-БЭЭЖИНГИЙН ОЛИМПЫН ДӨНГӨЖ ДАРАА МОНГОЛЫН УЛСТӨРЧИД Н.ТҮВШИНБАЯРЫН АВЧИРСАН БАЯР ЯЛАЛТААР ДАЛИМДУУЛАН ТАЛ ТАЛД ХУВААГДААД АВСНЫГ УНШИГЧ ТА МАРТААГҮЙ БИЗ ДЭЭ-

         2008 оны Бээжингийн олимп. Найдангийн Түвшинбаяр хэмээх “битүү морь” хүн төрөлхтний олимпын жүдогийн -100 килограммын төрөлд аварга болж, монголчуудын хувьд эв найрамдлын, элгэн саднаа дахин халуун дотноор хайрлахын бэлгэ тэмдэг болж байлаа.

          13 жилийн өмнө болсон тэр гэгээн сайхан үйл явдал цагийн аясаар бүдгэрч, сарнисаар өнгөрсөн гурван ч сонгуулийн хугацаанд монголчууд талцдагаараа талцаж, бутардгаараа бутарч, төрийн эрхийг барьсан улстөрчид тал талд бүлэглэл болон салаад удаж байна. Яг 2008 оны зуны өдий шиг.

         Уншигч та санаж байгаа бол нэг сонин давхцал үүсчихээд байна. 2008 оны олимпын үеэр МАН Монголын Засгийн газар, улс төрийн хүрээллийг яг өнөөдрийнх шиг бүрэн атгаад байсан цаг. Хаашаа л харна МАН-ын харьяалалтай, тус намын боловсон хүчин Монголын улс төрд яг одоогийнх шиг дарга, даамлын алба хашиж байв. Гэсэн атлаа шуудайд хийсэн үхрийн эвэр шиг биесээ чимээгүйхэн “сэжилж”, Монголын улс төрийг утгаар нь доройтуулж байлаа. Гэвч үүнийгээ ил гаргаж чадахгүй, дэмий л өөр хоорондоо “үзэлцэж”, ах нь дүүгээ, дүү нь ахыгаа замаасаа зайлуулахын түүс болсон гэхэд хилсдэхээргүй он цаг байв. Мөн л яг өнөөгийн Засгийн газар, төр түшилцэж яваа эрхмүүд шиг гэсэн үг. Нийгэм, ард түмний амьдрал ч мөн яг л одоогийнх шиг дүр төрхтэй, бараа бүтээгдэхүүний үнэ тэнгэрт хадаж, хэдэн бор иргэд нь хоногийн хоолоо арай чүү залгуулж байсныг санаж байгаа биз ээ. Ингэж юм юм нь савандаа багтаж ядан “халуурч” байхад Н.Түвшинбаяр олимпын аварга болж, монголчуудын сэтгэлд итгэлийн гал авчирч, юу юу ч байхгүй нийгмийн сэтгэл зүйг баяр хөөрөөр дүүргэж, хагацахдаа бэлтгэж байсан улс төрийн бүлэглэлүүдэд таатай нөхцөл бүрдсэн билээ.

 Ах нь дүүгээ, дүү нь ахыгаа замаасаа зайлуулахын түүс болсон гэхэд хилсдэхээргүй он цаг байв. Мөн л яг өнөөгийн Засгийн газар, төр түшилцэж яваа эрхмүүд шиг гэсэн үг

        Өөрөөр хэлбэл, ядуурал, ажилгүйдэл, хоол хүнсний хомсдол, амьжиргааны баталгаажих түвшний доройтолтой үед улсын төр бужигнаад, талцаад эхэлбэл өлсгөлөн ард иргэдийн тэмцэл, эсэргүүцэл туйлдаа хүрдгийг анддаггүй улстөрчид Н.Түвшинбаярын авчирсан баяр хөөрөөр далимдуулан тал талд хуваагдаад авсныг уншигч та мартаагүй биз ээ. Олимпын ялалтын баяр хөөртэй залгуулан хэзээ ч салахгүй мэт, одоогийнхоор бол У.Хүрэлсүх, Л.Оюун-Эрдэнэ нар мэт байсан Н.Энхбаяр, Ц.Элбэгдорж хоёр нуруу нуруугаа харалцан, нэгнийхээ оймсыг гозолзуулаад авсан. Мөн С.Баяр, М.Энхболд нар сиймхийг ашиглан бүлэглэлээ зузаатгаж, одоогийн Х.Нямбаатар, Сү.Батболд нар шиг эрх мэдэл, эд хөрөнгө, гадна дотнын лицензийг “шуудайлж” эхэлсэн. Ингээд олимпын өмнөх бат бөх, нэг намын эрх мэдэлд мэт байсан улс төр олимп дуусахтай бараг зэрэгцэн хагарсан хэрэг. Яг үүнтэй ижил нөхцөл одоогийн улс төр, Засгийн газарт үүсчихээд, боломжтой цагаа хүлээн “халуурч” байна.

        Хатиг хагарах мэт улс төрийнхний бие биенийхээ идээ бээрийг шахах цаг олимпын гэрэлт өдрүүдийн дараахан өрнөх нь улс төрд өрнөж буй сүүлийн үеийн үйл явдлуудаас тодорхой харагдаж буй. Гол нь ковидын нөлөөт ард иргэдийн ядуурал, туйлдал, уналт, бухимдлыг бага ч атугай сатааруулж, эх орондоо хүн төрөлхтний олимпын ялалтыг авчрах эзнийг л тэд хүлээж байна. Тэр хүн хэн ч байсан он цагийн дараа Монголын улстөрчид түүнийг өнөөгийн Н.Түвшинбаярын “суудал”-д дамжилж аваачаад “дүүжлэх” л болно. Улстөрчдөд хэн нэгний ялалт, баяр, бахархал чухал бус түүнийг ашигласан улс төрийн нүүдэл, хожоо нь л хэрэгтэй байдгийн жишээ удахгүй давтагдах вий. Олимпын дараа Монголын улстөрчид “Нэгийгээ үзэж, нэхий дээлээ тайлалцах”-аар амарч, зугаалж байгаа нэрээр тал талд хуралдаж, хуйвалдаж явна...

Хатиг хагарах мэт улс төрийнхний бие биенийхээ идээ бээрийг шахах цаг олимпын гэрэлт өдрүүдийн дараахан өрнөх нь улс төрд өрнөж буй сүүлийн үеийн үйл явдлуудаас тодорхой харагдаж буй