьж нэр цэвэр, үүрэх гэмгүй болгоод ямар нэг эвтэйхэн шалтаг, хуулийн цоорхойгоор сулладаг байдал жишиг болоод тогтчихлоо. Улсаас таван тэрбум төгрөг “идсэн” улстөрч гэмт үйлдлийнхээ ял шийтгэлийг хүлээсэн нэр зүүж, тавхан сар хоригдсон болоод гарч ирдэг байвал монголын төр хэзээ ч хулгайч, дээрэмчин улстөрчдөөсөө салж чадахгүй, тэд увайгүй үйлдлээ давтсаар л байх болно.