МУГЖ  Ж.Мөнхсайхан1972 оны арваннэгдүгээр сарын 27-нд Говь-Алтай аймагт төржээ. Ж.Мөнхсайхан багадаа тун сахилгагүй нэгэн байсан гэдэг. Хөлбөмбөг гэхээр л амиа тавьчих дөхдөг тэрбээр сургуулийнхаа жижүүр анги хийсэн өдрөө шавайгаа ханатал бөмбөг өшиглөдөг байж. Учир нь түүний “бөмбөг” нь тэр өдрийн азгүй нэгний малгай байх бөгөөд дотор нь юм чихэж аваад л сургуулийнхаа коридорт тоглочихдог байсан гэнэ.

МУГЖ Ж.Мөнхсайхан СУИС-ийн драмын ангийг төгссөн. Олонд хүлээн зөвшөөрөгдсөн Соёлын тэргүүний ажилтнуудын нэг юм. Жүжигчин Мөнхсайхан анх “Өнгөт инээд” хамтлагт таван жил ажилласан. Одоо “Маск” продакшнд ажиллаж байгаа юм. 

“Маск” продакшны дэлгэцийн анхны бүтээл “Хайр харуусал” кино 2009 онд дэлгэцнээ гарч байсан. Түүнээс хойш “Хунгийн сүүлчийн дуу”, “Амьдарлоги”, “Соёлын довтолгоо” зэрэг кинонд гол дүр бүтээж, бусад олон арван кинонд туслах дүрээр оролцож байжээ.

Тэрбээр тайзны уран бүтээлд хөдөөний хүү болоод эмээгийн дүрийг хамгийн чадварлаг бүтээдэг жүжигчин юм. Ж.Мөнхсайханы хэлэх дуртай үг “Инээд гэдэг амьдралаас үүдэлтэй зүйл. Олон түмэнтэй уулзаж, ярилцан өвгөд хөгшдөөс сонин сайхан зүйл сонсож санаа аваад тайзан дээр тоглох тохиолдол бий”. 

Урлаг спортын авьяасаар баялаг, царайг нь харж, хоолойг нь сонсоход өөрийн эрхгүй инээд хүрдэг МУГЖ Ж.Мөнхсайханд урлагийн өндөр амжилт хүсье.