Том зорилго тээсэн “хэн нэгэн” 2019 онд болж өнгөрсөн цагдаагийн алба хаагчидтай холбоотой хэргийн бичлэгүүдийг дахин нийтэлж, шатахууны үнийн өсөлтийг хав дарчихлаа.

            Олон нийтийн сүлжээнд иргэдийг гавлаж, зодож буй цагдаагийн хоёр алба хаагчийн бичлэг өчигдөр 20:00 цагийн үед цацагдсан. Мөн эрүүлжүүлэхийн байранд цагдаагийн алба хаагч хүний аминд хүрч буй бичлэгч дахин нийтлэгдэв. Угтаа бол тус хоёр бичлэгт 2019 онд болж өнгөрсөн үйл явдал гардаг. Өөрөөр хэлбэл, Нийслэлийн цагдаагийн удирдах газрын харьяа Албадан саатуулах, баривчлах төвийн байранд жижүүрийн цагдаа, цагдаагийн дэд ахлагч Г.Ууганбаяр иргэний биед халдсанаас болж хохирогч амиа алдсан нь хэрэг 2019 онд гарсан байдаг. Өдгөө бусдын амийг хохироосон хэргээр тус цагдаагийн алба хаагч ял шийтгэл эдэлж байгаа юм.

            Тэгэхээр нэгэнт болж өнгөрсөн буюу хэрэг нь шийдэгдсэн дээрх хэргүүдийг ямар нэгэн зорилготойгоор нийтлэж буй нь тодорхой юм. Харин хэн, ямар зорилгоор олон нийтийн сүлжээнд нийтэлж, гэнэтхэн “сэвэх” болсон нь сонирхол татна. Шөнөжин цагдаа нарыг үзэн ядаж, хараалын үгс урсгаж хоносон монголчууд өнөө өглөөг "Шатахууны үнэ 300 төгрөгөөр нэмэгдлээ" гэдэг мэдээтэй угтлаа. Гэвч хэн ч энэ талаар юу ч ярьсангүй. Нүд балай, чих дүлийн мэт байцгаах бөгөөд өнөөх л “цагдаагийн” гэх бичлэг амнаас ам дамжин яригдана. Бид ийм л мартамхай ард түмэн. Ердөө 27 хоногийн өмнө шатахууны үнэ 300 төгрөгөөр нэмэгдэхэд монголчууд бүхэлдээ шүүмжилж, эрх баригчид маш том эсэргүүцэлтэй тулгарч байсан. Иймээс л эрх баригчдад дахин ард иргэдийн эсэргүүцэлтэй тулгарахгүйн тулд тэднийг сатааруулах хэрэгцээ гарч ирсэн байна. Тэгвэл тэдэнд хамгийн ойрын сэдэв нь цагдаагийн байгууллага байсан нь гарцаагүй. Учир нь цагдаагийн албан хаагчийн биед халдсан гэх хэргээр эрүүгийн хэрэгт татагдаад буй “сууж үүрдэг” залууг өмөөрсөн монголчуудын халуун цөс хөрөөгүй байгааг тэд хэнээс ч илүү мэдэж байв.

Ердөө 27 хоногийн өмнө шатахууны үнэ 300 мянган төгрөгөөр нэмэгдэхэд монголчууд бүхэлдээ шүүмжилж, маш том эсэргүүцэлтэй тулгарч байсан. 

Ингээд л цагдаагийн алба хаагчидтай холбоотой бичлэгүүдийг сенсац болгон тарааж, шатахууны үнийн өсөлтийг нам дараад авчихав. Өнгөн дээрээ шатахууны үнийг дарсан мэт харагдаж байж болох ч улс төрийн зорилготой байхыг ч үгүйсгэхгүй. Ингэж хардахын шалтгаан нь “Цагдаагийн байгууллагын удирдлагуудыг солино” гэх албан бус эх сурвалжийн мэдээллээс үүдэлтэй. Үнэхээр улс төрийн тоглоом юм бол хууль, хяналтын байгууллагыг өөрийн гартаа “бүрэн атгах”-ыг хүссэн эрх мэдэлтний алхам байж мэдэх юм.  Ямартай ч хэн нэгний шидсэн “эзэнгүй чулуу”-н дунд шатахууны үнийн өсөлт мартагдаж орхив.