Аль ч үед бусад орноос буцалтгүй тусламж, зээл горилж суусан Монголын төрийг энэ хүнд цаг үед эрхлүүлэх улс орон олдох болов уу даа.

           ХӨСҮТ-ийн захирал Л.Баттөр өчигдөр дельта вирусийн талаар мэдээлэл өгсөн. Тэрбээр “Сүүлийн үед бүртгэгдсэн халдварын тохиолдлуудаас сорьц бэлтгэж Япон Улс руу энэ сарын 16-нд явуулсан. Шинжилгээ хийгдэж байгаа. Бид одоохондоо дотоодод батлагдаж байгаа тохиолдлуудын хэдэн хувийг дельта вирус эзэлж байгааг тодорхойлох боломжгүй байна. Дельта вирус хүн амын дунд тархсан гэх нотолгоо байхгүй. Манай улс дельта вирусыг PCR-д суурилсан мутаци илрүүлэх аргаар илрүүлж байгаа. Гэхдээ энэ нь баталгаатай биш. Бид хоёр сарын өмнө PCR-д суурилсан шинжилгээний аргаар дельта вирус байх магадлалтайг илрүүлсэн. Япон улс руу явуулсан сорьцоос дэльта вирус байгаа нь тогтоогдсон. Мутацид орсон вирусийг илрүүлэх төсөл хөтөлбөр бичээд явуулсан. Төлөвлөгөө ёсоор тавдугаар сарын сүүлээр ирэх байсан. Гэтэл аппаратыг үйлдвэрлэгч үйлдвэр нийлүүлэлтээ удаашруулаад байна. ДЭМБ-ийн дэмжлэгтэйгээр бусад дагалдах хэрэгсэл ирсэн. Одоо генийн дараалал тогтоох аппарат л ирэхгүй саатаад байна. Өөрөөр хэлбэл, хүний нөөц нь бэлэн болчихсон, мутацад орсон вирусийг илрүүлэх аппарат ирчихвэл дотооддоо шинжилгээ авах боломжтой. Бид хүний нөөцийн хувьд бол бэлэн болчихсон. Гурван судлаач Япон Улс руу явж, 20 сорьц шинжилж, аппараттай ажиллаж сурсан. Маш өндөр өртөгтэй учир PCR, түргэвчилсэн шинжилгээ шиг авахгүй. Тодорхой шаардлагатай үедээ л авч, баталгаажуулна” хэмээн мэдэгдсэн.

          Техник технологийн үсрэнгүй хөгжил, шинжлэх ухааны санаанд оромгүй нээлтүүд секундийн хурдаар бий болж хүн төрөлхтнийг гайхшруулж байхад бид хаана явна вэ. ХХI зууны бүхэл бүтэн улс байж дельта вирусийг илрүүлж чадахгүй байна гэдэг дэлхийн шившиг болохгүй гээд яалтай. Энэ нь ХӨСҮТ болон эм, эмнэлгийн байгууллага, эмнэлгийн салбарын ажилчдын буруу биш юм. Ердөө л шинжлэх ухааныг үл тоож, эрдэмтдээ сонсдоггүй, эрүүл мэндийн салбарын боловсон хүчний бодлогод анхаардаггүй, шинэ санаа, техник технологи, инновацийг дэмждэггүй Монгол төрийн балаг. Дотоодод илэрч буй халдварын хэчнээн нь дельта вирус байгааг ялгаж, тоолж чадахгүй байгаа улс түүнийг хянана гэдэг “үлгэр” юм. Аль ч үед бусад орноос буцалтгүй тусламж, зээл горилж суусан Монголын төрийг энэ хүнд цаг үед эрхлүүлэх улс орон олдох болов уу даа.

Дотоодод илэрч буй халдварын хэчнээн нь дельта вирус байгааг ялгаж, тоолж чадахгүй байгаа улс түүнийг хянана гэдэг “үлгэр” юм. 

Япон улсаас өнгөрсөн тавдугаар сард ирэх ёстой байсан аппарат өнөөг хүртэл ирээгүйд ХӨСҮТ-ийн захирал халаглан суух нь арга ч үгүй юм. Амьсгалын аппаратгүйгээс болж эмнэлгийн хонгилд нас барж буй монголчуудыг бид нүдээрээ харсан. Амь нь тасраагүй ч үхлүүт хэвтээ хэн нэгнийг “Энэ өвчтөн найдваргүй болсон. Ар гэрийнх нь хүсэлтээр аппаратыг нь салгамаар байна” гэдэг үгийг хэлэх дээ эмч нар төрийн өмнөөс ичдэг байж мэднэ.

            Үнэхээр үйлдвэрлэгч, бүтээгч орон байж дэлхийн хөгжилтэй хөл нийлүүлэн алхаж чаддаггүй юм аа гэхэд бусдын жишгээс суралцаж орчин үеийн техник, технологийг эмнэлгийн салбартаа нэвтрүүлэг хэрэгцээ байгааг Монголын төр хэдэн хүний үхлээр ойлгох юм бол доо. Монгол Улсын Ерөнхий сайд Япон улсад айлчлах үеээрээ энэ тухай хэлэлцээр хийж, гарын үсэг зуралцсан тухай мэдээ сонсогдсонгүй. Хүн амын эрүүл мэндийг эн тэргүүнд тавьж, бодлого чиглэлээ ядарсан түмэн рүүгээ чиглүүлэх нь энэ Засгийн газрын үүрэг байлтай.

             Харамсалтай нь тэд коронавирус, делта хувилбарыг эрүүл мэндийн салбарынханд даатгаад үлдээчихсэн. Тэдэнд огт “падгүй” мэт авирлах болсон. Ямар сайндаа л ард түмнээ хоёр талцуулж, жагсаал цуглаан хийхэд хүргэсэн шийдвэрээсээ эргэн буцаж, аймаг бүрд хурдан морины уралдаан, бөхийн барилдааныг зохион байгуулахыг зөвшөөрч байх вэ дээ. Хоногийн хоол, банкны зээлдээ дарагдаж, амьдын жаргал, баяр баяслыг ч дүүрэн эдлэж чадахгүй туйлдаж яваа иргэдээсээ ч харалган төртэй байна гэдэг юутай эмгэнэл вэ.