Ерөнхийлөгчийн сонгууль ч дууслаа, наадам ч болохоо байлаа. Ковидтой зэрэгцэж амьдрах гээд үзэж тарж, үсэрч наадаж байна, монголчууд. Хэвийн аж амьдрал руугаа шилжиж байна, үнэндээ. Цар тахлаар далимдуулж замхарсан, завшсан хэргүүдээ шалгах цаг нь ирлээ, хууль хяналтын байгууллагынхан. Тухайлбал, “Эрдэнэт” үйлдвэрийн мөнгийг ёроолгүй юм шиг завшиж, бусадтай бүлэглэн халаасалсан, дураараа дургиж, дунд чөмгөөрөө наргисан тус үйлдвэрийн ерөнхий захирал Х.Бадамсүрэнгийн хэргийг нэн даруй шалгана уу.

           Төрийн өмчит үйлдвэрийн мөнгөөр охин Б.Буянжаргалынхаа сургалтын төлбөр болох 102 сая 385 мянган төгрөгийг Канадын Торонтогийн Их сургууль руу “Эрдэнэт” үйлдвэрийн данснаас шилжүүлсэн баримт ил болоод он дамжлаа, хууль хяналтын байгууллагынхан. Төрийн өмчит үйлдвэрийн мөнгөөр нэг биш будаа тоглож, хувьдаа завшиж, албан тушаалын байдлаа урвуулан ашигласан Х.Бадамсүрэнгийн хэргийг ингээд өнгөрөөж байгаа хэрэг үү. Эсвэл төлөөсөнд нь хоёр ажилтныг нь хорьсон хэрэг үү.

          Х.Бадамсүрэн 2016 онд “Эрдэнэт үйлдвэр”-ийн захирлаар очсоноос хойш түүний тансаглал хэрээс хэтэрч, өнөөдрийг хүртэл төсвийн хөрөнгөөр дураараа дургисан баримт нь ил болсоор байна. Тэрбээр захирлын суудалд суусан дариудаа 01 тоот тушаалаар 300 саяар шинэ Лексус 570 маркийн автомашин худалдан авч байлаа.

          Тус үйлдвэрийн шилэн дансны мэдээллээр Х.Бадамсүрэн нь хувийн орон сууцаа тохижуулсан, хагас тэрбумын үнэтэй автомашин, мөнгөн аяга, массажны сандал, уран зураг, согтууруулах ундаа худалдаж авахыг зэхсэн гээд тэрбум, тэрбумаар тоологдох хөрөнгийг хувьдаа завшсан нь ил болоод он дамжлаа. Тодруулбал, Х.Бадамсүрэн 200 орчим сая төгрөгөөр хувийн орон сууцаа тохижуулсан гэх баримт ил болж байлаа. Гурван унтлагын өрөөндөө тус бүр 10 саяын иж бүрдэл, ажлын өрөөгөө 8.6 саяын тавилгаар тохижуулсан гэх баримт бий. Харин өөрийнхөө өрөөнд “MELODIA” брэндийн унтлагын өрөөний тансаг иж бүрдлийг 25.5 сая, 15 сая төгрөгөөр хувцасны шүүгээ, 8.1 сая төгрөгөөр бусад тавилга авсан байдаг. Түүнчлэн “DONATELLO” брэндийн буйданг 21.5 сая төгрөгөөр, “MELODIA” брэндийн зочны өрөөний тавилгыг 20 сая төгрөгөөр, жижиг ширээ 3.2 саяар тус тус авсан нь гэрэл зурагтайгаа дэлгэгдэж байсан.  Байраа тохижуулахаас өмнө 24 сая төгрөгөөр засвар хийлгэсэн байдаг. Энэ мэтчилэн “Эрдэнэт” үйлдвэрийн мөнгийг хувийн хэрэгцээндээ зарцуулсан гэх түүний баримтууд зузаан дэвтэр дүүргэдэг билээ.

Монголын төр түүний мөнгө “идсэн” гэмт хэргийг нь мартаж, морь уядаг “хобби”-г нь үнэлсэн. Төрийн өмчит үйлдвэрээс тэрбум тэрбумаар нь мөнгө идсэн хүн төмөр торны цаана суух бус харин ч Төрийн ордонд заларч, Ерөнхийлөгчөөр энгэрээ цоолуулж байхыг харсан, бид. Харин одоо эрх баригч МАН-ын “Хулгайчидтай хатуу тэмцэнэ” гэсэн сүржин амлалт хэрхэн биеллээ олохыг харах үлдлээ

           Түүнчлэн гурван жилийн өмнө “Эрдэнэт үйлдвэр”-ийн захирал Х.Бадамсүрэн Улаанбаатар хотод амьдрах тансаг зэрэглэлийн байшин худалдаж авсан гэх баримт бий. Тухайн үед олны хэл, амнаас айгаад орон сууцандаа орж чадаагүй гэдэг. Тодруулбал, Зайсанд байх “Жарден” хотхонд нийт дөрөв тэрбум төгрөгөөр 202, 302 тоот орон сууцыг гараашийн хамт худалдан авч, үйлдвэрийн үндсэн хөрөнгөнд бүртгэсэн гэх мэдээлэл хэвлэлүүдээр гарч байлаа. Ус, дулаан СӨХ-ны төлбөрт гэхэд л 2018-2019 онд нийт 11.9 сая төгрөгийг “Эрдэнэт үйлдвэр”-ээс гаргасан байдаг. Түүний жилийн орлого нь хэд дахин өссөн, хадгаламж нь хэдэн саяар нэмэгдсэн гэх мэдээллүүд хэвлэлийн хуудаснаа хөвөрч байгаад “нам” дарагдлаа.

           “Эрдэнэт” үйлдвэрийн мөнгийг Х.Бадамсүрэн захирал нь ганцаараа хувьдаа ашигладаггүй нь Шилэн дансны мэдээллээр ил болсон. Тухайлбал, Тамгын газрын дарга Д.Баярболд, Тэргүүлэх менежер Н.Энхбаатар нар “Эрдэнэт” үйлдвэрийн мөнгөөр сар бүр өндөр үнэтэй орон сууцны түрээсээ төлүүлдэг баримт байна. Ингэхдээ сар бүр 6-12 сая төгрөгийг бэлнээр авч байсан юм.

            “Эрдэнэт” үйлдвэр Х.Бадамсүрэнд өртэй мэт “бөхөлзөж”, барагдахгүй тансаглалд нь “боомилуулсан” хэргийг шалгах цаг нь болжээ. Монголын төр түүний мөнгө “идсэн” гэмт хэргийг нь мартаж, морь уядаг “хобби”-г нь үнэлсэн. Төрийн өмчит үйлдвэрээс тэрбум тэрбумаар нь мөнгө идсэн хүн төмөр торны цаана суух бус харин ч Төрийн ордонд заларч, Ерөнхийлөгчөөр энгэрээ цоолуулж байхыг харсан, бид. Харин одоо эрх баригч МАН-ын “Хулгайчидтай хатуу тэмцэнэ” гэсэн сүржин амлалт хэрхэн биеллээ олохыг харах үлдлээ.