Н.Энхбаяр минь дээ, Н.Энхбаяр минь. У.Хүрэлсүхийг Ерөнхийлөгч болсонд өөрөө болсон юм шиг догдолж, амласан албан тушаалуудаа өгөх нь гэж атга чихэр харсан хүүхэд шиг алга ташин баярлаж суугаа юм биз дээ. У.Хүрэлсүхийг Ерөнхийлөгч болсонтой зэрэгцээд МАН-ын удирдлагын эрх мэдлийн уралдаан, увайгүй тэмцэл тус нам доторх 4,5 бүлэг фракцын хооронд өрнөж эхэллээ. Намын удирдлагыг гартаа авсан фракц нь дараагийн Засгийн газрыг төвхнүүлнэ. Урьдчилсан таамгаар тэр дунд Н.Энхбаяр ба түүний төрснөөс өөрцгүй “дүү” нарынх нь нэр байтугай сураг, сүүдэр нь ч алга. Н.Энхбаяр У.Хүрэлсүхэд дахиад л “мад” тавиулсан бололтой. Ер нь анхнаасаа Н.Энхбаяр 10 жилийн тэртээ МАН-аас сэтэрхий аяга, сиймхий дээлгүйгээр хөөгдсөн атлаа одоо яаж тэр намаас албан тушаалын бялуу хүртэж чадна гэж бодов оо. У.Хүрэлсүх Ерөнхийлөгч болсны дараа ч МАН түүний эрх мэдэлд байж, тэр хөгжмөө захиалсаар байна гэж яаж төсөөлөв өө. Ерөнхийлөгчийн сонгуульд хамт орохын тулд хэчнээн сайхан заалттай, заавал биелүүлэх үүрэг хүлээсэн эвлэрлийн гэрээ байгуулсан байлаа ч, ялалтынхаа дараа биелүүлэхгүй, биелүүлье гэсэн ч МАН түүний хяналтаас гарсан байна гэдгийг нь тооцоолж болсонгүй юу.
У.Хүрэлсүх яагаад сонгуулийн өмнө МАХН-тай нэгдэж, хамт сонгуульд орсон гэж бодож байна. Н.Энхбаярын Ерөнхийлөгчийн сонгуульд өрсөлдөж, ялж байсан туршлага нь хэрэгтэй байсан учраас гэж үү, тэрэн шиг үлгэр байхгүй. Харин хуучин МАХН-аас урваагүй ахмад сонгогчдын санал өөрт нь хэрэгтэй байсан учраас л Н.Энхбаярыг “ашигласан” хэрэг.
Саяны сонгуулиар ахмад сонгогчдын ирц ахиу байгаагүй юу. Тэдний ихэнх нь тааж ядах юмгүй У.Хүрэлсүхэд саналаа өгсөн байж таарна. Учир нь олон сонгуулийн нүүр үзсэн, 60, 70 гарчихсан ахмад сонгогчид баргын тархи угаалтад үзэл бодлоосоо урваж, таван төгрөг, арван килограмм гурилаар саналаа худалдахгүйгээр нийтлэг МАХН-ыг сонгодог л доо, ер нь. 2017 оны сонгуулиар МАХН-аас нэр дэвшсэн С.Ганбаатар сонгуулийн таамгийг яаж эвдэж байлаа. Түүний өмнө Н.Удвал бас л эвгүйтүүлж байсан. Харин энэ удаад МАХН татан буугдсан учраас ахмад сонгогчид арга буюу МАН-ыг л сонгосон гэсэн үг шүү дээ. Өөрөөр бол, ахмадуудаа аваад төрхөмдөө буцаж ирсэн Н.Энхбаяр У.Хүрэлсүхийг Ерөнхийлөгч болоход өөрийн зохих хувь нэмрээ оруулчихлаа гэсэн үг. У.Хүрэлсүхэд энэ л хэрэгтэй байсан. Н.Энхбаяртай гар барьж, албан тушаал амлаж, нэгдэхгүйгээр ахмад сонгогчдоор өөрийнхөө нэрийн өмнө хар цэг дугуйлуулах боломж У.Хүрэлсүхэд байгаагүй. Тэр амласан, санасандаа ч хүрлээ.
Харин ярьж тохирсноор бол одоо У.Хүрэлсүх Н.Энхбаярт амласнаа биелүүлэхийн тулд Л.Оюун-Эрдэнийн Засгийн газрыг унагааж, Н.Энхбаярт гурван сайд, хоёр төрийн нарийн бичгийн даргын албан тушаал гаргаж өгч, хариуг нь барих ёстой гэх. Агтны хариу жилдээ, аяганы хариу өдөртөө, албан тушаалын хариу сонгуулиар гэдэг ч энэ удаад бол У.Хүрэлсүхэд Н.Энхбаярт хариуг нь барих эрх мэдэл, бяр тэнхээ үлдээгүй. У.Хүрэлсүх Ерөнхийлөгчийн хувиар намын дотоод хэрэгт оролцох эрхгүй болсон. Ингэснээр Сү.Батболдын фракц, Миеэ.Энхболдын фракц гээд У.Хүрэлсүхийн фракцад даруулж байсан "акулууд" одоо буцаж МАН-ын удирдлагыг авч, "тоглоом"-нд оролцож эхлэхээр улайрцгааж эхэллээ. Ийм нөхцөлд У.Хүрэлсүх Н.Энхбаярт амласнаа биелүүлэх гэж нам доторх дайнаа дэвэргэх хэрэг байхгүй л байх. Тэгээд ч Ерөнхийлөгч болж албан тушаалын оргилд хүрсэн юм чинь "Буцах бэрд үнээ тугал нийлэх хамаагүй" гэдэг зарчмаар чимээгүйхэн тангаргаа өргөөд явахыг л бодно. Харин Н.Энхбаяр л хөөрхий байна. Хэдэн сайдын суудлын амлалт сонсоод өдийг хүртэл МАХН-ыг парламентад суудалтай байлгасан С.Ганбаатартайгаа түнжин хагарчихсан, тэгээд дарвиад намаа "устгачихсан". Одоо тэр ер нь хаачих бол.
Н.Энхбаяр минь дээ, У.Хүрэлсүхэд дахиад л "мад" тавиулчихсан уу |
|