Хууль зүй, дотоодын хэргийн сайд Х.Нямбаатар өөрийгөө өмөөрч, өмөлзсөөр твиттерийн “боол” боллоо. Түүний хийж чадах тоотой хэдэн зүйлийн нэг нь өөрийгөө өмөөрч твиттер хуудастаа хоёр өгүүлбэр жиргэх, нөгөөх нь өөрийнх нь эсрэг байгаа нэгнийг хууль хяналтын байгууллагаар далайлгах, Зөрчил, Эрүүгийн хуулийн зүйл ангиар иргэнээ сүрдүүлэх бололтой. Салбарт нь алдаа дутагдал гарсныг нь, удирдаж байгаа салбарынх нь дунд, доод шатны зарим алба хаагч нь адгуус адуу мэт аашилж, авирлаж, ёс зүйн доголдол гаргаж байгааг нь тоолбол тэр сайдын суудлаасаа огцрох болзлоо хэдийн хангачихсан. Гэтэл тэр өнөөдрийг хүртэл уснаас хуурай гарах аргаа төлөвлөж, тооцоолсоор суудалдаа бат бөх гэгч нь шигдэж байна. Нэг үгээр бол, түүний уснаас хуурай гарах арга нь твиттер хуудас нь.

Удирдаж байгаа салбарынх нь алба хаагчид хүний эрхийг дээдэлж, хүнлэг энэрэнгүй байвал түүний гавьяа. Адгуус шиг авирлаж, ард иргэдээ нүүр нүдгүй балбаж байвал түүний буруу биш гэнэ. Хоёрхон цагийн өмнө гэхэд л тэр өөрийгөө өмөөрч, өрөө тасалгаандаа “гоншигнож” сууна. Тодруулбал, өчигдөр 21:00 цагийн орчимд цагдаагийн алба хаагчид гавтай иргэнийг зодож, танхайрсан бичлэг ил болсон. Бичлэгтэй зэрэгцээд Ерөнхий сайд Л.Оюун-Эрдэнэ Хууль зүй, дотоод хэргийн сайд Х.Нямбаатарт “Цагдаагийн алба хаагчид иргэдийг танхайрсан хэргийг яаралтай шалгаж, хуулийн хариуцлага тооц” гэх үүрэг, чиглэл өгсөн гэх. Харин Нийслэлийн цагдаагийн удирдах газраас сэтгүүлчдэд тайлбар өгч, хоёр жилийн өмнө болсон хэрэг хэмээн тайлбарлав.

Удирдаж байгаа салбарынх нь алба хаагчид хүний эрхийг дээдэлж, хүнлэг энэрэнгүй байвал түүний гавьяа. Адгуус шиг авирлаж, ард иргэдээ нүүр нүдгүй балбаж байвал түүний буруу биш

        Цагдаагийн ерөнхий газрын Гэрч хохирогчийг хамгаалах хэлтсийн дарга, цагдаагийн хурандаа Д.Манлайбаатар “Өчигдөр цахим хуудсаар цагдаагийн алба хаагчид иргэний эрх чөлөөнд халдаж байгаа талаарх бичлэг цацагдсан. Тус бичлэг 2019 оны хоёрдугаар сарын бичлэг байсан. Чингэлтэй дүүргийн гуравдугаар хороонд байрлах цэнгээний газарт иргэд “Төлбөр тооцоо хийхгүй, танхайрч байна” гэх дуудлагын дагуу цагдаагийн алба хаагчид очиж ажилласан байна. Энэ үеэр үүрэг гүйцэтгэж байсан цагдаагийн нэр бүхий албан хаагчид иргэдийн эрх чөлөөнд халдаж, тодорхой хэмжээний зөрчил гаргасан гэдэг нь шалгалтаар тогтоогдсон. Эл үйлдлийг цагдаагийн албан хаагчид болон иргэд хоорондоо ярилцаж, цагдаагийн газарт бүртгүүлэлгүй нуун дарагдуулсан гэдэг нь өчигдөр цахим хуудаст цацагдсанаар ил боллоо. Үүнтэй холбогдуулан цагдаагийн байгууллагын удирдлагаас хойшлуулшгүй арга хэмжээ авах үүрэг чиглэл өгч, мөрдөн шалгах ажлын хүрээнд гэмт хэргийн шинжтэй хэмээн үзэж прокурорын байгууллагын хянаж шалгах ажиллагааны харьяаллаар  хэргийг АТГ-т хүргүүлэхээр ажиллаж байна. Одоогийн байдлаар хоёр алба хаагчийг ажлаас нь түдгэлзүүлж, хохирогч, гэрчээс мэдүүлэг авах ажил өрнөж байна ” гэлээ.

Харин Хууль зүй, дотоод хэргийн сайд өнөөх л зангаараа өөрийгөө өмөөрч, твиттерт хуудастаа дараах жиргээг жиргэжээ.

      “Цагдаагийн байгууллагад хүний эрхийг дээдэлж, хүнлэг энэрэнгүй байж ажиллахыг үүрэг болгодог. Гэвч намайг сайд болохоос өмнө үеийн бичлэг олон нийтийн сүлжээнд тарааж байгаад харамсаж байна” гэжээ. Тэр уг нь салбарын сайдын хувьд “Хэдэн жилийн өмнөх бичлэг ч бай, миний удирдаж байгаа салбарын алба хаагчид ийм ёс зүйгүй, эрээ цээргүй үйлдэл гаргасанд харамсаж байна. Олон нийтийн сүлжээнд бичлэг тавигдсанаар энэ асуудлыг мэдлээ. Холбогдох албан тушаалтнуудад үүрэг, чиглэл өгч, хариуцлага хүлээлгэх болно. Ёс зүйгүй алба хаагчдынхаа өмнөөс салбарын сайдын хувьд уучлалт хүсэж байна” гэсэн бол хүн чанартай байх байлаа. Харамсалтай нь, түүнд уучлал хүсэх сэтгэл хумсын толио ч байсангүй. Түүнд алба хаагчдад зодуулсан иргэнээ хайрлах сэтгэл бүүр ч байсангүй.  Харин ч өмнөх сайдын үе рүү хэргийг “бухаж” уснаас хуурай гарахаар амь тавин зүтгэж, өрөвдөлтэй гэгч нь  харагдана.

         Эр хүнд, тэр дундаа Хууль зүйн сайдад гоншигнуур зан хэрэггүй гэдгийг Х.Нямбаатар ойлгоогүй, твиттерт жиргэчихвэл өөрийнх зөв гэж боддог бололтой. Тэр Ерөнхийлөгч асан Ц.Элбэгдоржийн талаар ингэж жиргэж байсан нь санаад ороод байх юм. “Би энийг цэвэр ариухан юм бичиж, ярихаар ичээд байх юм. Бүхэл бүтэн “Эрдэнэт” үйлдвэрийг залгичихаад УИХ-ын чуулган дээрээс хөөгдөөд гарч байхыг нь би тодхон санадаг” хэмээн бичиж байлаа. Тэгвэл “гоншигнуур” гэх сэтэр зүүсэн Хууль зүй, дотоод хэргийн сайд Х.Нямбаатар таниас Монголын ард түмэн, Сонгинохайрхан дүүргийн сонгогчид чинь ичиж байна. Асуудал гарвал суудалтайгаа үлдээд, ард иргэдээ орхиод хаашаа ч хамаагүй зугтах сайд таниас бүүр ч их ичиж байна.

Түүнд алба хаагчдад зодуулсан иргэнээ хайрлах сэтгэл бүүр ч байсангүй.  Харин ч өмнөх сайдын үе рүү хэргийг “бухаж” уснаас хуурай гарахаар амь тавин зүтгэж, өрөвдөлтэй гэгч нь  харагдана.